Саля’хардахана «Ямал регион» нюбета телерадиокомпаниядо’ таня, таняна радио’, телевидение’ манзаи’’ пэртя’’ манзара’’. Тикы округандо’ компания, есям’ бюджетхад’ ня’’амарпи’’.

Ӈокханда манзаранито’ толыр’’ няхар’’ юр’’ мян хибяри’’. Сертабада манзаядо’ ӈока, хуркари’’ программы’’ хамандаби’’. Я’мал яда ӈарка, округханандо’ самляӈг’ ёнаркад вата хибяридо’ си’’ив ӈарка маркана, си’’ив район’’ ӈэсыхына иле’’. Хусувэй яхад’ тэвравы юн’’ радио’, телевидение’ манзарана’’ ма’’ламби’’, тикахад’ округандо’ иленаха тэврамбидо.

Тарця компанияхана программыдо’ мат’’ вадавна тарпурӈа’’. Луца’’ вада’’ хавна тамна нянэй ненэця’’, хаби’’, тасу’’ хаби’’, ӈысма’’, татар’’ харто’ вадавнандо’ радиовна лахана, телевидениехэна харто’ программыдо’ мание’’. Маля сидя юд’ мян по’’ ямбан таремъюв’ манзара, хусувэй по’ манзаядо’ ӈокамдана. «Ямал регион» компанияхана тарця ед’ наӈгадя дирекция’ манзара’’ – Дирекция программ народов Севера. Таняна ӈэрм’ тенз’’ ненэця’’ харто’ манзаидо’ минре’’. Хусувэй манзарана’’ харта вадавнанда лаханана. Хой’ илм’ теневана’’ хибяри’’, ӈокаюв’ манзаранидо’ харто’ выӈгана соявы’’, вадювы’’. Тарця дирекцияхана манзарана’’ ӈокавна округмана ӈэдалёрцеты’’. Тикахад’ харто’ хамандавы программаханато’ выӈгана мюсерта’’, халядана’’ ненэцие’’, ханисэй’ пэртя’’ нито’ илм’, манзаравам’ манэ’’лабтабидо’. Маля понку’ варёмдо’ мэць манзара: некоцяха’ Тагна Романовна, Марина Тайбери, Лариса Тайбери; ӈысма’’ Анатолий Терентьев, Мария Ёлтышева; хаби’’ Елена Сибарева, Евгений Озелов; тасу’ хаби’’ вадам’ минрена Руфина Приезжих. Мал’ пыдо’ телевидение, радио манзаян’ яӈга’ тоходанвадо’ яӈгусь, манзаравандо’ сер’ манзаидо’ торомдэйдось. Тарця дирекциям’ ӈобт’ ма’’лавэдо’ Галина Тохоли, паднана не, ӈахы’’ похот’ радио’ манзаям’ пэртясь. Теда ГТРК «Ямалкана» манзара.

Тюку ирий’ нюртей толыркана «Ямал Регион» ГТРК со’’яма ялямда мэ’’ӈась. Самляӈг’ яӈганя по’’ ямбан Я’малкана тарця телерадиокомпания манзара’’.