Вы здесь

Илевава’’ нядана’’ пере’’

Тарем’ Алексей Салиндер тасламбида. Тикы хасавако’ Ямалкана соявы, теда Санкт-Петербург маркана тоходана. Харта вадамда сававна теневана, вадамда тю’’у минрена.

Интернет’ мэць ненэцие’’ вадавна нита’’ поӈгана лаханасьты’’. Хаювы ирийхана пыда Няръяна март’ турӈась.

Салиндер: – Мань’ Я’мал терам’, Ямальский районхад’ томась, хардами’ Сюнэй Сале. Теда’ студентӈэ’ тарам’, Санкт Петербургхана тохолкум’ Институт’ народов Северкана. Тикад’ нянэй ненэцие’’ тохолабидм’: ханзер’ ненэця’’ илеса’’, ӈамгэм’ пэрца’’, тикахад’ тикы ил’ нерня ваде’’ӈав’. Тарем’ ядэртанани’ тюкон’ тэвыв’. Тюкохона ваде’’ӈав: ӈамгэм’ маня’’ сертабива’’, ханзер мякна’ хэвняна илебана’’ –ӈамгэм’ пэрӈава’’, ханзер’ нянэй вадава таслабива’’. Нянэй вадава интернетхана мэ’’ӈава’’. Тикым’ тюкохона ваде’’тав’. Вадава нерняку’ пэрӈава интернетхана лаханакурмана поӈгана. Интернетхана вадам’ теневана’’, вадам’ тохоламбада’’ ӈацекына ма’’люрӈа’’. Хуркари’’ я’ тер’’ ӈацекы’’, молодёжь ӈэя, подо’ нюдя’’. Вадам’ таремъв минрева’’ нерняку, хар’’на’’ вадава, нянэй вадава. Тикахад’ лаханакурмана мальӈгана хуркари’’ темам’ мэ’’ӈава’’. Ханзер’ Няръяна маркана иле’’, Саля’ хардахана ханзер’ иле’’ ненэця’’, ханзер Таймыр’ няна иленя’’ ненэця’’ иле’’. Тикахад’ сидна’’ нядабада’’ таня’’ма’’ – Леонид Лар художник’ ӈэя, Александра Мещерякова журналист, «Красный Север» газетахана манзарась, теда РАЙПОН информационный центр’ ня’’амби. Маля тарця ненэциена ӈока, Няръяна маркана таня’’ма’’- пыдара’’ сидна ӈани’ нядабида. Тарця темам’ мэцьтыва’’ – вэвако вада’’. Ӈацекы’’ мят’ тюӈга, тикахад’ толаба’’ пясьтыдо’, масьты’’: – саво, мань’ тарця вади’’ ехэрасьтын’, теда толабась тохола пэян’. Нюдяко ӈацекэр’ тарцяню – ханяцей’ вэвко вадам’ мер’тохолагуда, тикахад’ ӈани вади’’ тохолаба пягуда’’. Ӈани’ ӈопой илека’ тема – лаханако’’, сюдбабц’’, ярабц’’. Тарцям’ падтабива’’. Маня’’ лаханаком’ падаваць, мал’’ интернетхана ӈамдёда’’ ӈацекы’’ падбидось. Лаханаком’ ӈопой нява’ пядась, ма’’нив’: – Вэсакохо’, пухуцяха’ илевэхэ’… Тикы’ пуд нябир’ тю’, падада: – хардан’ хэван’ харвавэхэ’… Ӈани’ ӈопой падвэда: – тецьдам’ манэ’’ман’ нивы’ харвавы… пухуцянда вахалъй: – Хардан’ хантан’ ӈани’, сими’ нин’ ханаӈгу… Мань’ сит ним’ ӈавлабгу. Таремъв’ нерня паднась, вадаком’ хусувэй интернетан’ тюгна нядабида. Тарем’ лаханакова ямб’ лаханакоӈэ’ хаясь. Тад’ толаба пяӈгур’ ӈань, писяндан’, ненся’ ӈод мэкад’ ӈэсьты.

Корр: Теда пыдар Няръяна маркана мэн’, сидя ю’’ ӈопой покоцяр’, ӈацембой хасавакон’ тарем’ ӈод ёльце’ сававна харт’ вадамд’ мэ’’ӈар’, ханяна пыдар’ тоходансан’? Илеват’ ямбан вадамд’ намдурӈан’?

– Нерде мань’ Санэй Саляна иледамзь’, нюдякоця хардакоця Ямалкана. Нянэй ненэця’’ иле’’ таняна. Тикы’ хардакохона нянэй ненэцяӈэ’ малӈэ’ вадамдо’ мэ’’ӈадо’, лаханакорцеты’’ поӈгнандо’. Тикахад’ хадами’ таня, хадами’ сими’ тохолабсеты, нисями’ танебата нисями’ сими’ тохолабгу. Мякани’ тобнани’ нянэй вадарим’ мэс’’ нидум’. Пуна’ хой’ няку’ хантан’ ӈань нянэй вадарим’ мэт’ нинув’. Ханярина лаханакуртава’’, вадам’ тарем’ тензебтебгу’’ нирув’. Питеркана’ теда иледм’ нянэй вадавна лаханакорцетым’, мякан’ тутам’ хари’ вадаривна лаханакурцетыдм’. Пон’ нибнанд’ лаханакур’, вадам’ юрбась пягур’. Хардан’ нибнанд’ тур’’, вадамд’ юргур’. Петербургхана ӈацекына ӈули’ сава, тохолабидо’ вадамдо’. Няръяна маркад’ товы’’ ӈацекы’’ таня’’ тохолкобнана’’, вадам’ тохоламбада’’. Пыдо’ лаханакурцеты’’, нерняку’ вадам’ пэртадо’. Тикахад’ интернетхана паднабана’’, сидяӈг’’ тикан’ ӈэдтасьты’’, манд’ ним’: – Няръяна маркана теда хад’ миӈа. Тикакоцям’ манэлабтагудо’. Тикахад’ мад’ ним’- олимпиада тюку яля’ ӈась. Ӈани’ ваде’’тадо’, сидяӈг’ масьтеӈгу таня. Тарем’ маня’’ теневаӈгува’’ – хурка сер’’, ханяна танеса’’.

Корр: Мал’’ тикым нянэй вадавна падбидо’?

– Малӈэ’ нянэй вадам’ мэта’’. Ӈопой проблемава таня, клавиатуранана нянэй вада яӈгу, «ӈ» буквава, тасерна’’ яӈгу’’ма’’. Тикана е’’эмня запятой масьтембива, точкам. Тарем’ вадава манэ’’-лабтабива’’. Тарем’ ӈод нина’’ ёльце’ савовна хамадабина’’.