Округна толаӈго’ хардахана ӈэрм’ ненэцие’’ отделхана манзарана’’ нина’’ ӈарка манзаям’ минре’’. Теда округханана ненэцие’’ культура яля’’ миӈа’’. Таняна манзаранина тарця яля’’хана сертавнда манзаядо’ тянё ни’’ӈа’’, пландо’ ӈули’’ ӈарка.

Маня’’ яханана ӈока тарця хибяри’’ сояць, хуний илевандо’ ямбан харто’ минрена’’ манзаяха’’нато’ мэбета манзаранаӈэ’ вадыць. Тарця хибярина округханана нибнандо’ иле’’ ӈод, маня’’ сиддо’ теневына’’. Ӈопой тарця мэбета не Мария Яковлевна Бармич – тохолкода, профессор, школахана манзарана’’, тоходанна’’ е’’эмня учебник’’, тарана пособие’’ падбадава. Тюку по’ ты’’ сие ниць’ ирийна сидя ю’’ самлязимдей яляхана Мария Яковлевна сиднтет ю’’ пода панысь. Тарця яля’ ед’ толаӈго’ хардахана манзара нина’’ презентациям’ «Знатна земля своими земляками.» хамадаць. Ивня’ ӈэда мероприятие’ носиндалава ирийна сидя ю’’ самлязимдей яляхана маркана илена’’ хибяри’’ ма’’лась.

Тамна носиндалава ирийна сидяюдимдей толыркана ненэця’’ оленно- транспортный эшелон’ е’’эмня масьтевы памятник’ хэван турӈаць. Хусувэй таня товы хибяри сайнорман’ ӈэдалавы’’ ненэциеда ихиньда ха’’аврась. Тарця ялян’ ӈод толаӈго’ хардахана нина’’ выставкам’ хамандаць, выставкамдо’ нина’’ тарем нюмдевэдось – «Они за свободу и счастье сражались.» Литературам’’ манэ’’-лабтаць, ханяна оленно-транспортный эшелон’’ нямна падвы’’ манзая’’ таня’’. Поӈгнандо’ « Оленная армия» Юрий Канев падвы, «Заполярные страдания» Алексей Коткин падвы, «Война в Арктике» хроника войны, Прокопий Явтысый падвы стих’ « Ездовым оленбатальонам» таняна хоӈгуда’’, Ненэцие’’ автономной округхы тен’ книга ӈани’ таняна манэ’’лабтавы.

Хусувэй тюку’’ яля’’хана толаӈго’ хардана ӈэрм’ ненэцие’’ отделан’ тобнанда тарця выставкам’ манэ’’тада. Толаӈго’ хардан’ тюӈгада’’.