Вы здесь

Округна со’’яма яляхана

Округна ялямʼ сава ихиня ядтаваць

Мэта’’ ирийна хусуюдимдей яӈганя толыркана округна еркы маркана хари’’ яна со’’яма ялям мэ’’ӈаваць. Тикы яляхана хуркари’’ ихиня сомбой сер’’ ваераць. Яля ямбан маркы « Марад’ сейм’» нюбета площадьхана хувэхэд’ хибярина ма’’лыць, яля ямбан музыка сось.

«Ява’’ мэнева’’» тарем нюмдевы ныланава ӈацекына е’’эмня танясь. Хусувэй ӈарка ялян’ товы ӈацекы’’ ивнянда ӈэда сянаковамда хось. Тикы яляхана ныланавась’ товы’’ хибяри’’ округна ӈэвахана мэнаӈэ тэравэна инаугурациям’ манэ’’ӈаць. Культурахана манзарана’’ программам’ хамадаць, маркана танеда’’коллектив’’ хыно’’ӈаць, тараць. Тикахад’ округна агропромышленный комплекс предприятия’’харто’ сертабада’’ ӈаворидо’ манэ’’лабтабиць. Ӈамзахад, молокахад, халяхад сертавы’’ ӈавор’’ тэмдабиць. Санкт-Петербургхад’ товы’’нина’’ тюкумэвахана выставкам’ хамадаць. Тадтавы’’ манзаида округна хибярихи’ Александр Клейда манэ’’лабтась. Мэкад’ выставка КДЦ мякана манзара. Яля’ пэвсюмбы’ пеляхана Александр Маршал хыно’ӈась, пыда еркы’ площадьхана ӈока хибяри’’ ма’’лась. Сямянд’ пуданана фейерверк нина’’маниець.

Округна со’’яма ялям’ мэ’’манзь тюкумэвахана хибяри’’ тоць, хуний невхэна маня’’ яханана манзараць, сояць, теда ӈа’’ни’’ Архангельск, Санкт-Петербург, Москва маркана иле’’. Санкт-Петребургхад’ маня’’ нява’’ Мария Яковлевна Бармич турӈась. – Мань’ тюкон’турмани’ мальӈгана манзаяв’ ӈока ӈэсьты, ханярина хуркари’’ма’’лёвахана мэсьтыдм’, лаханасьтыдм’, манзарасьтыдм’. Хибярина няюв лаханорцетыдм’. Харн’ теневана’’ нин’’, харн’ перенин’’ пунякуна хаюрцеты’’, хэвхандо’ тэвась нисьтыв’ пирас’’. Сомбоковна ма’’лась, лаханась времяв’ нисьты’’тэв. Теда округна ӈарка ялям’мэ’’мась товаць, ныланавада ӈани’’ яӈгу’’. Сертавы’’ манзаин’ ваде’’я, манэ’’лабтая.

Округва ӈарума, сэвхана маниесь хусувэй по’савумдана, хибярина маниеб – сававна иленарха’. Тад’ нерня ӈод, мань’ со’’явы яв’ савумданая, хибярина сенз’ӈэя. Маня’’хибярина харто’ вадамдо’тохолабая, харто’вадавнандо’ лаханая, ямдо’лэтбая. Ӈацекы’’ маня’’ институтхана тоходанвась’ турӈая.

Ваеравы ныланава яляхана Няръяна маркана округна со’’яма ялян’хамандавы ӈарка ма’’лёва ваерась. Яндахат’ товы’’хибяри’’ культурно-деловой центр’мякана ма’’люрӈаць. Хуркари’’тенз’ мэта хибяри’’ ӈокаць, поӈгнандо’ ненэця’’ хибярина ӈод таняць. Маркана иленариць, ӈэсыхыт’ товы’’ тюку мэвахана саць тянёць, ӈокаювдо’ ервӈэ’ тарана. Мядонда’’ поӈгана Нина Петровна Назаренко, Анна Ильинична Ледкова лекарьӈэ’ манзаравэхэ’ таняӈаханзь, тикахад’ Иван Егорович Ледков ӈока по’’ямбан депутатӈэ’ таравэва. Федосья Семеновна Кауц, хуний Саляхана «Малоземельский Совет’ ервӈэ’ ӈока по’’ ямбан манзарась. Округна со’’яма яля’ ма’’лёвахана Федосья Семеновна тарця вади’’ хэтась: – « Тюку яля’ округна ӈарка ялям’мэ’’мась сидна’’ма’’ла, товы’’хибярир’ ёльце ӈока. Валакада поӈгнандо’ ӈамгахэвась округна ӈэсы’ тер’’ хибяри’’ яӈгу’’, нянэй ненэця ӈоб ни’’ӈадю. Иб’ӈод ненэцие’’округ’ялям’мэ’’ӈава’’. Маня’’нина’’ харто’ янандо ӈобтарем’сававна манзара, ямдо’мэнесь иле. Тарця хибярина ханярина таня, хуний округна вадюданван’ ӈока ныхымдо’ масьтець. Тарця хибяри’’ тюку яля’ тюкона мэбнандо’тарась. Мань’ ихинян’ тарця хибяри’’ тюкохона маниесь савархась.

Округна – 85. Со’’яма ялям мадава’’. Нерняна ӈока манзая’’сидна’’ ӈате’’, сертавндава’’ яханана тамна ӈока. Тад’ нерня хибярина илм’ хусувэй по’ саваркаӈэ’ хантаная, ява сахарамбась, сенз’ӈэсь илехова’’. Хусувэй хибярина манзаяда таняя, ӈацекы’’ яханана сояӈгая’’.