Хусувэй по’ маня’’ округханана ненэцие’’ паднава яля’’ танесеты’’. Тарця ялу’’ Ӈэрм тенз’’ толырто’ тянё’’ ненэця’’ серу’’ тасламбада управление’ манзаям’ пэртя’’ нина’’ хамадабсеты’’. Маля сян’’ по’’ ямбан паднава ялуна танесеты’’.

Тарця ялу’’ мэ’’манзь хибярина Няръяна маркана ханяӈэна носиндалава ирийхана ма’’ласьтыд, ханяӈэна ӈани’ ӈарка пэвдэй ирийхана.

Ненэцие’’ паднава ялу’’ мэ’’мана’’ мальӈгана нянэй вадам’ пэртя’’ тохолкодина семинар’ мэцьты’’, хуркари’’ конкурс’’ танесеты’’. Ненэцие’’ вадана, культурана нерня илева, танева, лэтбава нямна хуркари’’ сер’’ хамадавы’’ ӈэсьты’’.

Тюку ялян’ хэтась, округна администрация ӈэрм’ тенз’’ толырто’ тянё’’ ненэця’’ серу’’ тасламбада управлениена ненэцие’’ паднава ялу’’ ваерава’’ е’’эмня маля манзара’’. Сидя ёнар’’ тетимдей’ яӈганя по’ ӈод ненэцие’’ паднава ялуна танеӈгу’’. Тарця яля’’ха хамякова нямна рабочей группа’ ма’’лавы’’. Таняна манзарана’’ хибяри’’ тарця ялуна хамадава нямна ибедорӈа’’. Нерняна товнда яля’’хана ненэцие’’ паднава сер’ нямна хамандавы группана манзарана’’ хибяри’’ ма’’лаӈгуд’, таслаӈгудо’ – ся’’ня тюку по’ округханана ненэцие’’ паднава сер’ нямна хамандавы ялуна ваераӈгу’’. Хурка сер’’ тамальӈгана яханана танеӈгу, хибя’’, ханяхад’ тута’’.

Мэбета’’, манзаидо’ ив’ер минрена’’ тохолкода’’ хусувэй ӈэсыхына таня’’, маркана тянё ни’’ӈа’’. Тохолкода’’ ӈод харто’ манзаяханато’ хуркари’’ пирдырмы’’ мэцьты’’, харто’ манзаидо’ пилибт’ несэюмдабсетыдо’. Тикы е’’эмня харто’ тоходанвась ӈэдалёрцеты’’. Ненэцие’’ вадам пэртя’’ тохолкодина ӈод’ харто’ манзаидо’ округханана пэрьядо’. Ӈокаюв’ тарця тохолкода’’ манзаидо’ сававна теневана’’, харто’ ӈод ваданандо’ ныхы’’ӈа’’. Пыдо’ е’’эмняндо’ маркана тоходанва’’ хусувэй по’ танесеты’’. Тюку по’ ӈод Людмила Яковлевна Талеева вадавна: тохолкодина’’ семинар’ мэ’’мась ӈарка пэвдэй ирийхана ӈани’’ ма’’лаӈгуд. Тамальӈгана ӈока несэй ӈамгэм’ намдгу’’. Тарця манзаям’ маркана манзарана методистадо’ хамандаби’’.

Теда ӈани’ тарця юн’. Маня’’ округхадана сидя тохолкодава Москва маркана минда’’конкурсан’ ӈэдалэйӈаханзь’, «Всероссийский мастер-класс учителей родных, включая русский, языков-2014.» Тарця конкурсан’ нина’’ хусувэй по’ тэворцеты’’. Тюку по’ таняна ныхыдо’ харпадаха’, харти’ манзаиди’ манэ’’-лабтабадаха’ – Парасковья Ивановна Выучейская Красной ӈэсыхы’ школахана манзарана, технология’ предметм’ пэртя. Ӈацекэхэ’’на’’ маля ӈахакуд’ манзарана. Нябиюм’ Татьяна Юрьевна Давыдова. Пыда ӈани’ маля ӈахэт’ манзара. Индига ӈэсыхына илена’’ ӈацекы’’ ненэцие’’ вадан’ тохолабида. Манзаямда теневана, мэнена. Москва маркана яндахат’ товы’’ тохолкода’’ ма’’лэйдаць. Маня’’ няхаюна’ яна’ нямна презентациям’ сертаӈгуху’, харти’ урокди’ манэ’’лабтаӈгуху’, ненэця’’ ембдяр’ нямна вадиди’ мэт’’ӈаха’. Ханзер’’ няхаюна’ таняна пыдади’ манэ’’-лабтаӈахась, ханзер’’ конкурс’ ваерась тикы нямна ӈани’ яляхана паднаӈгудм’. Татьяна Юрьевна Давыдова, Парасковья Ивановна Выучейская таняд’ тось харти’ ваде’’тади’. Сидди’ нядаба няди’ Людмила Яковлевна Талеева.

Тохолкодина нарка маркана

Маня’’ яханана ӈока тарця тохолкодина манзара’’, хуний манзаидо’ маля пон’’ минрейдо’, таӈок по’’ ямбан тохолавы’’ ӈацекыдо’ ханярина иле’’, харто’ маля хуркари’’ тарана’’ манзаяха’’на манзаранаӈэ’ тара’’.