Няхар’’ ирий’ ваерась Россиянана сырэй Олимпиада ваераӈгу. Тарця яля’’ха хамякова миӈа’’. Сочи’ маркана февраль’ ирийхана хуркари’’ яхат товы’’, хуркари’’ тенз’ мэта’’ нянэювна спорт’ мэнена’’ хибяри’’ яхана пирдырманзь’ ма’’лаӈгуд’.
Сидя ёнар’’ тетимдэй’ яӈганя по’ Олимпиадам’ ӈатева’’. Тарця ӈарка серт’ Россиява сян по’’ ямбан хамякусь. Ваеравнда олимпиадан’ хусувэй тарана’’ ӈавори’’ маля хамандавы’’. Тюку по’ Олимпийской ту’ маня’’ явнана ӈэдалёрӈа, сян’’ маркана илена’’ хибяри’’маля’’ ядабтамбидось. Ӈока марка’’на’’ илена’’ хибяри’’ тикы тум’ яханандо’ маниедось. Олимпиада’ ту’ Северный полюсан’ тэворӈась, яв’ ид’ ӈылан’ ядэладонзь, космосан’ и’’илвась’ хамяку. Маня’’ округхана олимпиада’ ту’ носиндалава ирий’ няхарамдэй толыркана тэвыць. Няръяна март’ тиртя ӈанохона яӈга тэравы’’ хибяри’’ тэврадонзь. Аэропортхана ядтаӈгода’’ хибяри’’ ӈокаць. Таняхад’ тэхэна ӈэдалёда нина’’ тум’ марад’ няюв’ ханадонзь, нюртей тум’ минревы Игорь Ледков, «Харп» колхозхана ты’’пэрма серу’’ тасламбада ненэць. Тикы ненэць илан’ мэёвна сырта хибяри, илеванда’ ямбан спортхана ныхыта. Пыда’ пуданда тум’ Максим Ледков ня’’амадась, тикы хасава ӈобтарем Красной’ тер, «Харп» сидндетимдей ӈэсыхына бригадирӈэ’ манзарана.
Аэропортад’ марад’ ӈэсонд’ минда сехэры’ вархана ӈока хибяри’’ ма’’лэйдаць, хусувэй олимпийской’ тум’ харта ядабтаван’ харвадась, хари’’ сэвхана манэць’ савархась.
Маркы’ улицавна яӈга тэравы’’ хибярина тум’ минредонзь’. Ӈокханда самляӈг ю’’ хибярись, поӈгнандо’ маня’’ нина’’ таняць. Мань’ ӈод олимпиада’ тум ядабтабивась. Мань’ нябаков Надежда Алексеевна Канева ӈобтарем’ тум’ минресь. Пыда’ сита Первомайской улицахана ӈатеваць. Маня’’ хавнана таняна нуна’’ хибяри’’ ӈокаць. Хусувэй товы’’ тарця серт’ маймбись, хибяри’’ сава ихиня факелм’ минрени’’ ядабтабиць. Тум’ минрена хибяри няюв татда-ӈгован’харваць.
Мэта’’ си’’ивна пудана яляхана Няръяна маркана олимпийской тум’ ядабтаваць. Тарця сер’ ӈарка яляӈэ’ ха’’мыць. Хибяри’’ пивня’ ядэрӈаць, ханярина музыка’ сось, хыно’’та’’ сё’’ мэ’’ӈаць. Маня’’ округхадана Олимпиада’ ту’ хэвхы округ еркы март’ Саля’хардан’ ӈэдалэяць. Теда едэй товнда пом’ ӈатеӈгува’’, февраль’ ирийхана Олимпиада’ Россиянана ваераӈгу. Маня’’ округхадана Сочи’ март’ яӈга’’ тэвравы’’ хибяри’’ ӈэдалавась’ хамяку’’.
