Вы здесь

Мэбета хасава ӈацекы

Маня’’ округханана пудана’’ сян’ по’’ ямбан ненэцие’’ паднава сер’ нямна таславы’’ ялуна хусувэй по’ танесеты’’. Тюку по’ юдимдей тарця ма’’лёва миӈа. Ненэцие’’ паднава сер’ ялуна ирий’ ямбан миӈаць.

Тарця серу’’ ӈобняюв’ ӈарка пэвдэй ирийна няхарамдэй яӈганя’ толыркана таслаӈгуна’’. Тикы яляхана конференциява ваераӈгу.

Ирий’ ямбан хуркари’’ ихиня сомбой сер’ ваераць, теда ӈод’ хусувэй яля’’ ханяховахана ма’’люрӈава’’. Тарем’, тюку ирийна маттамдэй яляхана вечер-памяти В.Н.Ледкова ваерась, мэта си’’ивна нюртей яляхана округна толаӈгова’ хардахана Роза Ивановна Канюкова ед’ хамандавы вечер’ мэ’’ӈаваць. Ненэцие словарь’ сертавы не Наталья Митрофановна Терещенко ед’ хамандавы ма’’лёвава ӈарка пэвдэй ирийна юдимдей толыркана танясь.

Ненэцие’’ паднава сер’ е’’эмня таславы’’ ялуна’’ мэ’’мась маркана мядондина таня. Тарця хибяри’’ няюв ӈобт’ тэворцетыва’’.

Тюку’’ яля’’ пиркана округна ӈэсыхыт’ товы’’ тохолкода’’, хуний харто’ ӈэсыхынато’ ӈацекы’’ ненэця’’ вадан’ тохоламбидо’ семинардо’ миӈа’’. Таняна мань’ саць мэбета, илан’ мэёвна сырта хасава ӈацекым’ ядабтамась. Нюмда Алексей, тензда Салиндер. Сидя ю’’ ӈопой покоцяда. Няръяна март’ пыда Санкт Петербург маркад’ товысь. Герцен нювм’ нюбета университетхана культурология факультетхана маля тетимдей по’ тоходана. Тены’’ по’’ илӈгана мал’’ хибяри’’,нянэювна ӈацекы виртуальной сетьхана контактхана ӈамдёсеты. Таняна пыдо’ нидо’ хомбидо’, торомдамбидо’. Алексей ваде’’ӈадась – ханзер” пыдо’ вадам’ теневанаӈэ’ контактхана вадамдо’ нерня’ пэрӈадо’. Ямалкана со’’явы хасава ӈацекы харта вадавнанда ёльце сававна лахана, ӈани’ яляхана пыда няюв’ лаханакурмами’ толаира’’.