Тюку яля’ Матрёна Ивановна Талеева падвы пьеса’ сиднтетимдей пелям’ толара’’, тарця падвы манзаяда ямб’, янамбовна мал’’ газетахана падвы ӈэӈгу.
Мал’’ хибяри’’ ӈаябад’ хэван ма’’лэяд’’, ӈаябарӈа’’. Еване парабэй ӈамзи ӈокавна та. Ты’’ ва’’ны’’. Хаер’ пэсьда, я’ ӈаха ӈади’’. Вэн’’ ӈо’’ мунзи,нюсялмбэй яхадери сертялмби, нявотарӈа, туруӈа.
Мика: мань яхадев, нюртей суюда, суюмда сяӈа, пюрӈада. Ят илевахана тэкоця хибярихыта ӈаварӈэ таслабэй. Вындер’ хибяри тэхэтата илевада миӈа: тэр яӈгода, илевар яӈгода. Хаювы по Вы’’ылка Мюкул мал’’ тыда мертян’ ӈэдарабтавыда, теда халясавэй то’ хэвхана ненда, нюта’ ня нядэ’’, халям’ хадамби. Саць вэва, маяндорӈа’’, папада таня тэвбата, нямда илеванзь ханаӈгуда. Невхэна ӈо’’ харто’ хибяридо’ маян’ тэввы нидо’ нядасетыдо’. Тюку я – ирина’’, нисяна’’ мюслама, тарем таслабэй. Та’мальӈгана яв’ хэвхана тэхэна ханзо, падяраха ӈувм’ ӈаворӈа’’, та’ер’ пуд ӈани сывыдалвахана мюселтына’’.
Пале: Тарем’, маня ӈо’’ мюселтына’’. Сыв’ няхатана мядона ӈана ӈэсьты. Нина таӈында ӈэсонд нина’’ манэт’’. Халядава’’ ӈамзавна няданд’ мэван харваваць. Халя танеӈгу?
Мика: Хадава’’ товась ятнаню, сита хосая, Хавря турта, халям’ ӈо’’ тата сидда’’ манэта. Пыдари’ ӈо’’ нюмди’ манэман нирим’варва. Нюри’ сава хибяриӈэ вадёдана, си’’ым сатовна нядаби, хар’’н хасава нюрхав, сяӈав, пыда ӈо’’ няна торума, хэвний хибярива’’ вунива’’ ӈа’’. Ӈамзам’ нён ӈэдарамбю’’, халя нюнди’ харта еремдебэйда, мяданзэйри’ ӈэя.
Луке’ пухуця: Ӈаябад пуд сяянзь тара. Нумда сава, пихина сяйма пир. Еване, ӈамзамд мани’ матортами’, синдава ни тара, вэн’’ сяры’’. Ӈацекы’’, небямда нядара’’, мяд’ хэвхана сяйндава’’.
Еване: Уле, ларь’ мюд хампет, малакам’, холаць, юрм’, печеньям’ стол’ ни та. Евдя, хыдя ӈамтамбан. Еле, няр хэдя ӈамтамба нядад. Эдэ, пыдар ӈани няньдава’’ матор’’.
Тыне: Ти, сяӈок нядаӈгодар. Пэдавако, мале нядаӈго пирӈа’’. Не’ ӈацекы небям’ нядабада, хасава’ ӈацекы нисям’ нядабада. Эдэхэва тамна яркола тенева, валакда тэхэна мэӈгу.
Луке’ пухуця: Нара мани’ Эдэн ня’ хабтхана мэвани сер’’, ӈока хабэвком’ ӈамдлани’. Эдэв си’’ыв пидям’ хось. Эдэва’’ тенева, тиртя’ пидям’ терси хаяба ни тара, хэвы, тиртяко ярта. Тюку яля яхадеком’ ярдава’’, пуна мань Ӈарка Нумд’ туютадм’. Нум харта тарем таславыда: ты, тиртя’ ӈамза, халяко ӈо’’ – хибяри ӈавар’’. Хаврява’’ ябто’ ӈамзахана сидна’’ малибте, ябто ябтмахад Як’ няканда ня’ ябтуманзь Ханта, тикы ябтуна сэратаӈгуна, нара’ ӈэсонд я’ ӈылна тюкохона хаюда’’.
Мика: Еване, сёябтакодва хотнакэн, хэтувнда вадина мал’’ мэ’’яна, серона’’ таслэйна’’. Нини’ мякандо’ пяӈгудо’. Мань хэвхы тидян’ ябе сём’ мэман харвадм’, сёв хайнаӈгу. Ӈацекыӈэ’, тедари ты’ няю хаяда’’, пилю’’ хадабида’’. Тюку яля хибяра вата, хадахананда мядоманзь ӈэдалёрта, тына таня ва’’ная. (ӈацекы маид’’, хобасавэй, яӈгабцядамдо’ мэхэя, ты’ няюна янамбовна хая’’.)
