Марий Эл республика еркы марӈэ’ Йошкар-Ола мар тара. Ӈарка, паской маркана няхар’’ юр’’ самляӈг юкад вата хуркари’’ тенз’ мэта’’ хибяри’’ иле’’. Ӈокаюв хибяри’’ мариец’’. Пыдо’ харто’ ямдо’ сахарамбась илевамдо’ минредо’, харто’ вадамдо’ мэ’’ӈа’’, тенева’’, лаханаван’ харва’’.
Маркана хусувэй улица’’ нюв’ марийской вадавна падвы’’, театрадо’ таня, ханяна хусувэй спектакль’’ хари’’ вадавна масьтембэй, сянакодидо’ малӈэ’ харто’ вадавнандо’ лаханана’’. Тарцям намдурць, ихинян’ ёльце савархась. Инян’ мадамзь: маня’’ ся’’ня тарцян’ тэвӈгуна? Ся’’ня округханана ненэця’’ вадава’’ ханярина соӈгу, хибярина ханярина вадамдо’ мэць лаханаӈгу?
Тамна Марий Эл республикахана харто’ радиостанциядо’ таня, ханяна ӈобтарем мал’’ программа’’ марийской вадавна сертавы. Наталья Пушкина тарця радио’ редакторӈэ’ манзара, пыда няюв’ лаханамась. Ханзер’’ манзаравамдо’ хонрамбимась. Наталья тарця вади’’ мэ’’ӈась: – Маня’’ нюртеймэвна эфиран’ сидя ёнар’’ самлязимдей похона тарпынаць, нюртей программава сертаваць. Валакада ю’’ поӈэ’ маля ханта. Ю’’ по’’ ямбан манзаява ямбан манзаява ӈокама, манзаранина’’ тянё ни’’ӈа’’. Юкад’ вата хибярива тюкона манзара’’. Радиопрограммына тянё ни’’ӈа. Йошкар-Ола маркана сидя’яӈганя сяс’ ямбан радиова манзара, тикахад’ сиднтет’ яӈганя сяс’ ямбан районха’’на илена’’ хибяри’’ радиова намдурӈа’’.
Радио’ манзаям’ пэртина манзаян’ хув’ мер турӈа’’. Маля си’’ив сясхана нюртей программава миӈа, няхар’’ сяс ямбан сидя хибярива эфиркана манзара. Ток-шоу программава минзьты. Тамальӈгана мядонда’’ турцеты’’, пыдо’ няюв хуркари лахарё’’ танесеты’’. Экономика, политика, хуркари социальной сер’’ таслабсетыва. Няна’’ телефонувна лаханана’’ танесеты’’, пыдо’ няюв лаханасьтыва. Сё’’ сосьты, хуркари музыка танесеты. Хув’ эфиркана манзарась мэкад’ ӈэсьты.
Тикы’ хавна хуркари программы’’ хамадабива, журналистна таня’’, тэворӈа’’. Маня’’ хусувэй программава хар’’на’’ вадавнана минрева’’. Яханана илена’’, манзарана’’ хибяри’’ турцеты’’. Мал’’ пыдо’ манзаито’ нямна вади’’ хэтбасьты’’. Яханана ӈока по’’ илена’’, сававна манзарана’’ хибярина е’’эмня программы’’ сертабасьтыва’’. Хурка юн’’ таневам’ яляхананда сян’мэвна радион’ инзеледаха’’ ваде’’цетыва’’, сё’’ мэцьтыва’’, нум’ хурка ӈэвам’ ваде’’цетыва’’.
Тамна «Едэй сё» программава таня. Сё’’ падбада’’, сё’’ мэта’’ хибярина едэй манзаям’ падась нерде маня’’ студияхана лаханасьты’’, сёмдо’ мэцьты’’. Тикахад’ маля ӈани’’ ян’ манзаидо’ ӈэдтабасьтыдо’.
Сертабада манзаина’’ ӈули’’ ӈока, мэкад’ манзарась. Хусувэй манзаранава’’ харвась манзаямда’ пэрцетыда. Тарця сер’ ихинян’ саць сава.»
Тарця вади’’ харто’ манзаравандо’ нямна Наталья Пушкина хэтась. Ненсянда’ ӈод, пыдо’ харвась манзара’’, манзаямдо’ мэнена’’ хибяри’’ ӈэвы’’. Ӈокаюв’ манзаранидо’ ӈацембой хибяри’’, вадамдо’ сававна теневана’’, культурамдо’ тю’’увкури’ пэрман’ харвана’’.
«Марий Эл» радиона’ манзарана’’ эфиркана манзаравандо’ хавна тамна хуркари’’ сейхана мэкад’ манзаи’’ сертабасьты’’. Этнодискотеки’’ хамадабсеты, таня турта’’ хибяри’’ харто’ тарабцодо’ мэцьты’’, хибяри’’ ӈобкана ныланасьты. Тикахад’ хуркари’’ ярмарки’’, фестиваль’’ хамадабсеты’’. Тарем’ манзаравандо’ е’’эмня есядамдо’ недво’’пи’’.
