Вы здесь

Илан’ мэёвна сыртаха’

Хуркари’’ серкана нерня миман’ харвана

Ӈарка пэвдэй ирийхана Няръяна маркана нянэй ненэцие’’ поӈгана хуркари’’ ӈарка сер’’ ваераць. «Ясавэй» ассоциацияна сидя ю’’ самляӈг пом’ ядабтаваць, тикахад’ ненэця’ письменность’ нямна ӈобт’’ ма’’лась лаханаваць. Тарця сер’’ поӈгана яханана мядондина таняць.

Мядонда’’ нина’’ няюв лаханакурмин’ ваераць. Мядондина’’ поӈгана Хадри Ӈокатэтта, неда Алла Набутова турӈаханзь’. Хадри нянэй ненэць, Ямалкана мюсерта’’ ненэцие’’ мякана соявы, хойхана вадювы. Хой’ илм’ сававна теневана, харта вадамда мэта, ненэцие’’ невхы илм’ теневава’’. Саля’хардахана тоходанась, тикахад’ «Ямал – Регион» нюбета телерадиокомпанияхана манзарась. Нянэй вадавна телевидениена лаханась. Вымна мюсерта’’ ненэця’ илм’ манэ’’лабтабись, халядана’’ ненэця’ манзаравам’ ваде’’ӈась, хари’’ тенз’ хибярита культура’ нямна лаханась. Хадри ӈацембой хасава. Харта ныхында енась иле, нерняри’’ минда хасава. Теда пыда Москва маркана иле. Тарця ӈарка мар’ хэвхана «Кочевник» нюбета этнопарк’ таня. Таняна Хадри варёмда мэць манзара, нянэй мякана иле. Хаювы по’ носиндалава ирий’ пудана толыркана мяканда недамда’ тэврась. Этнопаркхана тюнтаӈгуць. Неда ӈани’’ я’ тер некоця, нюмда Алла, тензада Набутова. Теда пыди’ ӈопой серм’ пэрць манзараӈаха’. Ӈарка пэвдэй ирийхана Няръяна март’ турӈаханзь. Манзаити’ нямна вади’’ мэ’’ӈаханзь. Хадри Ӈокатэтта тарця вади’’ мэ’’ӈась: – Маня’’ я’мал няна ненэця’ ханзер’’ мят’ тюӈга’’ тарем’ тюваць. Небяв’ тось, тикахад’ мя’’ни’ тер’’ таняць. Неми’ таня, нюмда Алла Набутова, пыда ненэй ненэця’ тензм’ ни’’ мэс’’. Пыда ӈани’’ я’тер нив’ӈа’’. Мят’ тюбнана’’ яӈга ехэранкана’’ сер’’ ӈадиберӈаць, ӈани’’ обряд’’таняць.

Ненэця’ вадам’ неми’ хаця’’ хамандабида, нянэй ненэцие’’ поӈгана наӈгадя по’ пеля иле. Нянэй мякана Москвахана небями’ таня, поӈгнана нянэй вадаривна лаханава’’. Неми’ ӈод инзеле. Тарем’ лаханась тухуда.

Москва маркана илени’. Этнопарк «Кочевник» нюбета я’ таня. Таняна манзарани’. Тикахана нянэй мяд’ таня’’, юрта’ таня’’, яранга’ таня’’, хуркари’’ тарця я’ сармик’’ таня’’.

Неми’ ӈани’ я’тер ӈэ’ нив, пыдо’ яханандо’ юртахана иле’’. Хаюпа’ хэвндя пирибцямдо’ тохоця’’ понд’ сюрпидо’. Ӈэвтани’ тоб’’, мэвндя недо’ ӈадьбата ни’’ тара’’. Ӈэв’ то, ядцям’ ня’’амби. Ядцянда малхана няръяна нойхана сярвы сеӈгакоця таня. Ӈэвтана ту’ нив’’, ма’’нив: – Мята’ хэвувна ядадамзь’ ӈани ядця’’ями’ мали’’. Мят’ тюӈгудм’? Тикахад’, ненэця’’ ванидо’ мят’ тюлембю’’.

Тикахад’ нё симна хибяри’’ ӈэдараба пя’’ним’’. Тикы ӈамгаридо’ пуня’’ моепидо’… Хуркари’’ ӈаво’ пирдалесь, ненд’ тэвӈгун’.

Хойхана няхар’’ яля’’ тюнтангу’’ма’’. Нерня не мякана мэӈгу’’, нябимдей яля хасава мят’ ханта’’.

Тюнни’ хойхана тюнтана’’ тотрев мэйнись, саць мэкадась.

Манзаява тарем’ минрева’’. Этнопаркан’ турта’’ хибяри’’ ӈока’’ ӈэсьты’’. Маня’’ хуркари’’ тенз’ ненэцие’’ ил’ нямна лаханасьтыва’’. Нянэй ненэцяӈэ’ мякана илевава’’ манэ’’лабтабива’’, вадава хурка? Ӈоб’ ваде’’ӈава’’. Ненэця’ вада урок’ мэцьтыва’’. Вадава тохолаван’ харвана’’ хибяри’’ турцеты’’, ӈацекыдо’ тэврабсеты’’.

Тарця мэкад’ ненэць Хадри Ӈокатэтта яханана иле, харвась манзара. Харта вадамда, ямда, тыда’’ мэнена хасава. Тамна Хадри хынокад’ ненэць, пыда сёмда Няръяна маркана илена’’ хибяри’’ сян’ маля намдурӈадонзь’. Енаӈгува’’, нерняна Хадри тамна маня’’ яхана’’ тэвормада танеӈгу, ӈока мэкад’ ӈамгэм’ тамна няданда намдгува’’.