Маня’’ яханана хусувэй по’ ӈока’’ ихиня’ сомбой сян’ тенз’’ сер’’ танесеты’’. Округхы’ культура’ серу’’ тасламбада’’ хибярина тикы е’’эмня манзара’’. Хуркари’’ фестиваль’’, конкурс’’, выставка’’ сян’ тенз’’ ненэцие’’ ӈобкана’’ ма’’лабсеты’’. Тарця серт’ хибярина’’ маймбасьты’’, харвась’ сырманзь’ турцеты’’.
Тарем’ Няръяна маркана маля сидя ёнар’’ няхарамдэй поход’ «Печорянкам’» нюбета фольклорный конкурс’ танесеты. Тюку по’ ӈод округна образование’, культура’, спорт’ серу’’ тасламбада департамент округна этно-культурный центрхана манзарана’’ нина’’ няюв’ «Печорянкам’» хамадаць. Округхы’ еркы маркана ӈарка пэвдэй ирий самлязимдей’ толыркана маттамдэй’ Межрегиональный фольклорный конкурс’ ӈока’’ хибяри’’ ма’’лась. Хусувэй тенз’ мэта хибяри харта паӈгда, мел’’ ӈэвада, невхы’ илм’ мэ’’мада. Хусувэй мякана ханяна иринато’, хадунато’ илм’ тене’’, харто’ паӈгуто’ ханяхад’ перевам’ тенева’’, харто’ тенздо’ нёда’’ тарця мякана вадюданна’’ хибяри’’ илан’ мэёвна сырта’’, манзарась’ теневана’’. Тарця хибяри’’ хусувэй тенз’ мэта ненэця’’ поӈгана таня’’.
« Печорянкам’» нюбета конкурс’ тюкумэвахана паской пирибтяко’ яндахат’ ма’’лась. Ӈокханда хасую’’ мэбета’’ не’’ ӈацекы’’ ӈамгэм’ пир’’мамдо’ манэ’’лабтабиць, хуркари серкана я’’авлавамдо’ мэ’’ӈаць. Поӈгнандо’ сидя нянэй не ӈацекэхэ’ таняӈаханзь’, нюбеди’ Юлия Талеева Красной ӈэсыхына вадювы, теда маркана иле, маля мазара. Нябиюм’ Юлия Вора, Ямалкад’ товы некоця, Саляхардахана тоходана. Тикы’ хавна Архангельской областьхад, Вологдахад’, Ижевскхад’ товы’’ таняць, Няръяна маркад’, Великовисочнойхад’ пирибтяко’ пирдырӈаць. Сямянд’ нерня тарпвы’’, «Печорянка» нювм’ ня’’амвы Лидия Шапкина. Мэкад’ некоця, харта вабц’’мананда лахананако ӈарка призм’ Вологдан’ ханада.
Ямалкад’ турмы мядондава’’ Елена Уфимцева конкурс’ мальӈгана тарця вади’’ хэтась: - Не ӈацекэва’ конкурсан’ тэвраваць. Юлява’ Пуровский районхад’ некоця, харта пыданда нямна лаханась, ваде’’ӈадась: ӈамгэм’ пэрӈа, тикахад нянэй ненэця паны нямна, ӈэбт нямна лаханакурӈась. Тамна тяха нисяета, небяета илм’ ваде’’ӈась, харта иламда ваде’’ӈава’’. Паӈгуда ханяд’ пере, нюмда ӈамгэ. Тикахад’ тюнтава сер’ манэ’’лабтава’’. Ӈока ненэцява яӈгу нив’ӈа’’, Няръяна мар тер’’ не’’ хорабтава’’, ма’’нидум’: сидна’’ нядаӈгуда’’? Ханя’’, ма’’ним’, ханзер’’ нива’’ нядаӈгу’’. Сидна’’ няда’’, тюнтава сер’ мэ’’ӈаваць. Нем’ тэмдабива’’ма’’, нохо’’ ӈэдакы’’, няръяна ной’’ ӈэдакы’’. Ти’. Ханзер’’ нянэй ненэця’’ тюнтава сер’ мэ’’ӈа’’, тарем’ сертаваць. Маня’’ хар’’на’’ серуна нинам’ тенева’’.
Маля сава конкурс’, маня яханана тарцява яӈгу. Товнда по’ саво ирыхына фольклорный фестивальва ӈэӈгу, ӈарка ненэця’’ тута’’. Няръяна маркад’ ненэця’’ тобнандо’ сава ӈэӈгусь.
