Нерняна товнда сидя ёнар’’ самлязимдей яӈганя по’ ты’’ ниць ирийна хасуюдимдей толыркана Победа ялям’ си’’ивъюдимдеймэвна ядтаӈгува’’. Си’’ив ю’’по’’ ямбан хынёси’’ яханана илева’’, маям’ ехэрась ӈацекына вадюдана’’, хибярина илевадо’ сэвхана маниесь хусувэй по саваркаӈэ’ хантана’’.
Ӈарка сайнорма ёльце’’махад си’’ив ю’’ по’’ ваера’’. Пудана сайнорман’ маня’’ яхадана хасую’’ ёнаркад вата’’ хибяри’’ хаяць, ӈокаювдо пуня яхандо нидаць’ тэв’’, ӈокаювна юнси’ юхубэй’’. Победа ялям’ядабтаван’ ханярина теда маля хамякова’’ миӈа’’. Тарця ӈарка ялям’ сававна ядтась’ тара’’. Мурманск’ маркана тюку ирийна тет’’яля’’ ямбан «Салют Победы» нюбета Всероссийский фестиваль народного творчества миӈась. Тарця фестиваль – конкурсан’ Северо-Западный федеральный округхана илена’’ хибяри’’ ма’’люрӈаць.Тюкумэвахана сайнорма’ по’’ нямна хамандавы программыдо’ Карелия, Нысми республикахад’, Ленинградской, Новгородской, Псковской, Калининградской областьхад’, Ненэцие’’ автономной округхад’, Санкт-Петербург’ маркад’ коллектив’’ турӈаць. Фестивалян’ турмы’’ хибяри’’ театрализованной программы’’ харто’ яханандо’ сайнормы’’ по’’ таневы’’ ил’ манэ’’лабтаць. Тарця ӈарка фестиваль’ культура похона хамадаць: Министерство кульуры Российской Федерации, Российское военно-историческое общество, ФГБУК «Государственный Российский дом народного творчества», органы исполнительной власти в сфере культуры и дома (центры) народного творчества субъектов Российской Федерации.
Маня’’ округхадана этнокультурный центрхадана сян’’ коллектив’’ таня’’ тэворӈаць. Хусувэдо’ харто’ манзаидо’ манэ’’лабтабиць. «Илебц» театрхана сянакода’’ нина’’ Прокопий Явтысый падвы пьесавна’ масьтевы манзаямдо’ манэ’’лабтаць. Таняна мэ’’мидо’ нина’’ то’’омахадандо’ харто’ ваде’’тыдо’.
«Салют Победы» нюбета фестиваль межрегиональной этап тюку по ты’’ниць ирийхад’ сидя ёнар’’ самлязимдей яӈганя по’ ты’’ ниць ирий’ ӈэсонд Россиянана миӈа’’. Тарця марка’’на маля ваерась:
Пермьхана вэба’’ ирий 19 яляхад 22 яля ӈэсонд, Владивостокхана хор’’ ирийна няхарамдэй яляхад маттамдэй яля ӈэсонд, Мурманскхана хор’’ ирий нябимдей’ яӈганя толыркана манзаямда ёльцедась. Владивосток маркана тарця фестиваль’ таняна илена’’ хибяридо’ тюку ирийна хасуюдимдей яӈганя’’ толыркад’ сидя ю’’ нябимдей яля ӈэсонд’ ваераӈгу. Сидя ёнар’’ самлязимдей’ яӈганя похона фестиваль’ Тула, Новосибирск маркана ваераӈгу. Тикы’ пуд «Салют Победы» нюбета фестиваль’ гала-концерт’ харто яханандо’ нердевы’’ коллектив’’ Москва маркана ма’’лаӈгудо’. Тамальӈгана Победа си’’ив ю’’ пон’ хамандавы фестиваль’ Всероссийский фестиваль народного творчества «Салют Победы» лауреат’’ нюмдеӈгу’’.
