Маня’’ округханана ӈокаюв хибярина ӈэсыхына илена’’. Ӈэсыхына илена’’ нина’’ харто’ ямдо’ сахарамбась илевамдо’ минредо’’. Ӈод Харута ӈэсыхына. Тикы ӈэсына си’’ив юр’’ мян хибяри’’ иле’’ – луца’’, ненэця’’, нысма’’ нись поеларамбю’’ ӈопой ӈэсыхына иленадо’ мэ’’ ӈадо.

Ӈэсыдо нюдя ни’’ӈа. Юр мян ӈацекы’’ школахана тоходана’’, сидя юкад вата тохолкода’’ харвась ӈацекы’’ няюв манзара’’. Ӈацекы’’ ӈод тоходанван’ харва’’, школам ёльцесь ӈокаювдо’ тамна нерня тоходанвась ӈани’’ яха’’ ӈэдалаӈга. Теда школахана манзарана’’, ӈацекы’’ едэй школамдо’ ӈате’’. Тикы е’’эмня маля тарана падродо’ хамады’’, валакада сертаба’’ пяӈгудо’’. Невхы школам’ тахабтась едэй школа е’’эйданда ӈадимда. Нюдяко ӈацекы’’ садикан’ ядэрӈа’’. Ӈэсыхына едэй садик маля сертаби’’. Яха нэ’’махад’ тарана хомадер’’ тэврась миртя’’ манзаяхато’ ӈани лапцяӈгуд. Харвабнанда нерняна товнда похона нюдяко ӈацекы’’ едэй садикан’ ядэрта’’. Тарця ялям’ ӈэсыхына илена’’ ӈатедо.

Ӈэсыхынандо танеда организация’’ ерв’’ харто’ манзаяхато’ ив’’ер сырта’’ хибяри’’. Нидо’ нядабась пыдо’ манзара’’. Ӈэсыхына ӈацембой хибяри’’ ӈод тянё ни’’на’’, пыдо’ харто’ со’’явы яханандо’ илеван’ харва’’ , валакада манзая таняя. СПК «Рассвет Севера» сяӈгова саць ӈарка колхозась. Тыдо’ ӈокаць, есьдо’ таняць, ӈэсынандо’ колбасный цех манзарась. Таняна сямянд нерде округханана ты’’ӈамзахад колбасам’ сертабась пядось. Хоровидо’ тянё ниць ӈа. Теда колхозханандо серудо тоенарка миӈа. Тарем ӈэбнанда ӈод колхозандо’ ерв пэртядо’ нерня сава ихиня сырӈа. Тыто’ толыр’’ вадаби’’, мюсерта’’ ненэциедо’ ныхыто’ пирувна нядабидо’. Сян по тяхана ямб’ то няна’’ мюсермы’’ ненэця’’ сян семья’’ «Рассвет Севера» колхозан’ тэсавэй, мядсавэй тюць. Ӈопой тарця хасавам мань Харутахана хомбимась, лаханась ня’’ӈавась. Ненэць хойхад мер ӈэдалёрта буранхана товысь, лавкахана тэмдорць,тарана ӈаворидамда тэмдась пуня хэвась ятнась. Пыда сацьри лаханорик нивысь ӈа. Тарем’ ӈод сян вадам’ хэтась: хойхана иленаӈэ илевава вэва ни’’ ӈа, тына’’ сенз. Ӈаврадава хосеявась’ тарабнанда буранхана хардан’ тэворцетыва’’. Ӈэсыхына ханяӈы’’ ты’’пэртя харто’ хардадо’ таня’’, тобнандо таняна сян’’ яля илесеты’’.

Ӈэсыхына тамна тикада сэвхана маниесь саварха. Хибяри’’ илесь едэй харад’’ сертамби’’. Ӈацембой хибяри’’ хардадамдо’ мимби’’, тарця сер ӈани вэва ни’’ӈа. Пирибця’’, наны’’ ӈэсыхына хаюрпато, манзарабнандо тикахана ил’ танеӈгу. Ӈацекы соянаӈгу’’, ӈэсы вадюдангу, манзая’’ танеӈгу.