Мякы мякад Хардяӈг’’ не ня тарпарахавонда. Тарем’ мамонода: – Харючи’ нюдя ню ӈаха’’на тось, мякананда мэ. Нюдя Хардяӈг ӈани’ вахалмонда: – Не ӈацекы ян’ сиякан. Ся’’ня тута. Тикари’ минанда тальняюна торахаванода. Ӈуда’ маханя’ нём’ тядэда. Няби ӈудахана пэмда ня’’амбида. Ту’ хэварин’, лат’ ни’ ӈамды’’. Нерденя терм’ тю’’у’ нэкалӈада. Ӈани’ вабтада, пыда тарси’’ ма: – Не янэ’’ӈэ тикар хор’’. Недко папами пиняку’ паӈгамй’’: – Тикы ӈаварадм вунив пэр’’. Ябе няӈэ ва’’ав ний няр хынибэй ӈэӈгу. Мань няюни пыхыдасавэй вэсы сюрахалъй’’. Тикари минда ӈэта ни’ санэй’’. Нё пунда хаи. Ӈамгэда ӈэвна параӈодахана’’ няхар’’ ханаӈадм’. Ся’’ны ӈэбто’ ямданолына’’. Си’’ив Хардяӈг’ не няндо’ мюдм’ харво’’ паӈго’’ нимня нэхэда’’ нидём’. Маня’’ няхар’’ӈэ хуркаси’’ – хараси’’ мюселъяна’’. Сиби ханеӈгани яво маторӈава’’. Нерни няна юдмян’’ мяд’’. Тэта Тавысе’’э ӈэӈгоданакы’’. Вары мя’’ӈэ, мя’’ма’’ мярава’’. Ся’’ны ӈэбто’ Тэта Тавысе’’э тарем’ мамонода: – Теда’ тюку яля’ ӈарка хардаха’’ ханд’’ нивам’.

Хаара вуни’ таня’’. Мал’ хэбянодо’. Пон’ нись мы’’ торахавонодо’. Тэта Тавысе’’э яберахавонда, патекарманода: – Харад’ няна Нёр Тавысе’’эм’ нями ходамзь, нями тарем’ мась: – Тавысо’’ Сюдбя Харючи’ яхана тэси’’ хаёвы. Тыда’’ мато’’лабтавы. Ӈадябянда тюку’’ тенд’ нява’’ яӈговы. Тикы’ хавна Харючи’ нюдя ню Ямб Санэрем’’эм’ хадарахавы.

Няби яляхана Тэта Тавысе’’э пыда тарем’ ма: – Ӈарка Хардаха’’ ханд ни’’ивам’. Харючи’ нюдя ню ядэртабтав’? Мань ӈани мадм’: – Ядэрт’’ нидам’. Ехэрана ям’ манэтадама. Тет падвэми ӈани’ подеръян. Хара вуни таня’’. Тайна хунана’’ юрётадо’ луца’ харад’ хэван’ ханона’’ сярава’’. Еся вад’ мюня ӈоб’’ ненадорка хан сяравы. Мэта тэхэвада сидя хабтарце’’э. Ӈари’’ тарця тым’ нивэдм’ манэс’’. Тибити’ ӈыламна пя’ Саля’ ӈади’. Харад’ мюня ӈоб’’ ненадорка ненэць’ ӈамдёвэ. Нёр Тавысе’’э ӈэӈгоданакы. Ипойм’ пява’’. Ӈамгэ ипрка’’на сэв’’ сэйвы’’. Сэвани’ ӈадимзь, еся бочкан’ си’’ми пакалмы’’. Нёр Тавысе’’э тарем’ мамонода: – Тюку яханд’ лыд хэдемда’’! Хасяндар яр!

Тарем’ лаханана нена’’ нерцькабты. Вадисей тырам’ ӈэдара’’ нивав. Еся бочка’ пусода тияд’’. Тикы есь’’ пеля’’ луци хоб’’нандо’ ӈэвадо’ санарӈа’’. Мань тарем’ мадм’: – Нёр Тавысе’’э, пыдар нянанд харами яӈгуси’’! Ӈамгэр хадкэ? Пыда ӈани’ ма: – Ябилъ’’явэв’’! Сит хорпидм’! Хуна мальӈгана тенева мякан хаця’ ӈо’’ ӈэвэн. Хар’’ни вэвадама. Сидя Хабтарце’’эм тэхэюни’ татадм’.

Тикари’ минани’ пин’ тарпыни’. Сидя Хабтарце’’эм’ ханкони пу’ сярӈахаюда. Мякани хаядм’. Тэва’’махадани си’’ив сян ялям’ екар мэпа’’на’’, ся’’ны ӈэбто’ нё панувна Ялморе’’э Сотэ’’ям’ тэри манэ’’ӈав. Сотэ’ ӈэва ни’ сидя ӈэдалёдам’ манэс’’ нидам’. Мэта тэхэбиди’ сидя хабтарце’’. Нянда нерденя Нёр Тавысе’’э. Няби ӈэдалёда Нёр Туӈгосе’’э, тарем’ мамонода: – Харючи’ нюдя ню ӈамгэ хадаита таняди’’. Тэри ӈабцата манда’’ манзеты’’, няхар’’ мирбяда. Тай сыркар’’ – ӈоб’’ мирбяда ӈок’’ ты’’ поӈгы! Няби’ мирбяда сиӈгы’ хан’ ний ти ӈамдёданё’’! Нахаромдэй мирбяда мякнанда хоны! Тарць’’ харахана тюкори яхад салпани саванё’’!

– Ет’ салканима. Хадаита яӈгу!