Маня’’яханана ӈока мел’’хибярина’’ иле’’. Харто’ манзаидо’ сертамбада’’ маркана таня, округна хусувэй ӈэсыхына иле’’. Няръяна маркана мел’’ хибярина манзарава’’ е’’эмня харто’ хардадо’ таня’’. Нина’’ таняна ма’’лёсь манзарасьты’’.

Маня’’ хибярина хуркари’’-сомбой манзаи’’ сертабасьты’’. Тарця манзаидо’ хуркари’’ выставкахана маниесьтына’’, ӈани’’ яхана иленаха’’ манэ’’лаб-табасьтына’’. Округна еркы’ март’ ӈани’’ яхад’ турта’’ мел’’ хибяри’’ӈод тэворцеты’’, мастер-класс’ мэцьты’’. Тарем’ ты’’саполана ирийхана Няръяна март’ Ямалкад’ падтаӈгода, лэвна маторана мел’’ хасава турӈась. Маркана илена’’ хибярихи’ харта манзаравамда ваде’’ӈась, сертавы’’ манзаида манэ’’лабтась. Алекандр Сотруев ӈацембой хасава, тарем’ ӈод сертабада’’ манзаида мел’’мана сертавы’’. Маня’’ яханана ӈод лэвна’’ маторана’’ нина’’ таня. Виктор Вылка, Филипп Ардеев теневана’’, пыди’ мел’’мана матораӈаха’, хусувэй манзаиди’ ин’ мэёвна тэберӈа’’. Мел’’мана манзарана’’нина’’ ӈод тарем’ еримбнанда няхато’ тэворцеты’’, няхататто’ тоходансеты’’. Носиндалава’’ ирий сидя ю’’ си’’ивумдей яляхад ӈарка пэвдэй ирийна тетимдей толыр’’ӈэсонд Саля’хардахана межрегиональной выставка манзараӈгу’’. Тарця выставкам’ хусувэй сидя по’’ ваерась хамадабидо’. Тюку по’ ӈани’’ танеӈгу’’. Таня маня’’ яхана манзарана’’мел’’хибярина хэванзь’ ятна’’, хуний Заполярный районхана иле’’, манзара’’. Нина’’ харто’ манзаидо’ хэвхы округханана илена’’ хибярихи’ манэ’’лабтаӈгудо’. Таняна манзарана’’ мел’’ ненэцие’’ манзаи’’ манэ’’та’’.

Тамна тарця ихиня’ сомбой юн’ намдаваць. Несьхана вэба’’ ирийна нюртей яляхана мел’’ ненэцието’ е’’эмня школам’ нэць.Тарця мядонзэйм’ декоративно-прикладной творчеством’ минрена’’ хибяридо’ ня’’амаць. Ӈудидо’ мэта’’ мел’’хибяридо’ Несь’ӈэсы народной творчество мякана ма’’люрта’’. Наталья Латышева тарця мято’ ервотаӈэ тара, пыда ӈод харта мел’’ не’. Пыда манзаида Няръяна маркана танеда’’ выставкахана ӈока маниесьтына’’. Теда Наталья Федоровна ӈэсыхына илена’’ мел’’ нита’’ няюв’ клубхана манзараӈгу’’. Таня турта’’ хибяри’’ сэдораӈгу’’, сяродаӈгу’’, ӈодякоход’ манзаи’’ ма’’лабгу’’, пенахад, хобахад, нойхад манзаи’’ сэдбаӈгу’’. Клубан’ ӈацекы’’ турта’’, ӈарка хибяри’’ танеӈгу’’. Хусувэй таня товы’’ хибяри хари’’ ӈудаханата манзаи’’ сертабаӈгу’’. Тарця хибяри’’ Несьхана тянё ни’’ӈа’’. Ӈаркамбой не’’ ӈацекы’’ яӈга программавна сэдоравась’ тохолабгудо’. Тохо’’махадандо’ хусувэдо’ харта нояцядамда сэдгу.

Тарця хардахана ма’’люрць, мел’’ хибяридо’ ӈока едэй манзаи’’ сертаӈгу’’, хуний сяӈгова маркана танеда’’ выставкахана ӈани’’ манэ’’мы’’ ӈэӈгу’’.