Ты’’ сие ниць ирийна тетимдей толыркана Няръяна маркана «Мюдм’» нюбета – луца’’ вадавна «Аргиш» кинофестиваль манзаямда нэдась. Тарця фестиваль’ яханана нюртеймэвна ваерась.
Этнокультурный центр’ ненэцие’’ отделкана манзарана’’ нина’’ ӈэрм’ тенз’ ненэцие’’ ила’ нямна кином’ сертабада’’ хибяри’’ округна еркы март’ ма’’лась идэйдаць. Пыдо’ сян’’ яля’’ ямбан маркана манзараць. Хусувэй товы хибяри харта сертавы манзаямда манэ’’лабтабись, ваде’’ӈадось: ханзер кином’ сертамбавахана манзараць. Ямалкана сертавы’’ манзая’’ таняць. «Мынеку» студияхана манзарана Михаил Коробов мультипликационный фильм’ сертабада. Пыда Няръяна мар’ педколледжхана тоходанна’’ е’’эмня мастер-классм’ манэ’’лабтабись. Таняна тоходанна’’ компьютеркана мультфильм’ сертабась тоходанаць. «Илебц» нюбета студияхана сертавы манзая’’ таняць. Михаил Окотэтта Ямал’ няна илена, пыда кином’ мюсерта’’ ненэцие’’ ила’ нямна сертавысь. Тикахад’ пэдара ненэць’, паднана Юрий Вэлла нямна сертавы кином’ манэ’’ӈаваць. «Последний монолог» нюбета этно-документальный фильм’ Сургут маркад’ Ольга Корниенко тэврась. Юрий Вэлла пудана вади’’ намдаваць. Пыда няна’’ лаханась маля вэвко’ хабцяӈгана хаӈгурмамда теневась. Тасалкусь: ӈамгэ е’’эмня хибяри сояӈга, я’ни турӈа? Ӈамгэ е’’эмня иле? Илеванда и’’ӈуда хурка, ханзер илевамда мэ’’ӈада? Ӈамгэ’ пуданда хаюда?
Ямда’, илм’ мэнена нява хайлада хайнась тасалкусь!
Тамна сеян’ ериворта’’ манзая’’ ӈокаць, тикы нямна вадина танеӈгу’’. Ольга Ефремовна Латышева тарця вади’’ хэтась: – Сян яля’’ ямбан яханана фестиваль’ манзарась. Тюку ирий’ тетимдей яляхана няӈгартабиваць. Ямал’ няӈэд’ тобэй хибяри’’ таня’’, Москва’ тер’’, тикахад Норвегияхад’ мядондина’’ таняць. Нюртеймэвна Нярьяна маркана тикы ма’’лёр’ сертаваць. Яна е’’эмня, маня’’ е’’эмняна ӈарка сер’ ӈэдарха’. Ханзер’’ фестивальва ваераӈгу, нерняна ӈадьгу. Тикахад’ переӈгу – тамна сертабаӈгува’’ кинофестивальм’, нива’’.
Ӈэрм’ тенз’ ненэця’’ ӈод харто’ манзаидо’ манэ’’лабтабиць. Ямал’ няӈэд’ Михаил Окотэтта товндась, валакада тось’ нидась’ пирас’’. Сертавы манзаида яхана тэврэйдось, манэ’’тыдо’ хибяри’’. Мал’’ кино’’ Няръяна мякана яля’ ямбан манэ’’лабтабидось, ӈока хибяри’’ манэ’’ядонзь.
