Вы здесь

Хоба’ маядир’’

Тю’’умна мюсярта ненэць’ сямян мэтада панэда, мята ея’’, ва’’авнда тер’’ ӈэдакы’’ ты’ хобахад сэдыбада’’. Тикы’’ ӈамгэвэӈэ сертава’ нерцюна сававна мюмдебада ӈэ’’ ни’’им’’.

Ӈопой пэнаӈэ таславы ты’ хоба напада ни’’ ӈа’’, тиканда нензосавэй мэта. Паныӈэ, мяд’ еяӈэ таславы хоба’’ сомбовна мэядамбада’’, мюмдебада’’.

Пили’’ нерде’ лэнда нид ха’’аврамахад хоба мякна, ӈу’ тяха’ ӈыдамахад, сянхав’ яля’ тырана.

Нарма’ няна хадавы ты’ хоба, хан’ ниня хурё, пывхана тырабтамбада. Тиканда пуд мякна сянхав’ яля’ ӈу’ тяхад тыранаӈгу.

Сававна тырабтавы хобамда, тай’ ӈамгэваӈэ сэдуванзь таславэмда, не сомбовна сяй’ вэбахана, икна ябтараӈгуда.

Хобам’ сававна ябтарамбада хурина сяй’ вэба’’ ӈэ’’ ни’’им’’. Сарё яляхана пихина, санюй я’ ниня ябтанана, тадтикад ябтан’ лехебтавы хоба ӈани’сававна ябтаӈгу. Сававна ябтавы хобамда не надорцянда, ядалабцянда нэкалкая, минханда надорць тебаӈгу, пуна тикада ӈани’ талва пиртада.

Надорцянда няби малм’ ян’ паклехэя, лэдэнда ямбдан’ нусь, яля’ ямбан’ надорта.

Пили’’ нерде’ ёӈганда няд хобам’ напада. Надорта не ядалабцянда хэрнари яля’ ямбхана няби я’вэт’ со.

Ӈарка нензомда хаврамахад хоба халя’ юркана юритембада. Юретевы хобада, ӈод’’ ютекаӈэ тамдалахая, пи’ тяха’ ӈоб’’ яхана ӈа. Нябимдей ялянда хубтахад не хоба’ юретадм’ напа пяӈгу.

Ӈобтарем’, ёӈганда няд пяхая, нярпой натада, тадтикахад ямбданда сер’’, пырдари’ тэванда няд ёӈгаханда натада. Тарем’ насомахаданда ту’ явона сэламба ӈу’ тяха’ ӈыдаӈгуда.

Няби яляхана мале’’ сэламамда мэӈгу, тадтикад ӈани’, сянди явна тидхалея, натада. Тарем’ сававна мэядавы хоба сянхана тодо’ яха’’ вэнаӈга, сэдыбаб’’ ӈудахана нюлак ӈэӈгу.

Хоба, техэ малаханда тэврава’ нерцюна, няхар’’ сян яля’ манзаятаӈэ’’ нив’. Ненэй ненэця’ не намы хобамда сэдванда ёльцянд’ хан’ мюня сюрпида.