Хаювы’’ яляхана округна еркы маркана хуркари’’ сава сер’’ таняць. Ӈопой тарця сидя по’’ ямбан ӈатевэва’’ ненэцие’’ сё’’ мэ’’ма конкурсва’. Ӈока’’ хынокад’, тарана’’ ӈарка хибяри’’, ӈацекы’’ хамандавы’’ манзаидо’ манэ’’лабтабиць.

Сямянд’ ныхытидо’ гала-концертхана хыно’’ӈаць, тараць. Тарця’’ яля’’ мальӈгана маркана яндахат’ товы’’ мядондина’’ таняць’. Ӈопой тарця турмы’’ хасава Хадри Ӈокатэтта. Ямалкана мюсерта’’ ненэцие’’ мякана соявы, нянэй ненэць’, вадамда сававна теневана’’, сё’’ мэ’’ӈа’’, тара’’. Сертамбада’’ ӈаворида ӈока’’. «Сава сёна» жюрина манзарась, мань’ Хадрим’ лаханакурць ня’’аӈавась.

Корр: Хадри, теда Няръяна март’ тонась, «Сава сё» маля ӈока’’ по’’ ямбан яханана танесеты, хынокад’ ненэця’’ ма’’люрӈа’’. Пыдар’ жюрина манзарась, ихинят’ хурка, ненэциена ханзер’’ хыно’’ӈаць? Тикы нямна ир’ ханзер’’ ядэрӈа?

Окотэтта: – Ханярид’ товы’’ ненэця’’ тюкона ма’’лы’’, тодо’ нюдяко’’ хардахат’ товы’’. Хынокава’’ савовна хыно’’ӈа’’, ханя’’ савовна хынос’’. Ӈаркамбой ненэця’’ ӈэя’’, ӈаркамбой не’’ маларка’’ савовна хынос’’ ним’’. Нянэй ярабц’ мэць’ теневана’’ поӈгнандо’ таня’’ма’’. Ярабц’ мэта ненэцяӈгова харта ӈока ӈэсь’ ванида’’ пирас’’. Ӈацекы’’ ненэця’’ маендорка’ ӈо’’, тикада ихиня вэварка. Хурковна ӈод’ пэрӈадо’’ма’’, нянэй вадавна сё’’ мэ’’ӈама’’. Тикартада сава. Харвабцодо’ таня’’, вадавнандо’ лахана тохобто’ тамна сава ӈэӈгува’’. Нердева’’, хыноць тохоя’’. Жюрина тасалкована’’ мальӈгана, нюртей ян’ ха’’мувнда тэро’’бабнана’’ маня’’ невхы сём’ намдвава’’ ёльцембиванё’’. Невхы сём’ ёльцебабнана’’ ӈань’ ина’’ ядэрӈаць: ханзер’’ сава теда, хибя’’ нерня’ ханта? Хибя’’ нюртей ян’ ха’’амгу? Надежда Николаевна Талеева ха’’мы’’ нюртей ян’. Пыда ярабц’ нянэй ярабцядрев’ нидав” мэс’’. Лахана мэ’’ӈада, пуна’ хыно’’ӈа’’, пуна’ пыдамда харта тэлтамбида. Тикахад’ ӈани’ ӈопой ярабц’ мэта, ӈули’’ ӈарка’ хада, хасуюркад’ вата тет’’ пота хада Надежда Федоровна Ардеева тикы ӈани’ нерня’’ ха’’мыць. Маня’’ ма’’ваць: ӈарка ненэцяӈгован’ яӈга ӈуда’ тер’’ мипна’’ тара’’. Ӈацекы’’ ненэцие’’ поӈгана пирдырпата’’ ни’’тара’’. Ти’. Хада’ тарасьнё, хыно’’ӈаси’, лаханасьнё. Яӈга призм’ нянда ми’’ӈаваць.

Нябимдей ян’ ха’’амвы нява Галина Пянковна Вануйта. Пыда Я’мал няд’ ядэрта не. Ӈавнанда Порт’ терва’’, теда Яр’ Саля хардахана иле. Хой’ няна мюсермы не ӈэ’’нив’. Луца’’ вадавна лаханась сабе’’ вунида’’ пирас’’. Луца’’ вада нянда тоена’’ нив’’., ӈокаюв’ сававнанда ненэця’’ вадаривна лахана. Пыда ма’’нив: яӈга индато’ пирта’’ нин’’ хаи’’ӈа’’, мань’ ӈани яӈга маендортаӈэ’ ядэрӈадм’, луца’’ вадахарт’ ехэрадм’. Няръяна март’ тэвормада ихинянда ёльце’ сава ӈэ’’нив. Ма’’нив: ӈацекэрка ӈэвани’ мальӈгана, нюдя ӈэвани’ мальӈгана ӈоб’ тикы мя’’ни’’ тер’’ нерняку’ пэртяӈэ’ тарадамзь, мюсерӈадамзь. Теда ӈарка ненэцяӈэ’ хэвани’ сер’’, ям’ ханяримна сюртемба’ пяв’’. Тарем’ ядэркава’’, ихиня сава. Таӈгамъй.

Тикахад’ няхарамдэй ян’ хам’’вэва’’, Филипп Никитич Ардеев. Ӈань’ тарем’ песьрета’’, сюдбя нямна сём’ мэ’’ӈась. Тикахад’ тамна ӈани’ ӈопой не ӈани’’ тикахана мэсь’’.