Юр’ ю’’ по’’ тяхана маня’’ яханана ӈарка пэвдэй ирий’ си’’ивумдей яляхана Ӈарка явна мюсерта ненэця’ мякана хасава ӈацекы’ соявысь. Тамальӈгана хибяхарт’ манзь ханась я’’амадась: по’’ ваерась тикы хасава ӈацекэр’ ӈарка хибяриӈэ’ хэбсу.
Ёнар’’ хасуюр’’ самлязимдей похона соявы ӈацекы революция’ пуд «Кочевник» нюбета кооперативхана тыбэрмысь. Янамбовна тоходанвысь, тикахад’ тоходанвась Усть-Цильман’ еримысь. Таняхад’ тамна нерня Москва маркана тамальӈгана таневы Коммунистический университет трудящихся Востока ёнар’’ хасуюёнар’’ няхар’’ ю’’ нябимдей похона ёльцевысь. Ненецие округва ӈадимдебва серкана манзаравысь, окруисполком’ председатель ӈуда ӈылӈэ’ таравысь. Ӈарка яхана нюртей колхоз ӈадимдебись. Аспирантурахана ӈэрм’ ненэцие’’ институтхана Ленинград’ маркана тоходанась.Таняна манзарась, тыбэрма серкат’ перена’’ вади’’ ма’’лабись. Тикахад’ ненэця’’ вадавна фольклорный сборник падась, ханяна сян вадако’’ ӈобт ма’’лавысь. Луца’’ вадавна паднана манзаи’’ ненэця’ вадан’ сертабись. А.С.Пушкин стих’’, вадако’’ тарем’ падвыдась. Нюртей, нябимдей классхана тоходанна ӈацекы е’’эмня ненэця’ вадавна толанго книгам падась. Ёнар’’ хасуюёнар’’ тет ю’’ сиднтетимдей похона А. П. Пырерко сертавы русско-ненецкий словарь ӈадимясь. «Младший сын Вэдо» книгам’ падась.
Антон Петрович илевада’ хэбицясь, няхар’’ ю’’ мат’’ похонанда сайнормахана яӈгумась. Тарем’ ӈод пуданда ӈарка манзаи’’ хаесь.
Пыда нюртей ненэцие учёной, лингвист, этнограф. Няръяна маркана ненэцие’’ школа - интернат ёнар’’ хасуюёнар’’ мат’’ ю’’ си’’ивумдей поход’ А. П. Пырерко нювм’ мэ’’ӈа’’. Таняна тоходанна’’ ӈацекы’’ тамбир ӈарка ненэць илм’ тохолабидо’, школандо’ музейхана пыда илеванда, манзараванда нямна ӈока материал’’ ма’’лавы’’. Тюку по’ ӈод тикы школахана Антон Пырерко’ юбилеян’ ӈарка манзаи’’ сертаць. Школаханандо’ вечер’ ваерась, ханяна ӈацекы’’ Антон Петрович илм’ сценахана манэ’’лабтаць.
Тюку по’ Антон Пырерко ӈарка пэвдэй ирийна си’’ивумдей’ толыркана юр’’ ю’’ помда ядтаваць. Тамбир’’ ӈарка хибярива’ я’ ниня валакада няхар’’ ю’’ мат’’ по’’ илесь, тарем’ ӈод пуданда’ хаювы’ сарпяда маля лата’’. Пыда хаевы, сертавы манзая’’мнанда теда манзарава’’.
