Сырэй манзаидо’ ёльцесь тыбэртя’’ нина’’ янамбовна ӈани’ тэтнава’’ яляхато’ тэвыд’. Те’ ёльцяӈгана хойхана маля нюртей суюкоця’’ ӈадиворӈа’’.

Ты’’ сие ниць’ ирийхана тыбэртя’’, хойхана мюсерта’’ хибярина маля идо’ няркнасьты’’. Ханярина сырада тамна ёря’’, пи’ сатаркавна тамна тецьсяты, хад’ яӈгова тикартада сава. Нянэювна ты’’ ниць ирий нерняна тута. Тарем’ ӈод нюртей суюкоця соявам’ хавуна маля намдурӈа’’. Товы юн’’мана’’ тюку по’ нюртей сую’ СПК «Ерв» маттамдэй ӈэсыхына таневысь, тикахад «Харпхана» нюртей суюкоця соявы. «Няръяна тэхэна» ӈод тыдо’ ни’’ӈа’’, таняна ӈод нюртей суюкоця таня. Ӈани’’ сельско-хозяйственный кооперативхана, тыбэртя’’ семейно-родовой общинахана харвабнанда ӈобтарем суюкоця’’ ӈадимдакы’’, валакада юн’’ тэдари нидаць тэв’’. Хуркавна ӈод, ёльцянда тэвотына’’. Валакада тэкоця яндана ниць пяӈгудо’. Небой по’ округханана мат’’ ёнаркад ватамбой сую’’ соявыць. Тамбирувна яханана тына’’ толыр’’ нядэяць. Тюку по’ ӈод ӈокханда ӈани’’ мат’’ ёнаркад вата тэкоцям’ ӈате’’. Нерняна ӈадьгува, ханзер ӈэвна. Ӈодь, нумда сава ӈэя, хаярэко таняя, сата мерця, хад ӈоб яӈгоя. Нум’ тыбэртина тарця ӈарка серкана нядая.