Ӈэрм яхана сидя ю’’ самляӈг по’’ тяхана ханярина хибярина ӈобт’ ма’’лась, харто’ янандо’ илена’’ толырто’ тянё ненэциедо’ нядабава’’ е’’эмня ассоциации’’ ӈадимдець. Маня’’округханана тамальӈгана «Ясавэйва» ӈадимясь, ӈобтарем’ сидя ю’’ самляӈг поданда хантана. Тарця ялуна’’ тюку по’ ӈарка пэвдэй ирийхана мэтына’’.

Хэвхы округхана илена’’нина’’ ассоциациямдо’ «Ямал потомкам» нюмдедось. Тюку по’ пыдо’ ӈод ассоциацияндо’ со’’яма ялям’ мэ’’мась ятна’’, тарця яляхато’ маля хамяку’’. Хаювы яля’’хана Советхана манзарана’’хибяридо’ ма’’люрӈаць. Хурка серу тасламбиць? Сямянд’нерде вадам Эдман Неркаги президентадо’ мэ’’ӈась. Таӈы ирий ямбан таневы серудо’ таслаць. Толырто’ тянё’’ ненэця’’ сидя ӈарка ма’’лёван’ тэвормыць. «Сияние Севера» нюбета Межрегиональный кочевой фестивалькана Улан Уде маркана манзаравыць. Тикахад’ вэба’’ ирийхана нидо’ финно-угорской тензхад’ перена’’ ненэця’’ конференцияна’ манзаравась ӈэдалёрӈаць, хуний Карелияхана Петрозаводск’ маркана вэба’’ ирийхана ваерась. Таняна маня’’ округхадана ядэрмы’’ нина’’ таняць. Пыдо’ ӈэдалёрмамдо’ ӈани’ си’’ивхана таневнда газетанана падӈгува’’.

Хаювы’’ яля’’хана «Ямал потомкам» ассоциация серм’ пэртя’’ хибяридо’ Приуральской районхана мюсерта’’ ненэцие’’ мят’ ӈэдалэйдаць, тикахад Паюта факториям манэ’’та’’, таняна хойхана мюсерта’’ ненэцие’’ няюв лаханакурмадо’ танеӈгу.