Вы здесь

Сертавэда’’ пили’’ илевнда

И сегодня звучат песни Евгении Соболевой / Фото Александры Берг

Перевод на ненецкий язык

Тюку по’ округханана’’ илена’’ ненэця’’ ханярина Евгения Андреевна Соболевам’ тензебтембиць.

Тарем’ ваеравы ирий’ си’’ив яӈганя яляхана «Арктикам’» нюбета Дворец культуры мякана ма’’люрӈаць. Евгения Соболева илева, манзарава нямна, «Хаяр» ансамбль’ ӈадимдевам ваде’’ӈаць.

Хаювы юр’’ по’ 60-юдимдей похо’’на яханана’’ ненэцие’’ ансамбль’ «Хаяр» ӈадимясь.

1962 по’ вэба ирийхана Няръяна маркана илена’’ хибяри’’ едэй ӈадимы ансамбль’ нертей программам’ манэ’’ӈаць. «Добрый великан» ненэцие’’ вадаковна масебтевы вокально-хореографической композициям’ артистана’’ хибярихи’ манэ’’лабтадонзь.

Тикы пуд’ ансамбльхана тарана’’, хынота’’ нина’’ округ’’мана ӈэдалёрць пядонзь. Хойхана, хусувэй ӈэсыхына сиддо’ маймбась ядабтамбидонзь.

1964 похона Архангельск’ маркана ваеравы художественной самодеятельность’ смотрхад диплом I степени тэвраць.

1965 по’ яра’ ирийхана тандая ӈадимы ансамбльва’’ зональной смотр-конкурсан’ Ленинград март’ тэворӈаць, таняна сидя программам’ – «Добрый великан» няби «Полярное сияние» манэ’’лабтаць.

Сидя ирий’ ваерась Кремлёвский Дворец съездов мякана ваеравы Всероссийской смотр сельской художественной самодеятельности смотрхана «День оленевода» сюитам’ манэ’’лабтаць. Таняхад лауреат’ нювм’ тэвраць. Тарця нюв’ ӈацембой таранаха’ минрена’’ серкана ныхыдамдо’ няданарахась.

1966 похона ненэцие’’ молодёжной ансамблява’’ народной нювм’ ня’’амась. Мале 57 по’’ ямбан тарця нювм’ минресь манзара’’.

«Хаяр» ӈадимдевы, нертей хормейстер Евгения Андреевна Соболева 1938 похона лимбя ирий’ 15 толыркана Нюдя яхана мюсерта тыбэртя’ ненэця мякана соявысь.

Ирида нертей тыбэртя’’ ненэцие’’ колхоз’ председательӈэ таравысь. Тар Семён – тарем’ ненэця’’ поӈгнандо’ нюмдебавэдонзь. Нисяда, Соболев Андрей Семёнович, я’’авлада ненэць ӈэвы, финской сайнормахана яӈгумысь. Небяда, Соболева Мария Алексеевна, вэсаконда хэ’’мяхад харта нюда’’ вадабидась.

– Ханзер’’, сяха’ Евдя хынокадӈэ хаясь, тюку яля’ хибяхарт нида’’ хэтаӈгу’’, – тарця вади’’ «Хаяр» ансамбль’ нертей артист’’ хэтамби’’. – Сайнорма’ по’’ тобнандо’ пыда няхар’’ подась. Хойхана илена’’ хибяри’’ илевадо’ тамальӈгана сибиць нись’ ӈа’’. Тарем’ ӈод’’ ненэця’’ хыноцеты’’, вадако’ мэцеты’’. Евдя небяда’ сававна хынотась. Нюдякоходанда сёхо’ инзелесь, тарцям’ намдурць, сё’’ мэёвна ихинда еримакы. Харвабнанда, тю’’уд товы и’’ӈута ӈэвакы, хибя’’ теда тенева…

1959 похона Евгения Соболева Няръяна маркана манзара пядась. Тарана’’, хынота’’ нита’’ няюв тарабцо’ пюрцеты’’, стих’’, концертато’ сценарий’’ падабасеты’’, харто’ костюмадо’ сэдабасеты’’.

Тикахад Евгения Андреевна хаюпа хаясь, вэсакода Валерий Пырерка, нертей учёной Антон Петрович Пырерка, Наталья Терещенко хасава ню. Валерий, Ленинградхана соявы, нисянда со’’яма ян’ товысь. Округна’’ газетахана манзарась. Валерий, Евгения ӈокавна округ’’мана ӈэдалёрцетыхы’, ӈобкана ненэцие’ фольклор’ падбавэхэ’… манзаяди’ тянё нись’ ӈа’’…

Евгения Соболева манзаяхананда мэбета хибярись. Нерняна сертавндада ихинанда ӈокась. Валакада планда нидаць соя’’. 1973 по’ вэба ирийхана Евгения Андреевна яӈгумась,35 подась.

Тарем’ ӈод’’ пуданда’ хаевэда ӈока. Пыда ансамбляда’ тенад яханана манзара’’. Хусувэй серканда нерняри’’ миӈа’’. Нява’’ тенева’’…