Вы здесь

Тарця ялява таня

Саво ирийна сидя яӈганя’ толыркана маля сидя ю’’ сидя по’’ ямбан тамна ӈопой хэбидя ялям’ мэ’’ӈава’’ Россияна яля – День России. Тарця яляхана округна хибяри’’ ныланаць.

Тюку по’ тарця ялява ибкаця таӈы ялякоӈэ’ ха’’мыць.

Маркана илена’’ хибяри’’ ныланавась Марад’ сей нюбета площадян’ ма’’лэйдаць. Тикы яляхана хуркари сава сер’’ таняць. Сё’’ мэта хыно’’ӈаць, тарана’’ тараць, мирдатна харто’ манзаидо’ пэрӈаць. Пихиня ханярина Россия’ лабак минарта’’ хибяри’’ ӈадиберӈаць. Россия’ яляхана сейхад’ миндя’’ вади’’ ервуна хэтаць. Маня’’ округна ӈэвахана мэнаӈэ’ тарана Игорь Кошин лаханась, пыда тарця вади’’ мэ’’ӈась: – Тюку яля’ яханана илена’’ хибяри’ Российской Федерацияна паспорт’ ня’’амаць, пыдо’ теда яна’ тер’’. Мал’’ пыдо’ Крым’ нюбета Респуликахана соявы, теда тикы я’ Россия’ сиднтет ю’’ тетимдей регион. Ӈарка ява ӈарумдана, вадюдана, маня’’ округва ӈод’ нерня миӈа. Тарця хэбидя яляхана нянда мадм’: малӈэ’ сензда ӈада’’, сайнорма яӈгоя’’, яна’ нерня вадюданва е’’эмня манзарась ныхыда нёда’’ сяй’’.

Марад’ сей нюбета площадьхана хибяри’’ ӈокаць, хусувэй сава ихиня ныланавась’ товысь. Ирина Николаевна тарця яляхана нюртеймэвна маня’’ марканана мэ, хэбидя яля’ ед тарця вади’’ хэтась: – Маня’’ Россияна илева’’, тикы маня’’ ява. Тюку ялям’ мань ӈарка яляӈэ’ тасламбив. Сававна ныланада, ямда сахарамбась иледа, манзаида таняя, сайнормась ехэрась ӈоб’ нерня илехова’’!

Округна ӈэсыхына илена’’ ӈод Россияна яляхана ихиня сомбой программы’’ хамадавыць. Хусувэй ӈэсыхына концерт’ ваераць. Ханяӈы ӈэсыхы’ Няръяна маркад’ мядонда’’ тэворӈаць, хуний сё’’ мэ’’ӈаць, таранидо’ тарабцодо’ манэ’’ла-бтаць. Этнокультурный центр’ манзаранина’’ тюку по’ округна ӈэсымна ӈэдалёрӈаць. Вискан’, Хонгуреян’ тэворӈаць. Тарця сер’ ӈэсыхына илена’’ хэбидя яляӈэ’ тасладонзь.