Хуна санавами нивэв хамэда’’. Нанако папами сидя падухата лабцарибтав. Мань ханаӈав: – Няв папаков, нядахаваданд вунидм’ хаёд’’.
Ӈамгэмда харамда ваде’’ливнандм’, Тысъя вэсако’ ӈэсын’ тэвына’’. Не’ ервкоми Тысъя’ ӈарка ню неданда мэда. Ӈари’’ маньзяван ху’ хэвнядм’, нянандо’ иледм’. Хад по’ пеля иленярахава’’. Хув’ юркына’’ Тысъя вэсако’ манзь ханада: -Вадавэв нюв, сянд ӈопойриӈэ илеӈгунди. Пулэнд хэвад пюбна’’ саванё’’.
Папами масьнё’’: – Тысъя ирив, тарем’ мамб’’нанд ӈамгэда вэвади’’. Тысъя вэсако ӈани’ вахалъянё’’:- Хыйва яхана Мандоко хасава янэ’’ма’’ иле. Пыда не няда танярахавонда. Хубта яля’, хубта. Тыд хокаркар’’.
Тысъя вэсако вадари нивэ ӈа’’. Ӈамгэ янда ед’ ӈэб’’нанда ӈод’’ ха’’ланда тяхама. Ялэмдад’ ӈэва’ пакалтанарин нулта’’ нидав’’. Вэсэй седеларавы’’, манзь ханада: – Мандоко хасава’ сер’’ яӈгавы’’! Не папакомда тикахана татада, ӈамзи ӈэ’ ниня тэва тара. Сюрамба меретава’’ таняриб’’тав’’?
Не ервкоми лэрё санэй’’: – Ёховы не пират’’ нидав’. Маси’’ тэваӈгодакэда. Сеня’ мальӈгана сюрамбахава париденя тёням’ няби пукахад ня’’амрисеты.
Тысъя ӈани’ тарем’ ма: -Няхар’’ Хэно папа хортанакэр?
Мань ӈани мадм’: -Вэва ӈэ’’нив’, хортанакэв.
– Мандоко хасава мята хэвыхы лаӈготе’’э то’ сяд’ ниня сидна’’ ӈатеӈгу.
Пирива мадава. Хубтакохана тэдава’’ ня’’амава’’. Лаӈготе’’э то хубта нивэ ӈа’’.То’ сяд’ ни’ нултариӈава’’. Я’ пиняюд Мандоко хасава’ сидя хабтарце’’э тэхэ’ нихимъяха’. Хэвабовнана’’ хынахалада. Не папакомда хан’ вэня’ нямда пэнливы. Мани’ сидяӈэ то’ сэрт’ пили’’ ха’’мыни’. Неӈэй Мандой сидя паӈгалярта мэта нинда тяха’ теклиревы. Том’ сюрте варилебтеда. Тынзя хунат’ хэ’’мярихиданда хурка мань ӈод’’ ӈэвами паӈгарць нёдал’’ нивав’. Неӈэй Мандой пиняри’ харва. Сюрамбадахани Лаӈготе’’э том’ тяханда нямна сюрте’’ нимим’.Сюрбамами ями сэван’ ӈадимя. Неӈэй Мандой сидя паӈгалярта нохо’ тэвадарев’ санабалвэхэ’. Пиняри’ сюрамби. Нерэни’ ницимна тамна нэкалӈав. То’ сяд’ ни’ тантанаханда паӈгаляркаданда Мандойм’ ня’’мав’. Няби’ паӈгалярта таль’ нэкалӈав. Тысъя вэсако’ ӈудаха’’ ми’’ӈав. Мандоко хасава тарем’ сырпа’’ни няби сята хэв хаця’ пармавы’’. Пыда тарем’ ма: -Не папаков ня’’амрараянё’’! Хаюпаварин’ харбиланакы’’!
Мандоко хасава мэта хан’ нид ӈэда ха’’авра, ӈани’ тарем’ ма: – Не янэдако’сит хоркадм’.
Нёхова харва’’ ныланавдавэ’ то’ сяд’ ӈыл’ ӈани’ ха’’амыв’’. Неры сюрамбамавнани нэкал’’ нивав’. Мандоко хасава пуни’ тёре’’ ни’’им’. Юр’’ тибярин’ поми ёльцеми. Ӈамгэ пирка’’на сюрбамани ями сэван’ ӈадимя. Няби марць нимна пуняюв’ ёӈгабта’’ ни’’ивам’. Мандоко хасава тальня’ товы, сидя нянда вар’ мунзи’’ тамамъяха’: « Та’’ли я’ понд’ сит тэваба’’ни, сит хадаӈгудм’!» Сейни лэрё нерэни’ ницимна нэкал’’ нивав’. То’ сяд’ ни’ тантанахани Мандоко хасава’ пуни няюна пятамда намдадм’. Паӈгаляркадани си’’ми ня’’маӈгусь, ӈэда хоркада. Пуняюв’ ӈани’ мань ёӈгамъяв’’, си’’ми нёданами хади тамдабтемби.
Тысъя вэсако’ хан’ ябцу’’мана ӈадив’’ нидам’. Мандако хасава ӈэмда вэрда. Ӈани’ сюрба’’ ни’’им’, нанако папани хан’ ябцу’’мана минда ӈэвы. Нанако папами я’ нямд тюрм’ нинмявнанда нярахалада. Пыда ӈани’ маси’’: – Ерв янэдоко’’, я’ нямд тюрами маторпада ни’ӈа’’. Мадариб’’нанд вэвами, савами нив такалпаӈгу’’. Мандоко хасава ӈэда’ мадабте.
Тысъя вэсако манзь ханада: -Мандоко хасава нева’’ мато’’ӈава’’. Ханаӈгододакэва’’.
