Ӈавнанда хунананда Маӈгбада Вэсако танявы. Пыда нё’’лёко не нюмда минарць сянахав по’ харасяда ян’ сэвата ед’ ядавы. Тарем’ яданаханда не нюда вадёвы. Ся’’ны’ ӈэбто’ ӈод’’ ӈоб’’ ӈарка яха’ варахана ныланавэхэ’, тад тикад Маӈгбада Вэсакор яха’ варан’ пя мядиком’ серта. Тикы мядиконда сид’ няюд сидя нёда. Маӈгабада Вэсаконд паридена Нальто’’яда таня.

Таня илеӈаха’, яха’ халям’ хадабихи’. Няхар’’ ямб по’ илеӈаха’. Ся’’ны ӈэбта ӈод’’, хане ядэрманда сер’’ ӈоб’’ еся салм’ хо. Тикы еся салм’ мяканда ханада. Мята хэван’ ян’ палӈада. Тикы салан’ париденя паридена Налто’’ямда сяра. Тад тикы’ пуна Маӈгабада Вэсакор не нюхунда тарем’ ма: – Мань хане ядэртахани’ вэнеконд мадлаб’’ вэнекор ӈэдасетыд, пыдар вэнеконд сярась сал’ ни’ ӈамдасетад’’. Тад хуняна Маӈгабада Вэсако си’’ив яля’ ямбан’ ханеванзь хая. Ӈамгэ’ пирка’’на парисе’’э налто харта мадлы’’. Маӈгабада Вэсаконд не ню тянё серта яӈгу. Тарем’ мэнаханда лэда пирця, Есям’ тивта ненэць’ мят’ варехэта тю. Тивда тубка’ пя’ ямбувна пихина саркэ’’лы’’, ӈаворо’’мида ӈэдакы’’ тамна пиревдавэй’’. Есям’ тивтар манзь ханада: – Маӈгабада Вэсако’ не ню, ӈари’’ маньзяван няхар’’ по’ ямбан’ пыдар мяканд тэва я’’мыв’’. Есям’ тивтар янамбоковна ва’’ав ни’ ӈамды’’. Маӈгабада Вэсако’ не ню илебцие’’ ӈамзахахат едм’ пире’’нив’. Есям’ тивтанд тикы’ ӈамзаха’’на лэрида пудобты’’. Есям тивтар манзь ханада: – Мань пыдар нисяхаданд лыӈгараӈгув’’, нияснд то’’омахад мань нямнани нёин лахан’’. Тикы вадида мэсо’’махаданда тюмю’ ваӈган’ тэри’ та’ яӈгума. Ӈамгэ ханевамда мале’’мяхаданда Маӈгабада Вэсакор ти тованонда, си’’ив хорам’ ӈоб’’ сиванда пян’ ӈыдахая илавыда. Маӈгабада Вэсакор манзь ханада: – Мя’’на’’ мюй ӈани’ нена’ ӈабтевонда. Маӈгабада Вэсаконд не ню нисяханда тарем’ ма: – Нюдя ӈэвани мальӈгы’ паныни халтамбидамзь, мя’’ ханя ӈабте’’. Ханяӈыдо’ ӈавэн’ хабто’’ ӈэдакы’’. Маӈгабада Вэсакор ялэма няна не нюхунда мань ханада: – Мань хадёйӈэ ӈэдаравы хорами нёдавнзь хандадм’. Вэсако’ хэхэва есям’ тивтар ӈани’ ӈадимя. Есям’ Тивтар Маӈгабада Вэсако не нюн манзь ханада: – Ӈа’’, тюку еся ядабць’ лэтамбад пуна вэнеконд муно’’лаб’’ вэнекомд ладыба мэ’’ир. Тикыда вадида мэсо’’махаданда есям’ Тивтар мэдамда хада. Маӈгабада Вэсако’ не ню туцавэрихит ӈамзи пире’’ нив’. Едамда ӈамлись есям’ Тивтар тюмю’ ваӈган’ тэри та’ яӈгума.

Ӈамгэ’’ пирка’’на паридена Налто харта мадлы’’. Маӈгабада Вэсако’ не ню парисе’’э Налтом’ еся ядабцяӈгана ладыбюлада, хада я’’мада. Парисе’’э Налто пыда си’’цеймда хаця хада’’, саланда маля хунарабтада. Парисе’’э Налто’ хун’’марихад Маӈгабада Вэсако’ не ню си’’ив ямб яля’ярримда мэ’’ӈа. Си’’ив ӈэсоӈгана Вэсако тэвы’’, парисе’’э Налто’ пумнанда нюхулы. Маӈгабада Вэсакор манзь ханада: – Есям’ тивта е’’эмня вэсакоми хацянан хада’’, вэнекони пуна си’’ми хадаӈгосанава. Тю’’уй’ тира’’мана нясы’’л яӈговы. Маӈгабада Вэсакор не нюмда хадада, еся ядабцянд таркабтахая пян’ ӈыдада.

Малда тамна ни’’ӈа’’.