Вера Ивановна Ледкова ӈарка яхана соявы не. Варандэйхана илесь, тоходанась. Варандэй харта яда. Таняна илевы’’ хибярида мал’’ теневыда. Ӈэсымдо’ тал’’махад’ таняна илевы хибяри’’ март’ тэврэйдось. Ӈокаювдо’ тюкохона илесь тенад’ манзаяси’.
Ханяӈыдо’ хусувэй та’ харто яхандо’ тэворӈа. «Варандэй» нюмдевы ТОС нэць, ӈарктадо’ Вера Ивановна Ледкова.
Корр: Вера Ивановна, пыдар ТОС ӈарктаӈэ хурка манзаям’ пэрӈан, сян хибяри’’ теда Варандэй няна теда иле’’? Пыдар’ сян хибярим’ несэй манзаян’ лапцетенась – тикы нямна сян вадам’ хэт.
Ледкова: - Варандэйхана ТОСва маля ӈакуй по’ таня, маттамдэй пова. Варандэна хибярина иле’’, юд’ мян хибяри’’ пили’’ танесеты’’. Та’ мальӈгана семьясавэй хибяри’’ ядэрӈа’’. Вертолетхана тосьты’’, нефтяник’’ня сер’’ таслабэй. «Варандэйский терминал» нядаӈгу.
Тикахад’ ханяӈы’’ хибярина манзаравась’ таслабэй’’. Таняна манзарана’’ ӈока’’, хуркари’’ организация’’ таня’’. Тюку по’ самляӈг хибярим’ «Газнефтестроен’» таславаць, пыдо’ нефтепровод’ сертабава няна манзара’’. Маня’’ нина’’ таняна манзара’’. Савовна манзара’’. Мань’ юнрасьтым’: ханзер’’ маня’’ хибярина манзара’’? Ма’’ним’: савовна манзара’’. Таняна манзаранина’’ малӈэ’ ӈацекэрка, ӈопойдо’ валакада ӈаркамбой хасава. ӈопойва Славиква семьясавэй, Колява ӈэрё армиян’ ханта. Манзарась договорто’ ёльцеӈгу’’, нина’’ март’ тута’’.
Корр: Пыдо’ таняна ханяна илета’’?
- Пыдо’ вахтавой поселкана иле’’. Варандэхэд’ тет ю’’ километр’ ӈэдакы. Варандэна хардадо’ таня’’. Тет харад’ Варандэна, таняна иле’’. ӈани харад’’ мал’’ тахабтабэй’’.
Корр: Нефтяник’ хэвхана манзарана’’ хибярина специальностядо’ таняса, пыдо’ тоходанса?
- Маня’’ хибярина специалист’’ ни’’ӈа’’. Луца’’ вадавна манзь: не требующие специальной подготовки. Няндо’ манэ’’лабтадось: хурка манзаям’ сертаба’’ тарагу’’, ханзер’’ сертабада тарця манзая. Маня’’ нина’’ манэ’’ӈадо’, теда тарця манзаи’’ сертаби’’. Изолировщикӈэ’ тара’’. нефтепровод трубам’ тоетамби…
Луца’’ манзаямдо’ сертаби’’, нефть’ яхад’ ӈэкалпи’’. Маня’’ ӈани хар’’на’’ серуна’’ тасламбива’’, тикахана илева’’. Сидна’’ тарабнанда нядабасьты’’, нись’ пое’’лахарамбю илева’’.
Корр: Варандэй’ няна та’ мальӈгана илебнанда ӈавар’’ ханяд’ пэрӈада’’; тикахад’ ня’’амвы’’ халямдо’ ханя хибярида ханабидо’?
- Лавкахава яӈгу. Едэй Варандэна столовой таня, буфетадо’ таняна таня. Маня’’ хибярина Невхы Варандэд’ таня турцеты’’, таняна таранадамдо’ тэмдабасьты’’. Нина’’ ӈаврадамдо’ таняхад’ пэрӈа’’. Мире’’пата ӈод тэмдабасьты’’. Харна’’ ӈэсынана ӈамгахэртава яӈгудак. ӈэсыва таневы ӈэбнанда лавка' танеӈгусь, пекарня’ танеӈгусь, харна’’ няньм’ ябцабаӈгуваць. Теда хусувэй таранава таняна тэмдабива’’. «Ависта Сервис» няюв’ серуна таслабэй.
Корр: Хибярида маркад’ хэбэй, тюкона ниць’ манзара’’, ӈамгэ есяхана тэмдорӈата’’?
- Пыдо’ халям’ ня’’амарпасьты’’, тикахад’ ханисэй’ танесеты’’. Ябтом’ ня’’амгу, тикахад’ ӈавран’ меняйбидо’. Ханяӈэна ханисэйм’ мирдатадо’, есям’ хоӈгу’’ тарем’, буфетан’ ханта’’ – ӈамгэ тара тикым’ тэмдаӈгу.
