Округханана община серу’’ минрена’’ ненэциена таня’’. Таняна манзарана’’ хибяри’’, хуний харто’ манзаидо’ пэрӈа’’, харто’ илевамдо’ нерня тидхалемби’’.

Тарем’ манзарава’’ сибиць ни’’ӈа’’, тарця манзаяхана ӈока’’ едэй сер’ теневась тара’’, хусувэй серт’ тоходанась. Хари’’ серм’ нэбвахана ӈока’’ тарана’’ падро’ хамадамбава ӈарка манзая’. Община’ серкана манзарана’’ хибярина нядабада’’ таня’’. Округна администрацияхана ӈэрм’ ненэцие’’ серу тасламбада нина’’ семейно-родовой община серу’’ пэртя нина’’ е’’эмня тохолкова’ хамадабсеты’’. Тюку по’ ӈод тарця тохолкова танеӈгу. Няръяна маркана сидя яля’ ямбан округна семейно-родовой община’’ манзаи’’ минрена’’ хибярина е’’эмня семинар’ минда. Ма’’лёвамдо’ тюку яля’ педколледж’ мякана нэӈгудо’.

Округна ӈэсыхыт’ март’ си’’ив яӈганя общинахана манзарана’’ хибяри’’ ма’’лэйдаць, нерня манзаравнда серудо’ таслабгу’’. Саха (Якутия) республикахад’ товы Татьяна Сивцева вадам’ мэта’’. Тикы не харта яхананда ӈобтарем общинам’ сертавысь, таняна нида’’ манзара’’. Ханзер’’ манзаито’ мимам’ семинаркана маня’’ хибярихина’’ тэвраӈуда.