Россия яханана хуркари’’ тенз’ мэта хибяри’’ иле’’. Хусувэй тенз’ мэта’’ харто’ илесь ядо’, харто’ вададо’, харто’ культурадо’. Хуркари’’ тенз’ ненэця’’ паднанидо’ таня’’. Россиянана финно-угорский тензхад’ перена’’ паднана’’ харто’ ассоциациямдо’ сидя ёнар’’ няхарамдэй похона ӈадимдедонзь, тамальӈгана нюртей ма’’лёвамдо’ мэ’’ӈаць.

Паднава’ серм’ минрена’’ ервамдо’ тэраць, тикахад’ Советхана манзаравндидо’ нюмдець. Тарця ассоциация’ маля ӈоб’ яӈганя по’’ ямбан манзаямда минреда. Таӈок по’’ ямбан финно-угорский журналист’’ ( паднана’’) ассоциация’ манзаям’ нерня Александр Абдулов минредась. Йошкар-Ола маркана «Марий Эл» нюбета газета редакторӈэ’ тарана, газетадо’ марийской вадавна ӈадиберӈа.

Мордовия, Ӈысма’’, Татарстан,Чувашия, Карелия, Пермский крайхад’ товы’’ журналист’’, полиграфия’ серм’ тасламбада’’ хибяри’’ харто’ ассоциацияндо’ ӈэвахана мэнадамдо’ тэраць.

Маля ӈоб’яӈганя по’’ паднана’’ ӈобкана ма’’люрць, манзаянандо’ танеда’’ серудо’ тасламбидо’. Ханярина илена’’ хибяри’’ харто’ яханандо’ илесь харто’ вадавнандо’ газеты’’, ӈацекыто’ е’’эмня журнал’’ сертамби’’. Теда маниесь, финно-угорской вадавна падбада’’ газета’’ толыр’ ӈокамдана. Финно-угорской’ тенз’ мэта хибяри’’ харто’ вадамдо’ теневаван’ харвадо’, невхы иламдо’ тохоламбидо’, культурамдо’ нерня пэрӈа’’. Тарця сер’ тамна нерня мима’’ е’’эмня журналист’’ манзара’’.

Йошкар -Ола маркана паднана’’ маттадамдэй форумхана финно-угорской журналист’’ ассоциация’ серм’ нерня минренаӈэ несэй хибярим’ тэраць. Тад’ нерня таняна манзаравнда, нида нерня минревнда Николай Ишуткин. Пыда Мордовияхана иле, «Чилисема» ӈацекы журнал ӈарка паднанаӈэ манзара, член Союза писателей России, член Союза журналистов России, РМ культура заслуженной манзарана. Мат’’ ю’’ пода.

Паднава серкана ӈахэт манзарана, финно-угорской тенз’ мэта’’ ненэцие’’ ассоциацияхана нюртей яляхад’ манзара.