Тад хуняна техэ яханда нэкалӈада.Нянда тотрев’ параӈода хардаха’’ тэвы’’. Манзаям’ ӈани’ ни ху’’. Мяканда ядаванда сер’’ поп вэсако’ харда’’амна хая. Тикан’ манзара лабцей’’. Няхар’’ яля’ поп вэсако’ нюм’ ӈавламбида, пин’, мят’ тэволада.
Няхаромдэй яляхана тэдолы’’, поп вэсако питарӈада. Мяканда пуня’ хая. Тэвы’’. Нисяда масьнё’’: - Нена’ вэвананё’’. Савахававна сит табэдамбидамзи’’. Ӈари’ теда’ нюдя нянди ёльцяӈэ хая. Нисяда маси’’:- Няхают то’’олахан нинякэн ӈа’’. Пыдахартар няхают тотрев’ тарем’ нён ӈа’’. Манзаям’ хобат ӈод’’, тарем’ ӈод’’ поп вэсако’ мя’’амна нён хань’’.
Маӈгабада вэсако’ нюдя ню мяканда хэбянда поп вэсако’ мядм’ хэрабтада. Параӈода’ харад’’ помна яля’ ямбан’ ядэрӈа. Ханяхартана манзаям’ хояь я’’ма. Ма’’нив’: - Параӈода’, харта ӈыланда манэпа’’ни’ сава ӈэдараха. Параӈода’ мят’ тэвы’’. Параӈода' сидя солдат сита нултаӈаха’: - Маӈгабада вэсако’ ню ханя’ миӈан?
- Манзаядми пюдм’. Параӈода вэсакоход манзаям’ ни ху’’. Тад пин’ тарпа’’махаданда яляда мале сэйвы. Идя ядэрӈа: - Ханямна хэб’’ни’ сава ӈэбта? Хальмер’’ нямна хантадм’?
Тарем’ сырпата поп вэсакода хонёдараха. Поп вэсако’ мяд’ нямна хэсь пяда. Тарем’ яданаханда поп вэсако’ мят’ тэва, маханда няна ӈоб лаханана тарем’ мамононда: - Маӈгабада вэсако’ нюдя ню ӈаха’’ нэкалмэр! Тикахав поп вэсако ӈэвы. Вэсако’ ню тарем’ма: - Ӈахакав’ ханяв нэкал’’, манзаядми пюрӈадамзь. Теда’ мякани миӈадм’. Поп вэсако нянда масьнё’’: - Ӈоб’’ манзаякоми’ таня. Тедари’ мят’ тюхуни’. Тюӈаха’. Сяйманди’ сер’ поп вэсако тарем’ лахана: - Ӈудасяда, ӈэсяда нюми маная’’ин. Теда’ тарця ӈэя, ӈопой мань ватони сер’ ӈэин. Ватоми тарця: ӈопой по’ ямбан’ нянани манзараванд ямбан’ вэва вадам нянд ваде’’пани илебяни няби пелям’ нянд таидм’. Пыдар вэва вадам’ мэпат, недбяси’’ мяканд хантан.
Тарця вадам’ намда’’махаданда лаханана’ мунм’ намда. Тарем’ ма: - Итами тахарӈада'’. Маӈгабада вэсако’ нюдя ню итамда ми’’ӈа. Тикамда мале’’мяхаданда поп вэсако’ пухуця, нянда тарем’ манзь ханада: - Няр ӈани’ ӈаворман’ ни харва’’? нянда ӈаврад ми’’ӈа. Ӈэсяда, ӈудасяда ӈаворӈа. Яля ямбан’ манзая’’ӈада. Хонэйд’’. Ӈамгэ’ пирка’’на няда ма: - Ваӈган’ си’’ми хана’’. Ханада. Танянанда хадада. Няхар’’ яля’ нюди’ мунзи. Поп вэсако ихинянда ма: - Ӈамгэ нюми мунзябата? Манэ’’ӈада, ханяхартахана нюдя яӈгу. Поп вэсако пухуцяханда тарем’ ма’’нив’: - Тайкуй манзаранахавами тарси’’ тосакабтёвы. Теда’ пи’ мани’ хунаба’’ни’ сава ӈэдараха. Тарана ӈамгэрикуд мал’ тюку ӈарка лабтэй’ мю’ мэид. Сидяӈэ та’ ними’ илаӈгу’’?
Ядэрманда сер’ сундукам’ манэ’’ӈа. Маӈгабада вэсако’ нюдя ню тосалъй’’. Ихинянда ма: - Ханзеркав ӈэвандаха’ ӈэдараха’. Хунувндаха’ нибтим’ ӈа’’. Сундук’ мю’ лыӈгараб'’ савараха. Сундук’ мю’ хонаравы’’. Инзелебта сундукам’ миневонди’, тарем’ мамонди’: - Тюку сундуками тарси’’ саӈгово’’мы. Тедари’ ӈаворкани. Маси’’ сибимда. Поп вэсако сундукамда тад нэда, маӈгабада вэсако’ нюдя ню тикахана хонёвы. Сэвада няӈгарпа ма’’нив’: - Ӈавортава’’?
