Няръяна маркана ӈока’’ мел’’ хибярина иле’’. Ӈудидо’ мэта нина’’ хурка манзаи’’ валакада ни’’ сертамбю’’. Хибяхова сэдорава серкана мэбе’’ӈа’’, хибяхова сяродова серм’ харвабтана’’, хибяхова ӈухукомна сэдоравам’ пэрӈа’’.
Ӈопой вада’, манзаям’ пэрман’ харвана хибярир’ сяӈгарт’ ӈопой яхана ни’’ хасенаӈгу. Тарця хибярир’ пилибт’ пэртя манзаянанда нердеван’ харваӈгу, тикы’ хавна тамна сейхананда лимбяка манзаякоцяда’ танесеты. Округна еркы’ маркана илена’’ хибярина ӈокаювдо’ манзаяхататто’ ныланавандо’ ёльцяӈгана кружокха’ ядэрцеты’’, хыно’’манзь’ ма’’люрцеты’’, ханяӈы’’ театрхана сянаку’’.
Маля ӈахакуд’ маркы нюдякоця’ хардакоцяхана мел’’ не’’ ма’’лэйдаць. Не’’, хуний сэдорава серм’ харвабнана. Не’’, хуний ӈэрм’ ненэцие’’ илм’ теневана’’. Не’’, хуний нибям’ ня’’амбась тенева’’. Тарця нида’’ ӈобт’ ма’’лавы нява’ Екатерина Никитична Бобрикова. Нянэй не’, тохолкода, сэдорана, ӈока мэкад’ ӈамгэм’ теневана. Пыда мел’’мана сэдвы’’ панэ’’ната ӈока’’ не’’ ядэрӈа’’. Екатерина Никитична ма’’лавы некоця’’ теда ӈод’ хусувэй си’’ив маттамдэй яляхана манзаидо’ сэдбаванзь’ ма’’люрцеты’’. Сэдораван’ харванар’, сэдорась’ тоходанван’ харванар’ таня турць’ пир’’ӈада, хуний товы хибярим’ нина’’ маймбась ядабтамбидо’. Ӈамгэм’ харто’ сертабась’ тенева’’, тикан’ товы хибярим’ ӈод тохолаӈгу’’. Нюртей яляхад’ «Мел’’ не’’» клубхана мэна’’ не’’ ханзоць’ сэдорана’’, хусувэй яля’ сэдорава серкана мэбе’’мадо’ ӈарумдана’’. Таняна сэдорана’’ нина’’ манзаи’’ маркана танеда’’ выставкахана маниесьтына’’. Маня’’ мел’’ нина’’ ӈани’ яханана танеда фествивалька’, ӈарка выставкаха’ тэворцеты’’. Харто’ манзаидо’ хусувэй яхана манэ’’лабтабасьтыдо’. Таняна ӈани’’ нито’ манзаи’’ маниесь несэй ӈамгэн’ тоходансеты’’. Нянэй ненэця’ ембдяро’, ӈэ’ се’ сэдбась, ӈухуко’’ – сянако’’ сертабась харвана’’ хибяри’’ тохолабсеты’’. Ти, мел’’ ӈэвадо’!
Нюртей яляхад’ клубхана сэдорана, хуний хусувэй си’’ив маттамдэй яляхана нюдяко’ хардакондо’ маймбась ядсеты’’, нюбедо’ нюмдеӈгун’ – Людмила Лаптандер, Галина Артеева, Маргарита Латышева. Тикы’ нина’’ харто’ есяконато’ ӈани’ яханана танеда мероприятияха’ ӈэдалёрцеты’’. Тарем’, нюдя пэвдэй ирийхана Галина Артеева Санкт-Петербург’ март’ тэворӈась. Тарця ӈарка маркана ваеравы фестивалькана манзарась. « Первый открытый фестиваль Северо-Западного региона России по традиционной текстильной кукле.» Санкт-Петербург маркана самляӈг яля’’ ямбан миӈась. Таняд’ харта яханда мел’’ нява Диплом лауреата второй степени,Сертификат тэврась.
Тарця фестивалян’ Россияна си’’ив яӈганя яхад’ юр’’ вата мел’’ хибяри’’ турӈаць. Хусувэдо’ манзаидо’ тэвравыць, мастер-классм’ манэ’’ лабтавыць, презентации’’ сертабавыць. Галина Анатольевна ӈод’ тарця серкана нерняна миӈась!
