Та ер’’ яля’ пуд няби яляхана ЛИТО «Заполярье» нермпэртя нян едэй книгам’ тась. Книга тарем’ нимдевы: «Неян вабц’ вада’’». Юнета профессор’ М. Я. Бармич падбэй нив ӈа’. Минханда Санкт-Петербурган’ мобилкавна Мария Яковлевна ня’’ лахана пяв, юндалтамбив. Пыда нян тарем’ мась: «Тикы словарюв ӈахэт падбивась. Книгаӈэсь Мария Афанасьевна Рачинская тюку по’ сертадась. Пыда, «Алмаз-граф» издательство’ ерв, теда’’ хэвханан ӈамды. Едэй сертавы саць ӈарка «Русско-ненецкий словарюв» та. «Неян вабц’ вада’’» книгам’ небян нюм’ яляхана нян тюледась. Пыда соя’’махаданда юр’’ по ваера. Словарюв Нярьяна Март’ ӈэдарась тюкона мэна округна’’ представительство си’’ми нядась».
«Неян вабц’ вада’’» книгам’ маньхаван словарьӈэсь нив таслабю’. Луца вадавна манзь Мария Яковлевна практической грамматикам’ семантика ня’’ манэ’’лабтабида. Вадам’ ехэрана Канин’ хибяри харта янда вадам’ хамада пясь мянтада, салиндер вабцувна лахана тохо мян’’ӈа. Тикы хавна лахарё падвыда таня’’. Тикыта пуд книгаха’’на литературной вадахана (падвы вадит пеляда ңаркаяндер вабц тамна ямалхы, пяк вада хавна) падвым’ тола, хамада пяӈгудо’. «Неян вабц’ вадаха’’на» тимандер, холӈговтер, нюдяяндер харто' вабцандо вадам’ хось мян’’ӈа. Пэ’’ хой тяхана Таймыркана иленя’’ ненэця’’ Канин саляндер вабцм’ хамада мянтадо’. Ӈав ненэця хибярир хуркари выӈгы вадавна лаханортам’ хамадаӈгуда. Ӈобнзер’’ мэта’’ вадидо’ толавандехэ.
Мария Яковлевна’ «Неян вабц’ вада’’» книгада тикы хавна сававна сертабэй. Падарта сэрако, Н.М.Терещенко словарь’’ ӈодь’’ яленана падаркад сертабэясь. Сэрако падаркана тарана вадам’ хибярир, тоходанна ӈацекы ӈод мер мерривна хоӈгуда. Обложкада ӈо’’ паскоювна сертавы.
Мань нянан ниня тэвортада тарця ӈэдараха: ямб муно манэ’’лабтабада инякода ханяӈы вадаха’’на нираха тэвор’’. Ӈани ханяӈы вадаха’’ падтаӈго’’мида-рисунокда таневы ӈэбта вадам’ ехэранар ӈацекэр минханда хамадаӈгудась. Н.М.Терещенко’ словарькана тарцяда таня. Таймыркана харто’ округандо’ газетахана ненэй вадавна падвы вадаха’’нандо’ ямбувна вадета мунодо’ иняхалкана манэ’’лабтамбидо’’. Маня’’ «Ялумдханана’’» ӈобтарем’ сертава мян. Мань валакад методичкаханан тарцяв таня.
Тамна манзь пир’’ӈам, «Неян вабц’ вада’’» словарь хавна тамна ненэй учебник' серм’ минре. Тикар ненэй учебник. Ӈав словарь’’ учебникӈэ нисеты’’ толю’’.
М. Я. Бармич’ падвы «Неян вабц’ вада’’» мань ин ӈукана тарем’ ха’’мы’’. Тикэда тамна мэкад, 296 страницахана ӈацекын перенита нюм’ манэӈа’’.
Роза Канюкова падвы
