Сиднтет по’’ тяхана округханана Заполярный районва ӈадимясь, со’’яма яляданда ты’’ сие ниць’ ирий тетимдей толыр’’толы. Заполярный район’ ӈэвахана мэнаӈэ’ нюртей яляхат’’ Александр Безумов манзара.

Округна ӈэсы’’ малӈэ’ районан’ таславы’’. Тюку по’ округханана илена’’ хибяри’’ район’ сиднтет помда ядтаць.

Тарця яля’ е’’эмня районхана манзарана’’ нина’’ презентациям’ хамадавыць, тарем нюмдевысь: – «Заполярных песен россыпь». Тарця ма’’лёва ты’’ сие ниць ирий си’’ив яӈганя’ толыркана КДЦ мякана ваерась. Ӈока’’ мел’’, манзарась’ теневана’’, паднава серм’ харвабтана’’, и’’ӈудота хибяри’’ район’ ӈэсыхына’’ иле’’. Мал’’ пыдо’ харто’ ямдо’ сахарамбась иламдо’ минредо’. Пыдо’ е’’эмняндо’ книга’’ падвы’’, сё’’ мэтина манзаи’’ дискха’’ ма’’ламбада’.

Сидя ёнар’’ няхарамдэй яӈганя похона Заполярный района администрацияна манзарана’’ сидя книгам’, дискм’ хамандавыць. Тарця манзаидо’ тюку ирий’ си’’ивумдей яӈганя толыркана ма’’лавы хибярихи’ манэ’’лабтэйдось. Хибя книгада ӈадимяць? 2013 похона яханана иленаӈэ’ Василий Николаевич Ледков сиднтет ю’’ пом’, тикахад Маремьяна Романовна Голубкова юр’’ сидя ю’’ пом’ ядабтамбиваць. Пыди’ падвы манзаиди’ едэй книгаӈэ’ ӈадимя. Тикы сидя нюдякоця книгакохо’, саць сомбовна сертабэйха’, ханяримна нянанд’ ядэлабнанд’ ниӈаха’’ саӈго’’вос’’. Нюртей книгам’ сертабавахана Краснойхана илена саць мэбета хасава Валерий Ледков манзарась. Пыда книга’ е’’эмня В.Н.Ледков падвы манзаи’’ ма’’ламбись, хуний книган’ паклевыць. Книга’ мюня маниебда падтавы’’ манзаи’’ Юрий Апицын сертавыдась, тикы ненэць Саляхана иле.

Нябимдей книга М.Р. Голубкова падвысь. «Слово-силушка большая» – 1949 похона Архангельск’ издательствохона ӈадимясь. Тарця книга’’ округханана саць тянё, ӈодьбянда несэювна ӈадимдэвы. Книгам’ падтабвы Елена Первакова падтаӈгода некоця, пыда Искатель ӈэсыхына иле.

Книга’’ презентациян’ ӈока хибяри’’ ма’’лэйдаць. Пыдо’ ӈока ихиня сомбой вади’’ паднанито’ нямна намдаць. В.Н.Ледков падвы стих’, тикахад’ М.Р.Голубкова падвы манзаи’ толабада таняць.

Округна ӈэсы’’ теда малӈэ’ Заполярный районан’ паклевы’’. Хусувэй ӈэсыхына харто’ ямдо сахарамбада, лэтбада хибярина иле’’. Ханяӈыдо’ ӈэсыто’ нямна падвы манзаидо’ таня, тарця падвы манзая’’ сёӈэ’ сертабэй. Тарця сё’’ районхана ӈопой дискан’ ма’’лавыдось. Диск’ презентация’ ӈоб танясь. Шойна, Несь, Искатели ӈэсы’’ нямна падвы’’ сё’’ намдаваць.

Ма’’лёва пуд’ хусувэй презентациян’ товы хибяри мядонзэйӈэ’ Маремьяна Голубкова, Василий Ледков книги’’, округна ӈэсы’’ нямна падвы’’ сё’’ диск’ ня’’амась. Таня товы’’ хибяри’’ сава ихиня мякандо’ хаяць, пэвсюмбы ямбан сававна нылэйдаць. Тарця сомбой ныланавам’ хамандавы’’ хибярихи’ ӈарка вадам’ хэтбиць.