Округханана тарця ӈацекына таня’’, хуний нисянадо’, небянадо’ выӈгана мюсерць иле’’, пыдо тэхэ’’на мэна’’. Тарця ненэцие’’ ӈацекыдо тоходанвась хахаяда ӈэсын, ханяӈы март’ тэворцеты’’.
Тикахад тохолкова по’ ямбан мят’ нисьты’’ тэвор’’. Валакада таӈы ныланава ёльцьхана нисянато’, небянато’ хэван тэворцеты’’. Тюку по ӈод нара ӈацекы’’ хоян ӈэдалэйдаць. Теда ӈани тоходанва ёльцян’ тэвась ӈацекы’’ тоходанва хардан тэврамбидось.
Округханана пилю’’ ирий сидя ю’’ самлязимдей яляхад хойхана ныланавы’’ ӈацекы’’ тоходанва ӈэсыхыто’ тэво’’лэйдось. Тиртя’’ӈано тирӈаць. Тарця манзаям’ Заполярный районхана минредо’. Районхана управление образования манзарана’’ тасладось: ся’’ня, ханяхад ӈацекы’’ хосеяӈгудо’. Вэба’’ирий нюртей ялян’ СПК «Ерв», «Харп», «Заполярье», «Восход»; СХПК НО «Канин», Нюдя я’ семейно-родовой община’’ вындер’’ ӈацекы’’ тоходанва яхато’ ёльцянда тэвыдаць. Бугринохона, Выучейскойхана, Индигахана, Усть Карахана тоходанвда ӈацекы’’ хойхад’ товнда ныланава’’ яляхана тэвраӈгудо’. Вэба’’ирий самлязимдей толыр’’ ӈэсонд хусувэй хойхана ныланавы ӈацекы’’ тоходанась яханда тэвравы ӈэбнанда тара. Ӈацекы тэво’’лана тиртя ӈанохона округна ӈэсыхы маркад нюртей по школан товы ӈацекы е’’эмня мядонзэйм’ тэврамби, ӈэсыхына тарана техникам, тамна ӈани тарана ӈаво.
Тарем’ ӈацекына тоходанвась хусувэй по тэво’’лабсетыдо. Нарэйӈэ’ хэсь таӈы ныланава ёльцян тэвась, хойхана мюсерта ненэцие’’ нюкцидо’ тиртя ӈанохона нисянато’, небянато’ хэван ӈани тэвраӈгудо’. Хой’ тер’’ ӈацекы’’ выӈгана ныланавам ёльце харвабтадо. Тикы сава сер’ ӈэ’’ нив, тарця ӈацекы’’ ты’’ тенева, хой илм’ торомдамби. Вадёсь, пыдо хойхана ты’’ пэртяӈэ таравнда’’.
Иринана’’, нисянана’’ минревы’’ ил’ ёхобнанда вани’’ тара’’, нерняна илевндаха’ хаебнана’’ тара’’. Теда ӈацекына хоян’ тэворпато’, пыдо’ хой’ илм’ нидо’ пилют’’, теневаӈгудо’. Не’’ ӈацекы’’ теда небянадо’ нядабась мядм’ манзаи’’ торомдаби’’; хасава’’ ӈацекы’’ ӈани’’ хусувэй хасава манзаям’ пэрць тоходана’’. Хойхана таӈы’ мальӈгана илевандо’ ямбан ямдо’ ӈод торомдаби’’, мюсерць сехэрыдо’ теневаӈгу’’.
Хойхана мюсерта’’ хибярина ӈод’ ӈацекыдо’ тоходанвась харвась ӈэдарабидо’, хамадабидо’ – тохолкова ӈарка сер’, падарм’ теневана хибярина илесь’ незеларка.
