Тюку ирийхана Норвегия яхана Тромсё маркана маня’’ яна’ тер некоцям’ ядабтамась. Зоя Вылка-Ровна, маня’’ округна тер’ не, Краснойхана илесь. Теда маля самляӈг янганя по’’ ямбан Тромсё маркана иле. Хаюпи’, вэсакода саам’. Харта яхананда Арктический саамский университетхана манзара.

Зоя сидя нюкцяди’. Теда Зоя докторской манзаямда падби. Тромсё маркана Зоя Вылка няюв’ лаханамась.

Вылка: – Мань’ Красной’ ӈэсы терам’. Нисяв’ Вылка Ефим Васильевич, небяв’ Ледкова Евдокия Васильевна илеванди’ ямбан «Харп» колхозхана манзараӈаханзь’. Саць ныхыта колхозась, тыдо’ ӈокаць. Небян’, нисян’ паӈгуди’ Чёрнойхад’ пере’’. Небяв’ таняна соявысь, нисяв’ ӈод таняна соявысь. Пыди’ Ӈарка явнана мюсермэхэсь. Тикахад’ ся’’ны колхоз’ ӈобня’ пэрмандо’ ёльцяӈгана, пыдо’ сиддо’ «Харп» колхозан’ паклець. Тарем’ нин’’ Красноян’ илелъядаць. Тикы ӈэсы’ илесь ядана хаясь. Мань’ Красной ӈэсыхына тоходанамась, ӈоб’яӈганя классм’ ёльцедамзь’. Тикы’ пуд Санкт-Петербург маркана тоходанамась, Герцен’ нювм’ нюбета университет Ӈэрм’ тенз’ ненэцие’’ институт ёльцедамзь’. Специальностями: учитель культурологии, истории.

Корр: Институтм’ ёльце’’махаданд’ округхана манзарасан’?

– Нидамзь’ манзара. Илевав’ тарем’ сюрхалъяць, университетм’ ёльцесь мань’ степендиям’ ня’’амадамзь’ Тромсё маркы университетхад’, тарем’ 1998 похона мань’ Норвегиян’ тоходанвась’ тодамзь. Тюку яхана тоходанвав’ саць ивнян’ ӈась. 2000 похона падарм’ падась тюку яхана диссертацияв’ падбась’ пядамзь’. Визуальная антропология – темами’ тарцясь’: «Коллективизация оленеводческих хозяйств в НАО». «Евр», «Харп» колхоз’ маниесь’ манзаянан’ мань манэ’’лабтавась, ханзер’’ яханана «Ерв» ӈадимясь. Вымна мюсерӈамась’, таняна илена’’ хибярина няюв’ лаханакурӈамась. «Ерв» ты’’пэртя’’ няюв’ лаханамась. Таняна перенин’’ иле’’, пыдо’ сими’ нядабиць. Ӈармбэй ненэцие’’ няюв’ лаханамась, ӈацембой хибяри’’ няюв’ лаханорӈамась. Нянэювна хасавари’ няюв лаханамась, мяд’ пэртя’’ не’’ няюв лаханорць нись’ ерив’. Выӈгана тарця ӈэ’’нив: хасава мяд’ ерв’, пыда вадада пудана. Тыбэртя, хасава, пыда’ тасалку’’ мята’ тер’’ ханя’ ханта’’.

Тамальӈгы’’ похона Россиянана семейно-родовой община’’ нямна Закон’ ӈадимясь, тарця ӈарка пад’’мана хибяри’ колхозхад’ тарпась яӈга манзарась’ мян’’ӈадась. Ханзер’’ нина’’ «Ерв» сертабиць? Тикы’ сер нямна мань’ фильм’ сертадамзь’ – « Ерв – хозяин тундры».

Корр: Культуролог, история тохолкода несэй сер’, ӈамгэ пыдар’ тарця специальностьм’ тэрасан’?

– Мань’ нянэй недм’. Ненэця’ харто’ культурадо’ таня. Маня’’ харна вадава паской, тенева тара; культурам’ теневась’ ӈани тара, тэси’ нянэй ненэця’ яӈгуда’’. Невхэна ненэця’ таӈга иленаць, харто’ илевамдо’ харто’ нерняри’’ минредось. Тыдо’ пэрӈаць, вадамдо’ мэ’’ӈаць, невхы паӈгудо’ тенесь илець. Тикахад’ тад’ тарця сер’ ӈадимясь, ся’’ня вымна мюсермы ненэцие’’ хардан’ илевась тэврэйдось. Сменный выпас’ ӈадимясь. Тикахад’, теда маниесь: ӈамгахэрт’ сава ни’’ӈадив’.