Тюку по’ маня’’ округна сиднтет ю’’ самляӈг пода панысь. Ӈэрм’ яхана нюртейӈэ’ ӈадимы округ. Яна’ таслирта ёнар’’ хасуюёнар’’ сидя ю’’ хасуюдимдей по’ неняӈг’’ ирий самляӈг’ яӈганя толыркад’ миӈа. Сиднтет ю’’ самляӈг по’’ ямбан ява’ сэвхана маниесь ӈарума’’, округна еркы мар’ ӈарка марӈэ’ вады, округханана ӈэсы’’ ӈокама’’. Хибярина хуркари’’ манзаи’’ минресь яханандо’ иле’’. Хусувэй хибяри’’ харта ямда сахарамбась илевамда мэ’’ӈада.

Нерняна товнда ирийна сидя ю’’ нюртей яляхана округна ӈарка ялям’ мэ’’манзь ма’’лаӈгуна’’. Яханана ӈока по’’ ямбан илевы’’, манзаравы’’ хибяри’’ ихид’ ӈэда вади’’ намдгу’’. Тамна тарця хибярина тензебтеӈгува’’, хуний илевандо’ мальӈгана ӈока ныхымдо’ округна вадюданва серт’ масьтець. Хибяри’’, хуний илевандо’ ямбан харто’ яндо’ е’’эмня ныхыдо’ нись’ сяй манзараць. Хибяри’’, хуний округна сиднтет ю’’ самляӈг пон’ нидаць’ тэв’’. Тарця хибяри’’ поӈгана мань’ тюку яля’ Александр Иванович Выучейскойм’ нюмдембидм’. Пыда саць мэбета ненэцясь. По’ тяхана вэвко хабця тамбир’ мэбета нява нэкалӈадась. По’ ваера ханзер нява хэвханана яӈгу, пыда мэбета вадамда нива’’ намдур’’.

Александр Иванович сава илм’ мэ’’мы хибярись. Округна Ӈарка яхана соясь, Чёрной нюбета ӈэсыкоцяна вадюданась, илесь. Илеванда ямбан соявы ямда’ сахарамбидась, харта ямда сянда хибярись. Чёрной ӈэсыкоцяханда илеванда мальӈгана пиликов’ тэворӈась. Харта со’’явы яхананда ёрцеты, ханесеты, тэри’’ тарем ныланавась ханцеты. Варёмда мэць таняна илесеты.

Илеванда ямбан ӈокавна манзаравы ненэця илда мер’’ ныклысь, пода иб’ӈо ӈока нись ӈа’’. Мат ю’’ самляӈг помда, маня’’ иленаӈэ’, ӈарка пэвдэй ирийна няхар’’ юдимдей яляхана мэтава’’. Александр Иванович харта пыдамда нись’ сяй манзарась, ида’ пилибт’ нянэй ненэцие’’ нямна няркнасьты. Хойхана мюсерта’’ ненэцие’’ нида’’ нядабасьты’’. Пыда няданда ты’’пэрма сер’ нямна таславы Закон’ округханана ӈадимясь. Депутатӈэ’ таравы ӈэванда мальӈгана тарця Закон’ ӈадимдева нямна ӈокавна манзарась. Округна ты’’пэртя’’ нида’’ ӈобняюв’ пэрта ненэцясь. Округханана Союз оленеводов Александр Иванович ватовна ӈадимдевысь, теда нисянда пявы манзаям’ хасава нюда пэрӈада. «Ясавэй» ассоциацияна президентӈэ’ тараванда мальӈгана’ӈод Александр Иванович манзаямда ив’ер минредась, тикым ӈока хибярина тенедо’.

Округна тю’’у мима серкана Александр Иванович Выучейской тарода нюдя нись’ӈа’’. Илеванда ямбан харта янда, харта хибярита нямна ида няркнась. По’ ваерась няна’’ яӈгован’ пунрёвада яӈгу. Александр Иванович Выучейской нянэй ненэцие’’ поӈгана пилибт’ илеӈгу, нява пилибт’ тенеӈгува’’. Мята’ тер’’ нида’’, нюда нися’ хасамдо’ тенедо’. Хасава нюда теневана’’ нита’’ няюв’ хаювы сыра Черной’ ӈэсын’ тэвормыць, таняна танеда хардандо’ памятной знакм’ лапцетевыць. Илеванда мальӈгана Александр Иванович пилибт’ мяканда маймбась тэворӈась, варёмда мэць харта со’’явы яханананда илесеты.