Хусувэй по’ носиндалава ирийна пудана яляхана ӈарка ялям’ мэцьтыва’’. Тикы сямянд’ сава яля’ ӈэдараха’’. Небя’ яля – ӈарка яля. Хусувэй хибяри илевада небяхаданда миӈа. Небя нюмда соябтада, вадабида, илан’ табадабида. Небя нюда’’ хусувэй сава серт’ тохолабида.
Тены’’ по’’ илевахана хойхана мюсерта’’ нина’’ тамна таня, не’’ ӈод хасавидо’ нядабась хойхана иле’’. Пыдо’ хусувэй мяд’ манзаям’ пэрӈа’’, нюкцидо’ нянэй мякана вадабидо’. Анна Петровна Лаптандер, харта тензда Худи нна Петровна Лаптандер, харта тензда Худи ӈэвысь, теда «Рассвет Севера» колхозхана манзара. Хасава тыбэртяӈэ’ тара, не мядм’ пэрӈа. Анна Петровна сиднтет ню’’ небя. Небя’ яля, пыда ӈарка яляда.
Тикы некоцям’ хаювы’’ яля’’хана Няръяна маркана хомбивась. Тарця лаханакурмами’ танясь.
Корр: Анна Петровна, пыдар ӈамгэ’’ я’теран’, ханяна соясан’, ханяна вадынась?
Лаптандер А.П. – Яха’ нявхана соямась, мякана вадыманзь. Колхозхана ниваць’ мэ’’, частникваць. Нин’’ хойхана мюсерта’’, теда лаханая мюсерӈа’’. Нисяв’ маля яӈгумбэй, небяв’ нюху’’ната’’ иле. Теда мякана иле, тэна’’ мюсерӈа. Домна Васильевна небяв’.Илеванда ямбан’ мюсерӈа, пилибт’ нюта’’ хэвхана иле.
Корр: Пыдар ӈани’’ теда ханяна илен’?
– Маня’’ теда колхозан’ пакалъянаць, «Рассвет Севера» колхозхана теда мэва’’, таняна ӈарка колхозхана манзарава’’. Мат’’ поӈэ’’ маля хая тикан’ тэв’’мава’’. Тикы’ нерде «Ямб’ тохона» мэваць, хар’’на’’ тэхэнана’’ мэва’’. Тикахад’ тюкон’ пакалъяна’’.
Корр: Ӈамгэ харта’’ яхаданда’ хэсада’’?
– Ява’’ нюдяларэй, тэва’’ ӈокамда. Няхар’’ ёнаркад’ вата тэхэна несэй я’ тара, нядада’’ тянёларэй. Маня’’ хавнана таняна мюсертар’’ ӈока ӈэ’’нив’. Ямдэйна’’ ханяцей, ядава пюсь’ хаяваць.
Корр: Колхозхана манзарась хуркарха’ ихинянд’, саварха’? Яӈга илебнанда саварка ӈэса’’?
– Ӈамгэ ӈэдакы, нив’ хамадабю маньзьван’. Нянан’ вэвада яӈгу. Ӈоб’ нянэй мякана илева’’, мядуна’’ сава’’.
Хасавав’ Пантелей Александрович Лаптандер, тыбэрӈа, «Рассвет Севера» колхозхана манзара. Мани’ синдтет нюкцями, сямянд’ ӈаркав’ мякана мэ, самляӈг яӈганя пота. Пыда маля сава нядаӈгода, мякана манзара, тэхэ’’на’’ мэсьты. Тамна няхар’’ школахана тоходана’’, Яӈгрехэ’’на’’ сидя не’нюв, хасава нюв тоходана’’. Мякана ӈопой хасава, ӈани’’ не’’ ӈацекы’’. Мал’’ хэвханани’ мэ’’. Харна’’ мядм’ мэ’’ӈава’’. Ӈацекыни’ ӈобӈгэв’ нядаӈгосьты’’. Не’’ нюкцин’ сэдорасьты’’, сямянд’ ӈаркадо’ няхар’’яӈганя пота сававна сэдорана; нюдякодо’ тет’’ потакоця ӈани’’ сэдораван’ харвасеты.
Не мякана манзаяда тянё вани’’ӈа’’, нядаӈгода’’ таняб’’ ӈули’’ сава. Маня’’ сэдорасьтыва’’, надурцетыва’’, ӈавар’’ пиребаӈгува’’.
Мань’ Кара школахана самляӈг по’’ тоходанамась, тикад’ мэсь. Интернатхана илева’’савархая’’ нись’ ӈа’’, таӈга илесь торомбэна вэвархась.
Корр: Ты’’ ялямда мэцьтыра’’?
– Мэцьтыва’’, пилю’’ ирийхана мэцьтыва’’. Ӈобкана ма’’ласьтына’’, сянакосьтыва’’, ныланасьтыва’’ тарця яляхана. Мядонзэйдава’’ тэврасьты’’.
