Вэба ирий’ сидя юдимдей яляхана Няръяна маркана «Арктика» КДЦ мякана сомбой выставкам’ нэць. Тарця выставкан’ товы’’ хибяри’’ саць ӈокаць. « К созданию чуда сердце приложу…» выставка’ таремъв’ нюмдевысь. Таняна ма’’лавы’’ хибяри’’ тянё ниць’ ӈа’’.
Хуркари’’ тенз’ хибяри’’ харто’ ӈудаханато’ сертавы’’ сянакудо’’ манэ’’лабтаць. Нянэй ненэця’’ ӈухуко’’ таняць. Маня’’ мел’’ нина’’ манзаи’’ таӈок сянако’’ поӈгана’’ маниесь ихиня’ савась. Нина Ивановна Баркулёва нюртей выставкада ни’’ӈа’’, пыда сэртавы манзаида тюку’мэвахана ӈод’ таняць.
Баркулёва: Мань нисяв Холгов’ терась Ледков Иван Михайлович, ӈодьбянда мань’ тарця семьяком’ сертамась. Тюкона пады: род Паханзеда. Небя’ хасавав Федосья Николаевна Ӈарка яхад’ ӈась, тенза Выучейскоясь. Тюку семейкав’ ӈань – род Выучи.
Маня’’ хойхана вадювэва’’, таняна илебна ӈацекэӈэ’ ханява’’ сянаку’’. Лавкад’ тэмдавы’’ сянако’’ тане ванься, ӈухуковада сэдбасьтыва’’. Сэрако ябта’ пыя, тикы ӈацембой хасавако ӈэӈгу. Ӈарка ябто’ пыя ӈэбнанда, тикы ӈармбэрка ненэця ӈэӈгу. Пыяда’ париденя’ тиртяко тикы ӈани’ ӈармбэй не ӈэӈгу, пыяда’ тасейко пирибцяко ӈэӈгу. Сеӈгбя’’ пыякоця не’’ ӈэсьты’’, ябто’’ пыя’’ хасава’’ ӈэсьты’’. Тарем’ таслабсетына’’. Сянакосьтыва’’, ӈухуко’’ сэдгува’’, тикахад’ хандамдо’ сертаӈгува’’, мюсерта’’. Мядомась тамна няю’ ӈэсын’ ядэртава’’. Мань’ ӈэсыв’ тюкохона нуӈгу, мядоманзь нябю мят’ ханцетыва’’. Хойхана илена’’ ӈацекэӈэ’ ӈамгэм’ маниесавата? Нябю мят’ ваданда хантава’’, ваданда тамна ӈэвтавась ӈэдалёрцетыва’’. Илевава саць мэкадась, савась.
Корр: Ӈацекы’ сян понанда маля сянакомда сэртабась тухусеты? Небяда, нисяда нядабасьтыда?
– Ненэця’’ хасава’’ ӈацекы’’ тохолабсеты’’, хасава ӈацекы нисянда’ хэвхана ханком’ серта тоходансеты, тынзям’ паӈгалпа нисяда’ тохолабгуда. Не ӈацекы небянда’ хэвхана самляӈг понанда нибям’ ня’’амбаӈгу маля. Мань’ ӈань мер нибяв’ ня’’амбась тухумась. Небяв’ пендуй’ хобакоцям’ тата ӈань’, масьты: сянакот’ пиваха сэд’’. Сэду’’вон’ нисьты ӈадибер’ ӈани ярцетыдм’. Масьты:- нён яр’’. Сэдъюд’ ӈадимда, тухудан’ сэдорась. Сими’ нядабасьты. Тарем’ янамбовна тухум’. Ивнян’ саць тохован’ харвасетыдм’. Сяродась ӈобтарем’ теневадм’. Валакада, сяродава’ сер ивнян’ ни’’ӈа’’. Сэдараваха’, пилибт’ сэдорасьтыдм’, пий ямбан сэдорась пир’’ӈав’.
Теда ӈэ’ се сэдбасьтыдм’, сянако’’ сертабасьтыдм’. Тюку яляхарт’ бурки’’ сэдбидамзь.
Корр: Тюку яля’ тюкохона хуркари’’ сянако’’ таня, ихинят’ тарця сер’ хуркарха? Нида’’ манэць поӈгнанда лаханасьтыда?
– Ханява’’, нина’’ манэць лаханормава’’ тянё нисьты’’ ӈа’’. Хуркари’’ я’ тер’’ тюкохона ма’’лы’’, Ӈарка я’ тер’’ харто’ сэдородо’, Нюдя я’ терӈэ’ хар’’на’’ сэдорона’’, Канин я’ тер’’ тамна ӈани’ тензарка’’. Сян’ тенз’’ сянако’’ таня’’. Хуркари’’ тенз’ хибяри’’ сертавы’’ манзая’’ ӈоканё’’. Ихинян’ саць’ сава ӈоб.
Сянако’’ манэ’’лабтабава выставкахана хуркари’’ тенз’ хибяри’’ сянако’’ ӈокаць. Хуркари’’ я’ тер’’ таняць. Мастер –класс таняць. Выставкан’ товы’’ харвана’’ хибяри’’ сянако’’ сертабась ӈудидо’ мэта’’ хибяри’’ тохолабиць. Елена Киприяновна Чудинова маркана илена не. Пыда маля ӈахакуд’ «Мел’’ не’’» кружокан’ ядэрӈа’’. Таняна ма’’люрта’’ не’’ сэдора’’. Пыдо’ сертавы’’ сянакудо’ ӈани’’ таняць. Елена Киприяновна няюв’ лаханамась.
Корр: Елена Киприяновна, тюку выставкахана пыдар’ сянакуд’ таня’’?
– Мань’ сянакун’ таня’’. Тямда тюку’ хасавако, тюку’ ӈани’ ханена’ хасава, марцяханда нохо, ханисэйм’ хадавы. Нянэй ненэця ембдяр’’ мэ’’ӈа’’.
Нюдяком’ ӈэбнан’ ханям’ сянаковэм’ ӈа’’. Манзарабнан’ нисьтыдм’ сэдора, теда пенсияхана мэдм’, сэдорава манзаяв’ нив’ ӈа’’.
Корр: Сэдорась’ ханяхад’ тохосан’, тохолкодар’ хибя?
– Хойхана илебэям’, сэван’ нюдякодан’ сэдорани’’ маниець. Вадёван’ сер’ харн’ ӈамгахэвам’ сэдась харвялываць. Небяв’ масьты: тикар’ тарем’ сертабая, тюкор’ тарем’ сэдбая. Тарем тухум’. Теда сянако’’ пирувна сэдорасьтыдм’.
Тарця выставкахана таӈок манзаи’’ маниесь, майбим’. Няно’’ ӈока сэдорана’’ ӈэвы’’. Лавкахана тарця сянако’’ яӈгу’’ ним, ханяхартахана нин’ тэмдаӈгу. Хэвняхад’ товы’’ хибяри’’ ӈод манэ’’тыдо’ – тякуй похо’’на маня’’ хурка сянакохона сянакуваць. Ӈухукутсетыва’’.
Ӈухуко’’ выставка’ вэба ирийна сидя ю’’ си’’ивумдей толыр’ ӈэсонд’ манзаравнда, харвана’’ тамна манэць’ пиртыдо’.
