«Пунушкам’» нюбета журнал’ округханана маля ӈока по’’ ямбан ӈадимберӈа’’. Ӈацекы’’ е’’эмня тарця журналм’ этно-культурный центрхана манзарана’’ нина’’ сертамбидо’.

Таняна ӈэрм тенз’ мэта ненэцие’’ ила’ нямна хуркари’’ мэкад’ сер’ падбасеты’’, мел’’ хибяри’’ харто’ сертабада манзаито’ нямна вади’’ мэцьты’’, хуркахова манзаям’ сертась тохолкосьты’’. Паднана’’ ненэциена падвы’’ манзаи’’ тикахана толабасьтыва’’. Илан’ мэёвна сырта’’ ӈацекы’’ таняхад’ торомдасьтыва’’. Ханяӈэна округна школахана тоходанна’’  ӈацекы’’ таня паднасьты’’, ваеравы серудо’ ваде’’цеты’’. Тарця журнал’ ӈатесетыва’’. Похона сидя тарця журнал’ тарпсеты. Ӈокханда си’’ив юр’’ экземпляр’ ӈэсьты. Тюку ирийхана едэй номер’ тарпыць, презентацияда хаювы’’ яля’’хана этно-культурный центр’ мякана ваерась. Ӈокаюв’ тюкумэвахана презентациян’ товы’’ хибяри’’-  ӈацекыць, хуний школанато’ площадкаха’ ядэрӈа. Нянэювна ӈацекына журнал’ ӈэ’’нив. Журнал’ сертабада’’ ваде’’ӈадось: ӈамгэм’ тюкумэвахана ӈадимы журналкана толаӈгу’’. «Илебц» ненэцие’’ театрхана сянакода’’ нина’’ ӈацекехэ’ ненэцие’’ вадаком’ манэ’’лабтаць, тадебя сём’ намдаць. Тикахад’ ӈацекы’’ сянакуць.

Тикахана ӈацекы’’ сававна нылэйдаць. Едэй журнал’ округна библиотекахана хова’’ пир ӈэӈгу. По’ пеля ваерась несэй ӈацекы журнал’ ӈадимда’’.