Ил’ харта тарця хибярир’ сояӈгу, илеӈгу, манзараӈгу, тикахад’ ёльцянда’ тэвась яӈгумда.
Ся’’ха ӈацекы сояӈгу, теневасьтыва’’. Ӈобкарт’ хибярир’ яӈгуманда ёльць’ ехэрада. Илевандо’ ямбан ӈокаюв’ хибярина илевамдо’ сава ихиня мэ’’цьтыдо’.
Илевандо’ ямбан ӈока сава серм’ сертасеты. Сававна илесеты’’, манзарасьты’’,нюдо’ вадабасеты’’. Небой по’ февраль’ ирийна няхарамдэй’ толыркана Анастасия Федоровна Михайловава’ яӈгумась. Тикы нем’ округханана ӈокаюв хибяри’’ теневадось. Пыда илеванда ямбан врачӈэ’ манзарась. Ненэцие’’ культурам’ теневанась. Ӈодьбянда пенсиян’ хэ’’мяхаданда культуран’ манзаравась товысь. Округна этно-культурный центрхана ненэцие’’ отдел’ манзаям’ нерня минресь. Таняна манзарась ня’’амы’’ нита’’ няюв’ Няръяна маркана нянэй мядм’ ӈамдтаць, тарця мякана хибяри’’ ядабтабиць, нянэй ненэцие’’ ил’ нямна лахарё’’ мэ’’ ӈаць. Тикым’ хибярина тенад’ тенедо’.
Анастасия Федоровна си’’ив ю’’ подась, тамна ныхыта хибярирхась’, нерня илева’’ планда ӈаркаць. Ӈока ӈамгэм’ тамна сертаван’ харвась. Анастасия Федоровна илевамда сибцяӈэ’ нир’ нюмдеӈгу. Пыда сайнормы ёнар’’ хасуюёнар’’ тет ю’’ няхарамдэй по’ ты’’ниць ирийна еркы’’ толыркана соявысь. Сайнормы’’ похона вадюданась, ӈока нюдякоӈэ’ небямда нядабась тэхэна мэсьты’’, почтам’ ӈэсыхы’ тэврабсеты’’. Нисяда сайнормахана яӈгумысь. Анастасия Федоровна евакоӈэ’ вадюданась. Небяда ӈопойӈэ’ не нюкцямда вададась. Настакода школахана тоходанась, тикахад’ Архангельск’ маркана медицинский институтм’ ёльцесь. Тикы’ пуд ӈока по’’ямбан лекарьӈэ’ манзарась,терапевтӈэ’ Харута ӈэсыхына тарась. Тикахад’ Няръяна март’ илевась’ тэвась, пыда ӈока по’’ Искатель ӈэсыхына геолог’’ лекарьӈэ’ манзарась. Ӈока буровойха’ ӈэдалёрцеты’’. Тикахад’ амбулаторияхана терапевтӈэ’ сававна манзарась. Ӈани’’ лекарь’’ няюв округна ӈэсымна ӈэдалёрмада танясь.
Илеванда ямбан Анастасия Фёдоровна ӈока сава серм’ сертась, ӈока хибярим’ серкана нядась. Хибяри’’ ӈод пыда сита’’ тенедо’. Тюку ирий няхарамдэй яляхана Анастасия Федоровна яӈгу’’махад’ поӈэ’ хаясь, тикы яляхана теневана хибярида ма’’люрӈаць. Няндо’ сюрвы ян’ ӈэвдо’ хавравась ядэрӈаць, нямдо’ сава вада’’хана тензебтедонзь. Тенеӈгува’’.
