«Самодийский эпос» таремъюв нюмдевы книга’ яханана ӈадимя. Тарця манзаям’ падтаӈгода Надежда Выучейская хамадась. Надежда Алексеевна Выучейская маня’’ яна’ тер не.
Округханана соясь, тюкохона тоходанась, тюкоход’ нерня тоходанвась’ хаясь. Падтаӈгова серм’ нюдякоданда харвабтадась, тамна школахана тоходанванда мальӈгана падтавы’’ манзаида сава ӈэсьты’’. Школамда ёльце’’махаданда падтаӈгова серт’ тоходанась. Тарем’ маля ӈока по’’ ямбан падтаӈговам’ манзаяӈэ’ мэ’’ӈада, сертавы манзаида маля ӈока. Тедахова Надежда Алексеевна ӈарка падтаӈгода, пыда нюмда ӈока хибяри’’ теневадо’, пыда манзаида ӈока ям’ манэ’’мы’’. Н.А.Выучейская – падтаӈгода, луца’’ вадавна манзь: профессиональный художник, харта мэбебцомда мэта падтаӈгода. Хусувэй падвы манзаяда сейхад’ сертавы, илм’ манэ’’лабтамби. Тарця манзаи’’ маниесь, ир’ иланд’ нямна ядэлаӈгу’’, харт’ со’’явы ямд’ несэювна маниенархан’ ӈэӈгун. Надежда Алексеевна падвы манзаида тянё ни’’ӈа’’, манзаида округна музейхана таня, ӈани’ я’ тер хибяри’’ маниейдо, тэмдамбидо. Пудана’’ похо’’на падтаӈгода нява несэювна манзаямда минресь’ пянархада. Книги’’ падтамби’’. Нюртей’ падтавы книгада «Ненецкий эпос», таняна ненэця лаханако’’ ӈобт’ ма’’лавы’’. Нябимдей падтавы книгада «Мне вспомнилось детство» Алексей Ильич Пичков падвы. Тамна ӈопой сертавы манзаяда «Самодийский эпос». Тарця книга нянэй ненэця’’, нганасан’’, энец’’ историям, культурам, традиции манэ’’лабтамби. «Самодийский эпос» книга Няръяна маркана сертавы, сидя ёнар’’ няхарамдэй’ яӈганя похона тарпыць. Тарця книгам’ сертава е’’эмня есям’ Заполярный район’ программавна хоць. Едэй книга саць сававна сертавы, падарта сомбой. Тарця книгам’ ӈудахана нямбась саварха. Книгам’сертабавахана ӈока хибяри’’ манзараць.
Сидя мэбета, ныхыта нехэ’ ӈобнзер’ сертавы манзая, тикы Н.А. Выучейская, М.Я. Бармич. Мария Бармич округханана теневана хибяри, филолог, учёной. Пыда нганасан’’, энец’’ вадавна падвы’’ лаханако’’ луца’’, ненэця’’ вадан’ сертэйдась. Мария Яковлевна тарця сомбой книга е’’эмня сидя ю’’ няхар’’ лаханаком’ ма’’лась – сидяяӈганя ненэця’’ лаханако’’, мат’’ нганасан’’ лаханако’’, самляӈг энец’’ лаханако’’. Надежда Алексеевна книгам’ падтадась, сидя ю’’ няхар’’ манзаямда книгахана маниева’’. Тарця манзаям’ сертабавахана нядаӈговы’’, хуний хибяри’’ вада’’ книгахана таня, тикы А.В. Безумов, А.И. Дуркин, Л.Ю. Корепанова, луца вада редакторӈэ’ Е.И. Вергунова тара, ненэця вада редактор’ О.Е. Латышева, Т.И. Кузнецова ответственный за выпуск.
Тарця паской, сававна сертавы манзаям’ округна хибяри’’ ня’’ама, хуний ӈарка хибяри’’ толабаӈгудо’, нянандо’ мэкадарха’; ӈацекэхэна саварха’ ӈэӈгу’’. Пыдо’ ӈэрм’ ненэцие’’ ила’ нямна ӈока несэй ӈамгэм’ намдгу’’. Манэ’’тадо’ сямбирувна ненэця’’,нганасан’’, энец’’ няхататто’ яӈга’’.
Тарця книга’ презентация округна толаӈгова’ хардахана ваерась. Тамальӈгана Н.А.Выучейская ӈока ихиня сомбой вади’’ намдась. Вадам’ мэ’’мы поӈгана О.Ф. Каменева, А.В. Безумов, А.И. Дуркин, Л.И. Дуркина, А.В. Дитятев, Е.А. Езынгова.
Презентациям’ хамандавы Мария Николаевна Казакова, нянда ӈарка вада!
