Я’малкана ӈока лаханако’’ теневана’’ хибяри’’ иле’’. Ӈацекы’’ е’’эмня лаханако’’ ма’’лабда’’ харто’ манзаидо’ минре’’. Елена Николаевна Окатэтто’ ӈармбэй не, пыда илеванда ямбан ӈацекы’’ е’’эмня манзарась. Нюдяко’’ ӈацекэхэна манзарана’’ нида’’ нядабись, методистӈэ’ тарась. Ӈацекы’’ е’’эмня падвы книгида таня. «Хаерако ӈобда сера» ӈобтарем’ Елена Николаевна падвы ненэця’’ лаханако. Ӈацекэхэта’’ толара’’.
Ванко хубтахана пин’ тарпы’’. Тюку яля’ Ванко’ нися ӈэвады. Ханота сыри яӈгпи. Тунда пяд сирыби. Ванко’ небя тубкахана пида тэри юпида. Ванко пихина сэврида мэ’’ӈа. Тарем’ сырап’’, хаерако хой маха ни’ мале санавы’’. Нум’ хаця’ тецярка. Танзер’’. Ванко тад сававна сылы’’ – тюкохов няхар’’ хаер’’. Хаерако хэвхана тамна сидя нюдяко хаерако. – Ама’, ама’! – Ванко тёрей’’, – няхар’’ хаер’’ӈэ хэвы. Теда’ нивняв ядев’’.
Небяда ма’’нив’: -Ханерцядаков, няхар’’ хаер’’ ни ӈа’’. Хаерако ӈопой. Сидя хэвхы хаер’’каюда – ӈобахаюда. Няхар’’ хаерм’ манэп’’, ӈарка’’ ненэця’’ манзеты’’:- «Хаерако ӈобда сервы. Нумда тецьхамда». Нернанда Ванко’ ӈудида макананда ӈаць. Тарця вади намдхава, паромбари ӈобда сера. Сянако тынзякоцямда нэкалӈа. Нямдо’ палӈа. Яркола пэй’’: – Кохов, Кохов, Кохов» Харта пал’’мы нямдода ӈока’’я тэӈэ пяйда. Ванко’ хэвувна хуркари’’ хабте’’я’’, тэ’’муй’’ малк’’ вэрна’’. Хасава ӈацекы нисяханда тёрей’’:- Ӈацёв’, ханяӈэмдо’ яркаӈгудм’?!
Нисяда сянакода нюмда тэлабида: – Хэвувнанд ламбэй хабтея тута. Ӈули’’ нёр ӈэдарабта’’. Нябимдей помнани’ ни тут’’. Мань Сёрнохонани’ таб’’лаӈув. Ванко нисянда ня’ тынзь пэйха’. Хасава ӈацекы тынзянда сано’’ӈада.Ӈоб сюрамба тынзянда сыра ниня Паллада нямдаха’’ мода. Мярада нямдо’ ни’ лехэбтэй’’. Ӈопой ламбэй пыялём’ Ванко нянда нэхэдада. Ӈопой тёрда: – Ӈацёв’, ламбэй хабте’’ям’ яркав!
– Ханханд’ сярад, – нисяюм’ ма. Яля ямбан’ Ванко мэ’’манда тэдамда яркыби. Паромби. Хаеракон’ сыласеты’’, манзеты: – Хаерако, тедамбой’ хой маха тяха’ нён пакал’’! Мань ӈэдалёрман’ харвадм’!
Нисяда хасава нюхунда маси’’:- Ванко, паромбарка’’! Ӈэдалад’’!
Хасава ӈацекы сянако мэта тюрамда ня’’ма. Ханаконда ни’ ӈамды’’. Тёрда ӈадимя. Тыда харейда. Хаерако ну ядхана тэри пэсьда.
