Тохолкода манзаям’ сибицяӈэ’ сяхарт’ нир’ нюмдеӈгу’’. Ӈацекы’’ тохоламбава манзая’ тоенана’’ сер’’. Ханзер ӈацекым’ школахана манзарась’ тохолаӈгур’, тарем’ пыда илан’ тарпаӈгу. Тарем’ ӈэбнанда ӈод’ маня’’ нина’’ поӈгана тохолкодаӈэ’ манзаранина’’ ӈэрм’ яхана ханярина ӈока.
Малӈэ’ пыдо’ минрена манзаяхато’ ныхыдо’ паклемби’’, харвась’ ӈацекы’’ няюв манзара’’. Тарця тохолкода’’ Я’малкана ӈод тянё ни’’ӈа’’. Ирина Нюдиковна Вануйта маля пон’ ӈацекехэна манзара, нянэй вадам’пэрӈа’’. Ӈацекыда хуркари’’ серкана нердеван’ харвасеты’’. Хусувэй по’ межрегиональной олимпиадам’ мэ’’мась Саля’ хардан’ тэворцеты’’. Хаювы по’ носидалава ирийхана тикы тохолкодам’ минрена манзаянда’ нямна хонрамбивась. Ирина Нюдиковна тарця вади’’ хэтась.
Корр: Ирина Нюдиковна, пыда Ярсалинской школахана манзаран’,Яр Саляхана илен’, нянэй вадам’ пэрӈан’. Тюку по’ ӈани’ округанда еркы март’ тэвын’, ӈацекыда хурка, вадамдо’ нерня’ пэрӈадо’?
Вануйта: – Маня’’ я’мал терва’’ нивам’ ӈа’’. Школанана ӈацекына мал’’ нянэй вадавна лаханакурӈа’’. Ӈацекына ты’’пэртя’’ ненэцие’’ ню’’ ним’ ӈа’’, мюсерта’’ ненэцие’’ ню’’. Хардахана мэна’’ ӈацекына’’ ӈань’ пэрӈадо’, лаханакурӈа’’. Тюку по’ сидя ӈацекым’ тэврамась тюкон’, ӈопой краеведением падбагу Юля Худи юдимдей классхана тохолкурӈа, нябюми’ нянэй вадавна паднаӈгу ӈоб’ юдимдейхана тохолкурӈа Юля Сэротэтта.
Олимпиада яханана тет по’’ ямбан миӈанё’’, маня’’ няхарамдэй’ по’’ пэрӈава’’ тюкохона. Небой’ тяхакуй похона ӈацекыни’ нянэй вада олимпиадахана нердець, небо’ӈани’ дипломантаваць.
Корр: Яхананда вадюданна’’ ӈацекыда хари’’ паныдо’- ной’ паны, сыра’ мэта паныдо’ мэцьты’’, харто’ сэдора’’?
– Не’’ ӈацекыни’ мал’’ сэдора’’ тенева’’. Яӈга урокхана сэдорасьты’’, кабинетханана нянэй паны’’ ӈули’’ ӈока.
Ненэцие’’ илва ӈоб’ нерня минрева’’, нянэй вадава ӈоб’ нерня пэрӈава’’. Школанана неделя родного языка ӈэсьты, хусувэй по’ Лапцуевской чтения танесеты. Тамальӈгана конкурс «Грамотей» пэрцетыва’’ – сямянд’ мел’’мана паднана нява нюмдебасьтыва’’. Сочинение’’ падбасьтыва’’, сямянд’ сава переводчик пюсьтыва’’, хари’’ литературахана сямянд’ сомбовна презентациям’ сертавым’ нюмдебасьтыва’’. Луца’’ вадавна нюмдесь: знаток родного края и языка, лучшая иллюстрация, тикахад’ лахарё’’ мэць’ теневана’’ – конкурс чтецов. Тикы’ хавна тарця номинациина’’ таня – хибя’’ сямляӈгда сямянд’ ӈока.
Кабинетханана конкурс’ ед’ падвы положениева ӈыды – нянэй ил’ минрена нява. Тикы сямянд’ мэбета тоходаннава. Нянэй вадавна ӈули’’ нердена ӈацекы. Ханзер’ нерденаӈэ’ ханта? Нерденаӈэ’ хэсь’ пиртада – тикы е’’эмня сян’’ номинацияхана нерняна мимбнанда’ тара.
Си’’ивумдей – ӈоб’яӈганя классхана тоходанна’’ ӈацекы’’ тарця номинацияхана ныхыдо’ хорпасьты’’. Самлязимдей классхана тоходанна’’ – Сава ӈудандана’’- мел’’ не’’. Тикы’ хавна нюдя ӈацекы’’ диктантм’ падбасьты’’.
Ӈудахана сямянд’ сомбовна сертавы манзая – тарця конкурс’ мэцьтыва’’. Тарця манзаям’ ӈули’’ сян’ ӈацекы’’сертаба пир’’ӈадо’. Паны’’ ӈэя’’, ӈухуко’’ паны’’ ӈэя’’,хасава’’ мальця’’ ӈэя’’, хобахат’ сэдвы ӈэя’’.
Ӈокаюв’ ӈацекына нюдякодандо’ сэдорась’ тохолавы’’, небянато’ мякна ӈока сэдорасьты’’. Сэдорава’’ ёльце пир’’ӈадо’. Ӈодяко’’ сертаби’’ма’’. Ӈодякохот’ сертавы’’ манзаина ӈули’’ ӈока.
