Хабте’’эдо’ подерпи’’, паныдо’ серопи’’, палыдо’ силпи’’. Тикыдо’ мале’’мяхадандо’, пон’ нись мы’’, ӈамгэ яндо’ ед’ тидахалпато’ ӈод’’ пилибт’’ ӈэдалэйд’’. Тикы хэни манэць, Вано савар талерка харад’ помна хая. Параӈода’ не манзарана ӈоб’’ ехэра. Харад’ варан’ тэвахава ӈоб’’ парахалъй’’. Ябта сэр’’ луцаӈэ хая. Сэр’’ юнода хэвувнанда то. Мирбида, паныда нинянда хуры’’. Хабте’’энда маха’ни’ ӈамды’’. Ябта сэр’’ юнода тю’’уцей’’ танэй’’, тобарида мяры’’. Танянандо’ хунанандо’ параӈода’ солдат’’ тамна пиня’ мимы’’. Солдат’ ӈэван’ тёрей’’.Ервадандо’ та’ таралъй’’. Я’ сяд’ ӈыл’ пыдо’ ха’’мыд’’. Вано савацянд яв’ тяханя’ саӈода хэвы. Тарем’ сырпата я’ няюд сидто’ тотрев’ яв’ сядо’ ӈыл’ саю’’ ха’’мота’’. Ӈани я’ параӈода’ солдат’’ ӈэвахана париденя юно миӈа. Солдат’’ ерв ӈэӈгоданакы. Яв’ сэрт’ пилибт’’ теба’’. Вано сава палахына сюа тад сапабата юд’ пир’ хаӈга’’. Техэ параӈода’ соладт’ ервам’ манэ’’ӈа. Тад пэванди, пон’ пёдӈаха’. Пэртя’’ няда сёбар’’ ӈэвы’’. Ӈари’ пыда ӈод’’ хэ’’ли хыбяхана пиртя нивы ӈа’’. Няда сита сапаӈгусь ӈод’’ хабте’’энда ӈыламна няхар’’ халацабтэй’’. Вано сава няхаромдэйхана нямда палы’ сапада. Тикы’ пуд ӈани я’ солдатахат ӈобкартадо’ ни хань’’. Мал’ хадэйдо’.  Пыда солдатахатата ӈобкартадо’ ни ха’’. Мякандо’ хая’’. Параӈода’ харад’ хэван’ тэвахава ӈахат мирбяханда ха’’амы’’. Ху’ тяхабэй вэсакоӈэ хая. Харад’ помна яда. Нерня’ сулмырӈа. Параӈода’ не манзарана ма’’нив’: -Ханяна ханцан? Тикахад пыда ма’’нив’:- Харад’ помна тэри ядэрӈадамзь.

Няхаркав по’ тэри иле’’. Няхарамдэйхана хэхэ’ мяд’ сеӈга’’ ӈани’ тёрейд’’. Сеуга’’ тёресь Вано сава ма’’нив’: -  Ӈобкав’ нядава’ параӈода’ солдат мань нядэйнась. Не ни пунрю’’. Тяхабэй вэсако ӈамгэм’ налангу?

Нябимдейхана солдат’’ ӈани’ хая’’. Теда’ Вано сава’ мэтада париденя юно. Яв’ техэ нянда хабтада тай сэр’’ юно. Ӈани я’ солат, ервасавэй’ хадэйдо’. Няхарамдэй’ хэбяндо’ мэта юнода, няръяна юно. Ӈани’ я’ луци’’ солат’ ерв’ юнода вэлк хабт. Яв’ техэ’ солдат’ ӈэвахана параӈодадо’ мэта мантанда товы. Саю’ ӈэван’ Вано савам’ манэ’’ӈа. Манзь ханада: - Вано сава пыдар тэвавэннё’’. Ӈацекыни пыдар хадабавыданё’’. Сит саць пилю’’ӈадм’. Сайнорманзь сяхаӈгарт’ нидам’ тут’’!

Тикандо’ яв’ сэркад сидя ян’ хая’’. Тикы яхад няръяна юно тю’’уцей мэй’’. Танянанда харад’ хэван’ ха’’амы’’. Вано сава ӈахат ӈыханда ху’ тяхабэй вэсакоӈэ хая. Палкасавэй юнонда хобам’ сепанда мю’ сюрӈада.

Параӈода’ не манзарана’ мякана илекари сер’’. Сита ӈавламби, пин’ хан’’ла. Илеванда сер’’ ӈобо’’ манзеты: - Параӈода’ солдат няхар’’ нядахава нядэйнась. Ӈобкартадо’ нись ха’’. –Ӈули’’ сиякан. Ӈобкарт ядэро’’мар яӈгусянё’’. Харад’ поӈгана етри’ лаханакурӈа’’: - Сидна’’ ӈоб’’ ябта сер’’ луца нядабись. Хыбяхартава’ нись ха’’. Нерде хэб’’на’’ мэкада сэр’’ юнось. Нябимдей’ париденя юнось. Няхарамдэй няръяна юном’ мэ’’ӈась. Хыбя ӈэдакы?

Ся’’ны ӈэбта ӈод’’ ӈодиманзь вэсако хая.. Няхар’’ ӈодя’ сэвам’ сепанда мю’ мэ. Сидя ӈодяда ӈули’’ няръяӈаха’, ӈопойдо ӈули’’ париде. Мяканда тэвы’’. Параӈода’ не манзарана хонрада: - Ханя’ ханцан? – Ӈодиӈадамзь. Няхар’’ ӈодям’ ходм’. Хуняна ӈани’ ӈодиманзь хантадм’. – Тикахавана ӈодядами та’’ма.

Малда ни’’ӈа’’.