Округна толаӈго’ хардахана ӈэрм’ ненэцие’’ отделкана маня’’ сидна’’ етри’’ ма’’лабсеты’’. Тарця мякана манзарана’’ нина’’ хуркари’’ сейхана сомбой мероприятия’’ хамадабсеты’’. По’ ямбан маля сян’ таняюв’ турцетыва’’.

Тюку ирийна сидя яӈганя’ толыркана ӈод’ тарем’ ӈась. Маркана илена’’ ненэця’’ библиотекахана ма’’лэйдаць. Тюкумэвахана Зоя Степановна Ивакилева ненэця’’ вадавна паднана’’ хибяри’’ нямна ма’’лёвам’ хамандась. Нянэювна ненэця’’ вадавна паднанина ӈока ни’’ӈа’’. Ӈарка паднана нина’’, хуний невхы похо’’на илець, падвы манзаидо’ хаи.Тарця ненэця’’ поӈгана нюмдеӈгум’ Николай Вылкам’, Прокопий Явтысый, Василий Ледков. Я’мал няна мэёвна паднана Леонид Лапцуй илесь, Таймыркана Любовь Неняӈг. Малӈэ’ нянэй ненэця’’, хари’’ вадавнандо’ лаханаць, паднаць. Луца’’ вадавна паднась’ ӈод мин’’ӈаць.

Тены’’ похо’’на ӈод паднана нина’’ ӈадимберӈа’’, ненэцие’’ вадавна паднана’’ ӈод таня’’ма’’. Маркана «Заполярьем’» нюбета литобъединениева’ таня, паднанина ӈобт’ ма’’ламбада. Маня’’ нина’’ падвы стих’’, рассказ’’ ханяна толабасьтына’’. Ненэцие’’ вадавна паднана’’ Лукерья Валей, Галина Тайбарей, Матрёна Талеева, Серафима Дуркина. Паднаван’ харвана ӈацекына ӈод вадюдана’’.

Ваеравы си’’ивна пудана яляхана ӈарка хэхэ’ хэбидя ялясь, ханярина илена’’ хибяри’’ Пасхам’ ядтабиць. Ӈодьбянда’ харвабнанда толаӈго’ хардан’ товы’’ хибярина ӈока’’ нивакы’’ ӈа’’. Тарем’ ӈэбнанда ӈод, ваеравы мероприятиева сававна ваерась. Хибярина сюртяв’ тол тяхана ӈамдёсь лаханакурӈаць. Яханана ненэця вадавна книга’’ падбава’ хавна тамна учебник’’, хуркари методической литературам’ падбада нина’’таня’’, хуний саць ӈарка манзаям’ сертамби’’. Маня’’ вадана нерня илева’’е’’эмня, нерня танева е’’эмня вадам’ тохолабась’ тара. Тарця манзаям’ пэртина ӈоб таня’’ма’’. Тамбир’’ манзая’ ӈоб незелта яӈгу. Ӈопой тарця манзаи’’ пэртя нява Роза Ивановна Канюкова. Сямянд’ нерде пыда Анатолий Рожин букварьм’ несэювна падась. Тикы’ пуд ӈадимы манзаида маля ӈока’’. Манзараванда’ ямбан тикы нява округна школахана манзарана’’ тохолкоди’’ нядабада’’. Теда ӈод’ ида пилибт’ ненэцие’’ вадам’ тохоламбава нямна няркна’’. Ханзер’’ тены’’ похона вадам’ ӈацекэхэ’ тэврась? Ибедорцеты. Небой по’ Роза Ивановнахад’ округна школахана тоходанна ӈацекы’’, манзарана’’ тохолкода’’ тамна ӈопой ӈарка манзаям’ ня’’амаць. Тикы тарця комплект’: «Ненеця’ вада. Ненецкий язык 2 класс», рабочая тетрадь – « Сянако тоходанава’’. Учимся играя.», «Паднава» -прописи. Ханзер’’ манзаида падбида – тикы нямна толаӈго’ хардахана ма’’лёвана мальӈгана Роза Ивановна лаханась. Ненсянда ӈод, тарця серм’ минрева сибиць манзая’ ни’’ӈа’’. Ӈодьбянда тарця манзаи’’ сертабадина ӈод ӈока’’ вуни’’ӈа’’.

Мероприятиян’ товы хибяри е’’эмня Роза Ивановна мастер-класс хамандась. Хибяри «Х» букван’ вади’’ хомбиць. Тарця вади’’ хось незел нись’ӈа’’. Тюкумэвахана товы’’ ненэця’’ ӈокаювдо’ вадамдо’ ехэранаць, ӈацембой пирибцяко таняць, наны. Ӈарка хибяри’’ поӈгана Галина Артеева, Галина Ардеева ассоциация молодежной отделение’ ӈацекы’’ нерня пэртя, ӈацембой хибяри’’ тэврась товысь. Пыда’ нянда Роза Ивановна мядонзэйӈэ’ харта падвы манзаямда ми’’ӈась. Нерня миндя’’ ӈацекына вадамдо’ тохолабвандо’ е’’эмня.

Тарця ма’’лёвава толаӈго’ хардахана ваерась, савась, мэкадась.