Тарця’ ядан’ пили’’ ӈамдыв’’. Нябири ӈудами вэӈгала’’ нидам’.Нями тарем’ ма: -Нён ӈамдесад’’. Ӈопой ӈудахана ӈакекэ нидм’ ӈа. Ӈари’ маньзяван мунм’ нидм’ соя’’. Нюдя Хабт Пари нидё тохобэ. Тад нэкалманда ӈудани харахартм’ нивы вэӈгала’’.

Тад нэкалмани сидя енядада ӈэвакони нимня выварць хаяха’. Маханда латан’ пикадаванода. Наӈэдя ту’’монда манарида леды’’. Та’ ӈэсоӈгана паӈгарахава’ тахав’ юркы’’. Манзь ханада: – Теда’ харна’’ вэвава’’ма. Хадарэйна’’ма’’. Тына’’ ӈэдкана’’. Ӈани’ тарем’ мадм’: – Ханеӈгахабида нёйда’’ ӈэдас’’. Таӈок’’ хасава’’ ханодо’ ӈэдыдо’. Ханадо’ нюдерць неры то’’мандо’ мюмня яда пядо’. Харючи’ сидя ню ӈацекэсавэй ӈани’ хэ’’ ни’’им’. Та’ ямбахана таня илева’’. Ӈамгэ’ пирка’’на ӈэрёй сырава ям’ синдавы. Ӈоб’’ ӈэдалёда торахаванода.Тикахав ӈэвы Харючи’ Ӈарка ню. Тикы нянда пуд Харючи’ Ёнай ӈани’ то’’ нив’. Мят’ тюӈахама, недко папами едм’ ханя пире’’. Харючи’ Ӈарка ню манзь ханада: – арка ню манзь ханада: – Неӈэй Лэхэй неми панэсялма. Лэхэ’ ян’ мань ямдаӈгув’’. Ӈока тэхэната Лэхэ ӈацекэми, нями хаёда.

Харючи’ Ёнэй ӈани’ тарем’ ма: -Хурка мань ӈод’’ ӈока Вэ’’ли ян’ ӈани’ ямдаӈгув’’. Вэ’’ли ӈацекэми тыда лэтамбаӈгу.

Мань тарем’ мадм’: – Тикахав хаяди’. Хурка мань ӈод’’ луца’ ӈэва мирми ханаӈгу’’ нидам’. Не няни’ ня’ ханданакэни’. Тысъя ӈацекэ нями хаёда. Тюку мякавами’ хаёдава. Несэй мятами’ сертаӈгунима. Тысъя ӈацекэ, не няни’ мюд харво’’ паӈго’ нимня нэхэдахаркарт.

Пон’ нись мы’’, ӈока тына’’ то’’. Ёрколавама’’. Тысъя ӈацекэ не нями’ мюдм’ ялари’ падвы пуйда’’ нидав’. Хурка мань ӈод’’ тет падвым’ тым’ сярадм’. Маня’’ мюселъяна’’. Сырани ямбан’ хайхалами’. Ӈоб’’ ӈэсовами’ нинякы ӈа’’, мя’’ми’ палӈани. Хуняна мани’ минани’. Мякана мэдм’. Ӈамгэ’ пиркана вэн’’ тёрэйд’’. Мань тарем’ мадм’: – Пин’ сыркар’’. Ӈамгэ тоб’’нанда?

Нями тарем’ маси’’: – Харасяхад ӈоб’’ ӈэдалёда. Мэта тэхэвада самляӈг матюй. Мань ӈатев. Нём’ тядэда. Ямбарка ӈэвы. Муноцяӈгабида нихиданда пере. Ямб Санэре’’э ӈэӈгоданакы. Манзь ханада: – Тюку яхана тарця’ ненэцям’ нидм’ хосету’’. Хыбян ӈэбат? Мань ӈани’ мадм’: – Сэвани тяхад Харючи’ нюдя нюм’ нюбе’’ӈав. Ямб Санэре’’э вэнсу письмана ӈоб’’ лыхыдэй’’, манзь ханада: – Я’ вэӈгохона сит еримдедамню’’. Ӈоб’’ не нямд ныхы’ маткана мирци ханаӈгув. Мань яханани ныхыни пирад хось я’’мадм’! Мань тарем’ мадм’: – Маткававна ӈоб’’ не нями ӈули’’ нив тат’’. Мирквавнанда такы яхани тода ӈэб’’нанд, ханзели’ ӈэись. Сянда вуни ӈа’’. Си’ няӈы хэвахани пыдар ӈамдад’’, не ӈацекы едаха’’ пия. Ӈани’ вахалъяв’’: – Пинна едами хубта ӈэдараха. Ӈани Ӈаварава’’ яӈгосав’ ӈамгэ’’? Недко папами сетьвар пэм’ ханзонда няд тюхул’’ нидав’. Сидян’ пями. Ӈамгэ пирка’’на мани’ ябилъяни’. Ямб Санэре’’э ӈопой вадамда няӈганда хода, ӈобо’’ манзеты: – Ӈоб’’ не нямд мирци’’ ханаӈгув.

Мань манзетыдм’: – Ныхы’ маткана мипадами ни’ӈа’’. Ӈамгэ’ пирка’’на ниркавэдм’ тоса’’. Ямб Санэре’’э няби хавоцямд си’’ми лад’’ нив’. Ненаха’’ями париде то. Терсяда’ тю’ садахалавю Ид’’ ӈэвэйда ян’ сехэда’’. Ниркавэв ёльце’’. Пин’ илав. Ханконда мю’ та’ хурав. Сехэрэнда мюмня парабта’’ нивав’. Хуняна ӈани’ ямдэйни’. Си’’ив мюм’ хаени’. Нерани’ няна си’’ив ю’’ мя’’. Си’’ив Хардяӈг мяд’’ ӈэӈгоданакы’’. Мядо’’ вар’ ня’ ӈэсукулыв’’. Недко папами мята мярыбида.

Малда тамна ни’’ӈа’’.