Роза Ивановна Канюкова теда Архангельск’ маркана иле. Таняна илебнанда ӈод’ ида’ пилибт’ харта янда’ нямна ядэрӈа’’, ненэцие’’ вадана нямна ида’ пилибт’ няркна. «Ялумдханана» падвы манзаида ӈадиберцеты. Тюку’ мэвахана юн’ таняхад’ ӈани’ ӈэдарась. Пеля Пунух со’’яма ялян’ тарця вади’’ падась.
Сямянхат нюртей ненэцие” ӈацекы” е”эмня выӈгана нэбэй школахана Синицын Тимофей Петрович манзаравы. Тикы школа Едэй Яхана ӈадимдебэясь.
Тохолкова’ нямна, ненэцие” ил’ нямна «Под вой пурги» 1929 похона книга ӈадимясь.
Школа ханзуйӈэсь невхы мобэй казарма харадм’ ми”мы”. Си”имнанда харад’ нигха” мерця путравы. Хад мальӈгана сыра еребермы.
Школа’ хэвувна миндя” ёнеко мамонондо’ ӈэсеты”: «Марфоӈэй, сырадамд и”ӈэ нарэй’ ӈэсонд’ ма”лан». Марфа ёена масьты: «Тандаед тась мян”ӈадм”».
Вынд ’ вэвако” юн” турць пя”. Ӈацекы” ӈавраси”, хаӈгурӈа”, ни” тоходан”. Школам’ тала тара. Тарця юн намдхава Илья Вылка Кармакулт’ тэвы”. Минханда тохолкода ниӈган’ тю, манзь ханада: «Тимофей Петрович, нара тоб”нанда ӈацекына” ӈамгэм’ ӈаворта”? Тад сиӈгалараӈгуд”. Выӈгы хибярид тарем’ лахана”: Школам’ тала тара. Тарода яӈговы».
Тохолкода ма: «Илья Константинович, ӈа”на школан’ хань”, ӈацекыда” манэс”. Маня” ӈаврава” ӈока. Нарэй’ ӈэсонд тэвӈгу”. Ӈэсындер промышленник” ӈавона ӈамгэдо’ тянюмя. Ӈацекы юндал” ӈамгэн’ сиддо’ тохоладм’».
Школахана лаханако”маданда Илья Вылка ӈань тохолкодан’ то, ма”нив: «Тимофей Петрович, ӈацекы” школам’ нидо’ волтамбю”. Коляв луца вадавна нись лахан’. Теда сававна толаӈгу. Съезд’ ӈэсонд ӈацекы’’ мякато” нёд ӈэдарамбю”».
Съездхана тасладо’: Ӈацекы” школадо’ Белушьехэна ӈэӈгу. Таняна сидя харадм’ тата”.
Съезд’ пуд Тыко Вылка Тимофей Петрович ня’ пон, пинда ӈэсонд лаханакурӈась. Москвахана падтаӈго тоходанвамда ваде”ӈась.
Едэй яндер” манзеты” «Тыко Вылка ханзер” таслада – тарем’ ӈэӈгу». Едэй Яхана школа
ӈоб’’ нерня, ӈоб ” нерня ’ манзара пяда.
Тимофей Петрович Синицын – Пэля Пунух (пунушка’ пеля) тамна хасую” ватамбой по’’ ненэцие” поӈгана манзарась. Ненэцяӈга” ивъер нядаӈгусь.
Ненэцие сахарамбада, няркнана луца ӈэвы. Илхананда ненэцие ил” нямна ӈока книгам’ падвысь.
