Ненэцие’’ паднава сер’ нямна хамандавы ма’’лёва’ хусувэй по’ ваерасьты’’. Тюку по’ тарця ялуна ирий’ ямбан мэтына’’. Тарця яля’’ха хамяковахана оргкомитет’ манзара, таняна манзарана’’ нина’’ тюку по’ ваеравнда ма’’лёвам’ хамандаби’’.

Тарця сер’ ватовна ненэцие’’ паднава ялуна носиндалава ирий’ няхарамдэй яӈганя толыркана нэӈгуна’’. Ирий’ ямбан ненэцие’’ паднава сер’ нямна хамандавы’’ мероприятия’’ ваераӈгу’’. Округна школахана хуркари’’ тематический урок’’ танеӈгу’’, конкурс’’ ваераӈгу’’; округна музейхана лекции’’ толабаӈгу’’; тикахад’ центр’ развития образования мякана манзарана’’ нина’’ хари’’ вадам’ пэртя тохолкода’’ сямянд’ сававна хамандавы портфолиом’ нюмдеӈгу’’. Округна этнокультурный центрхана яӈга’ хамандавы’’ манзаи’’ манэ’’тава’’.

Няръяна март’ Московский студия’ сертавы ненэцие’’ мультфильм’ тэвравась’ ятна’’, тикахад’ Саля’хардахад’ тарем’ еримбнанда ӈэрм’ тенз’ ненэцие’’ ила’ нямна хамандавы фильм’ «Дыхание тундры» тэвраӈгу’’.

Ӈарка пэвдэй ирийхана округна ӈэсыхыт’ тохолкода’’ тута’’, хуний харто’ ӈэсыхыто’ школахана тоходанна’’ ӈацекы’’ ненэцие’’ вадан’ тохоламбидо’. Пыдо’ Няръяна маркана сян яля’’ ямбан семинаркана манзараӈгу’’. Вадам’ минрена’’ нина’’ ӈобт’ ма’’лась нерня манзаравамдо’ таслаӈгу’’.

Ненэцие’’ паднава яля’’ха округна толаӈгова’ харадхана ӈод’ ив’ер’ хамяку’’. Отдел Севера манзарана’’ харто’ манзаидо’ хамандаби’’. Р.И. Канюкова, Н.М. Терещенко, В.Н. Ледков со’’яма яля’ед лахарёдо’ танеӈгу’’.

Ӈарка пэвдэй ирий’ няхарамдэй яӈганя толыркана конференция’ ваераӈгу’’, ханяна ирий’ ямбан ваеравы серуна таслаӈгуна’’. Тарця ма’’лёвахана манзаравась ӈани’ яхад’ товы’’ мядондина’’ танеӈгу’’.