Хари’’ вадавна толанзёва’’ сава сер’. Тарем’ вадамд’ торомдабин’, лаханась’ харвавар’ ӈадимдангу’’, несэй вади’’ тохолагун’. Маля понку’ « Петров луца’ вадавы – Вэра’ ӈацекы.» Няю Вэнго падвы толабира’’. Тюку яля’ тамна пелямда толара’’.
Сянад хунад ядбани’ ӈод’’ Мадорота яха нярхалъй’’. Яха’ малхана пясавэй сохо танявы. Пясавэй сохо’ яля’ няӈы ядхад я’ хора’ нямд’ мал сарковы. Я’ нямдам’ тальня’ нэкалӈав. Сюдбя’’ я мя’’ ӈэвы. Мят’ мятюдм’. Сюдбя’ си’’ив ню’’ ту’ хэвхана тиври’’ салвары’’. Сюдбя вэсако пыда тарем’ ма: - Вэра’ ӈацекы, тохоявэн.
Мань тарем’ мадм’: - Тыни’ хая’’. – Понарка’ яӈгун, сян ю’’ по’’ хэвакы’’? – Ӈанова’’ тахарась. – Нер тюковна хаясь. Лабарта ханадась, теда’ лахана мякнанда иле. Мякнани’ сеӈг’’махаданд ханданава.
Сюдбя’ пухуця ӈайта хабартам’ едан ю’’ӈада. Едва’’ пи. Ӈавормаханана’’ хара вуни таня’. Мань тарем’ мадм’: -Лабартам’ пяб’’нани’ тыра’ хэвӈэ тараӈгобтав’?
Пыда тарем’ ма: - Ханядм’ тара’’. Ӈаворма ӈэ’’нив’. Тедарихав’ харт ханданава. Мань пумнанд хар’’ни’ тутадм’. Яляни’ ялэмзь ты’’ ӈуд’ мюмня ӈани’ ялъяв’’. Сянад хунад ядбани’ ӈод’’ ялям’ нидм’ тола’’.
Ӈамгэ’ пиркана едэй хадон’ тэвыв’’. Едэй мядэхэ’’ тебелыв’’. Яднахани’ нерни няна мя’’ ӈадимя. Ӈоб’’ ӈарка мя’’ – татори’’ пу’’лабты’’. Мяд’ хэвхана хан’’ сярвы’’. Хан’’ ӈока’’ ӈэвы’’. Вэн’’ тёрейд’’. Вэно’’ тёрехава, мякы мякна хасава мамонда: -Ёндар’ не ню, ӈамгэ тобта? Пин’ сыркарт’’! Пыда тарем’ ма:- Вэра’ ӈацекы товы. Ха’’манзь товакы?
Мань мят’ мятюдм’. Лабарта пыда тарем’ ма: - Вэра’ ӈацекы, ханя’ тосан. Мань тарем’ мадм’: - Иленя ненэць хури’ ханя’ тэв’’. Ядэрмани’ сер’ мядм’ едтедм’. Сидя ва’’авдо’ ӈэвы. Лабарта пыда тарем’ ма: -Тальняюна нянани’ мядондини’ ӈока’’. Тяханямна хань’’. Нярава Нирцько, пыдар едар пире’’. Тяханыӈы не’, Нярава Нирцько’ ва’’ав’ пэӈаха’ понд’ мань ӈамды’’. Ӈамд’’махадани’ вэн’’ ӈани’ тёрейд’’. Лабарта масьнё’’: -Ёндар’ не ню, пин’ сыркар’’. Пин’ манэй’’, ма: - Лы Ӈэ товы. Лабарта масьнё’’: - Ияв товы, тикахав тоя.
Лы Ӈэ ийда мят’ мантэй’’, ӈэхэвахаюда ӈабцата лэхэ’. Пивам’ ни мэс’’. Лабарта ма: - Маня’’ нямнана’’ ту’’, тяханяхававна хань’’ нён хань’’!
Тиканда Лы Ӈэ сюдбя нита хэван’ ӈамды’’. Мядонда’ ӈамдахана вэн’’ ӈани’ тёрейд’’. Лабарта ӈани’ ма: - Ёндар’ не ню, пин’ сыркар’’ – хибя тобта? Ӈани пин’ тарпы’’, сыро’’махаданда не тарем’ ма: - Няби яхэнени’ нися вэсакоми’, Ӈэва Лы товы. Лабарта масьнё’’: - Тикахав тоя. Маня’’ ӈатеваць. Ӈэва Лы мят’ мантэй’’. Маниеб’’нани’ ӈэвада тайси, ӈарханда лы. Ӈамзакода яӈгу. Лабарта няханда маси’’: - Тальнямна ту’’, тяханямна нён хань’’. Маня’’ тюкохона мэва’’. Ёндар’ не нюӈэ, едар евалт. Пуна евэйда тяню ӈэӈгу.
Малда тамна ни’’ӈа.
