Ты’’ ниць ирий хасуюдимдей’ толыркана саць ӈарка ялям’ мэ’’ӈава’’ – Победа яля’. Тюку по’ си’’ив ю’’ помда ядабтабива’’. Пудана ӈарка сайнорма’ ваерамахад’ сян’’ юд’ мян по’’ хаи’’. Ӈарка маям’ тэвравы сайнормам’ юрва’’ серта’’ тенад’ яӈгу.
Сайнорма’ пуд ӈока ӈацекы’’ евакоӈэ’ вадыць. Нина Ивановна Баркулёва Нюдя яхана ёнар’’ хасуюёнар’’ тет ю’’ няхарамдэй похона ты’’ ниць ирий хасуюдимдей яляхана соясь. Соябнанда нисяда маля сайнормахана мэвысь. Нисяда Иван Михайлович Ледков «Няръяна ты» колхозхана 1929 поход’ тыбэртяӈэ’ таравысь, таняхад 1942 по’ носиндалава ирийхана ӈэдалавыць. Нисяда Холгов’ тер ӈэвысь, харто’ тыдо’ пэртяхад’ перевысь. Холговхад’ тальняюв’ 1927 похона товыць. Сайнорма по’’ нерцюна Ленинград’ маркана партшколахана тоходанвысь. Тикы’ пуд падарм’ теневана хасава’ харта колхозхананда партийной организацияндо’ секретарьӈэ’ таравысь. Пухуцямда’ ӈод Ленинград маркана’ ховэдась. Тамальӈгана Нина Ивановна небя’ Федосья Николаевна Выучейская ӈобтарем тикы ӈарка маркана тоходанвысь. Хоян’ то’’омахаданда «Няръяна мякана» хибяри’’ тохолабвысь. Сайнорма ӈэсонд хойхана мюсерць илевэхэсь, тамальӈгана Иван Михайлович ӈод «Няръяна мя» нерм’ пэртяӈэ маля’’ таравысь. Харто’ хибярито’ няюв манзаравыць.1940 по’ ты’’саполана ирий самлязимдей толыркана нюртей нюкцяди’ соявысь. По’’ ваерась Мария Ивановна Канюкова (Ледкова) ӈока по’’ ямбан Саляхана ӈацекы’’ тохолабись, школандо’ ервотаӈэ’ манзарась. Нина Ивановна нюдяюм’ не нюди’, илеванда ямбан Хонгурейхана илесь, «Няръяна ты» колхозхана манзарась. Теда валакада вэсаконда яӈгума’’ сер’ маркана не’’ нюта’ хэвхана иле. «Илебц» театран’ ядэрӈа, тикахад’ пилибт’ сэдорасьты. Сэдорова серм’ илеванда ямбан минреда. Нина Ивановна мась: – Сэдорась саць мэнев’, сэдъяхава’’ саць ихинян’ пои’’. Хыноць ӈань небя’ хасадан’ тухумась. Пыда пили’’ сэдорасьты, хыноцеты. Мань хойхана илемась ӈани, нив’ тене’’: ханзер’’ сэдора пясав’. Школан’ тамна нимась ядэр’’, маля пендуй’’ пенакоцяхат’ хукла’ буркаця сэдбасьтым’. Тарем’ янамбовна, вадбой сэдора тухум’.Теда ӈод хусувэй яля ӈамгэкоцявам’ сэдбасьтым. Ханяна ӈухукоцяэ сэдбаӈгум, хуркари падкоця. Тад’. хуркахова выставка’ танеӈгу, лэркабт’ ханда ӈамгахэвам’, хамадёда’’, таня ханаӈгун’. Тикахад’ внукан’ е’’эмня ӈамгэвам’ сэдбасьтым,ӈань тарана сер. Пена’’ вак’’ хаё’’мяхад’ ӈамгэкоцявам’ ӈань сэдгум’.
Тикахад’ «Илебц» театран’ ядэрӈам’, таняна маля пон’ сянакум’. Тамна Хонгурейхана илемась. Ханяна ханьзьтытак, ӈань’ тосьтым’. Тамальӈгана режиссерӈэ’ Сергей Никулин тарась. Тедахова театран’ пилибт турӈадм’. Март’ илевась вэскон’ яӈгу’’махад’ томась, пыда вэвковна яӈгумась ӈань. Ихинян’ саць вэвась, пилибт’ ярцетым’. Пуна церковян’ хаям’, Антоний батюшка ня лаханорӈамась. Пыда ма’’нив’: нён’ ха’’лит’ поръя’’, хибяри’’ няку’ хань. Хибяри’’ поӈгана незеларка ӈэӈгу. Тарем’, мань нянэвна театран еримям’. Хусувэй репетициян’ харвась ядсетым’.Тюкохона нина’’ няюв ӈокавна манзарасьтываээ, хуркари сценки’’ сертабаӈгува’’, едэй спектакльм’ масьтеваць, хыноцетыва’’. Хасавина’’ ни’’ тэвортак, мань’ ханяна хасавам’ ӈэсьтымди’. Едэй спектакльхана мань’ёртя вэсаком’.
Корр: Нина Ивановна, Победа ялян’ тэвотына, си’’ив ю’’ по’’ ханзер’ сайнорма хаи. Пыдар нисяр’ сайнормысь?
– Мань’ нися’ хасав’ сайнормахана мэбэй Ледков Иван Михайлович. Ленинградский фронтхана, таняна яӈгумбэйди’. Медико-санатарной батальонхана мэвысь, 388 батальон. Сайнормахад’ товы падарта таня. Теда фотографиям’ ханамась, таняна нарумдаӈгудо’. Тюку по’ Победа яляхана бессмертный полкхана ядгум’, нисян’ портретм’ минреӈгум’. «Няръяна тэхэд» хаясь. Тэна мэбэй, секретарь комсомольской организации ӈэвысь, тикад партийной школан’ ӈэдарадось Ленинградан’. Небяв’ ӈань тамальӈгана таняна курсха’’на тоходанвысью Таняна ниди’ ховыди’. Ӈобт’ хаяха’, тикад’ пуня «Няръяна тэн’» то’’ӈаха’. Тарем’ илевэхэсь, манзаравэхэсь. 1942 по’ ноябрьхана хаясь сайнорман’. 1943 по’ февраль’ ирий’ 5 толыркана госпиталькана от ран яӈгумысь. Ленинградской областьхана, Кировский район, Путиловский сельсовет, станция Назия – таняна сюры.
Мань’ нисяси’ вадымась, сибиць нись’ ӈа’’. Тарця сер’’.
