Округна толаӈгова’ хардахана ӈэрм’ ненэця’ отделкана манзарана’’ нина’’ хуркари’’ мероприятия’’ хамадабсеты’’. Носиндалава ирий’ еркы яляхат’ ӈарка пэвдэй ирийна еркы яля’’ ӈэсонд’ округханана ненэцие’’ паднава сер’ нямна ханярина лаханава’’ таняць.

Тюку по’ округна ӈэсыхы’’на’’ ӈод хуркари’’ мероприятия’’ таняць. Толаӈгова’ хардахана ӈод тарем’ ӈэ’’нисяв’. Таняна  манзарана’’ нина’’ ирий’ ямбан сертавэдо’ тянё нись’ ӈа’’.

Толаӈгова’ хардана ӈэрм’ ненэцие’ няюв манзарава отделкана маля сян по’’ ямбан «Толаӈго книга» клуб’ манзара, таняюв’ турта’’ хибяри’’ е’’мня хуркари’’ мероприятия’’ танесеты’’. Тюкумэвахана клубан’ ма’’лавы’’ ненэця’ ӈобкана Елена Михайловна Талеева со’’яма ялям’ мэ’’ӈаць. Елена Михайловна Саля’хардахана илена не. Ӈавнанда маня’’ округханана ёнар’’ хасуюёнар’’ няхар’’ ю’’ самлязимдей по’ хор’’ ирий юдимдей яляхана соясь. Няръяна маркана школамда ёльце’’махад’ Ленинград’ маркана Герцен’ нювм’ нюбета институтан’ тоходанвась ӈэдалэяць. Сян’ по’’ ваерась пуня’ со’’яма яханда тось. Маля тохолкода. Луца’’ вадам’, литературам’, ненэця’’ вадам’ минрена тохолкодаӈэ’ тоходанвамда ма’’лесь округханана манзараван’ харвась. Валакада пыда е’’эмнянда тохолкода манзаям’ нивыць’ хо’’. Ӈодьбята, пон’ нись ибедор’’, Елена тамальӈгана тамна Ледкова, падарм’ хэвхы округ’ окронон’ падвысь. Сян’ яля’’ ваерась, Саляхардахад’ телеграммам’ ня’’ама. Елена Михайловнам’, тандая институтм’ ёльцевы пирибцяком’, таня манзаравась’ хаӈадонзь. Тарем’ ёнар’’ хасуюёнар’’ мат’’ ю’’ нюртей по’ пилю’’ ирий’ еркы яляха’’на Саляхардан’ ӈэдалэяць. Самляӈг ю’’ самлязимдей по’ хэвхы округхана иле. Педучилищехэна тохолкодаӈэ’ манзарась, окружком’ партии мякана не’’ серу’ тасламбада отдел’ ервотаӈэ’ тарась, тикы’ пуд округ музейхана манзарась., таняхад’ пенсиян’ тарп’’махаданда «Ямал-Регион» телерадиокомпанияхана консультатӈэ’ ӈока’’ программам’ Ямалкана илена’’ хибяри’’ нямна сертаць. Илеванда ямбан Елена Михайловна сававна манзарась, хусувэй пэртя’ манзаянда ив’ ер сырта не. Хусувэй нянда’ товы’’ хибярим’ серкана нядабасьтыда. Хибяри’’ ӈод’ Елена Михайловна’ мят’ теда турцеты’’, ихид’ ӈэда вададо’ мэцьты’’. 

Маня’’ яханана ӈод’ теневана хибярида’ тянё ни’’ӈа’’. Ӈодьбянда толаӈго’ хардан’ товы’’ хибяри’’ тянё ниць’ ӈа’’, хуний харто’ няхандо’ сава вади’’ хэтвась ма’’люрӈаць. Сяс’ ватамбой Няръяна маркад’ Салехардан’ скайпувна хибяри’’ лахарёдо’ мэ’’ӈаць. «Ханебцё» фольклорной группана хынота не’ Елена Михайловна е’’эмня сидя хынс’ хэтаць. Роза Ивановна Канюкова ӈока мэкад’ сер’ нямна сава нянда няюв’ лаханась.

Тарця ма’’лёвам’ сертавы ня’’хаюна’ Надежда Талеева, Зоя Ивакилева толаӈго’ хардана манзарана няхаюна’, нянди’ ӈарка’’ вада’’.

Невхэна ӈани’ яхана илена нянд’ няюв’ валакада телефонувна лаханасьтыва’’. Тены’’ похо’’на интернет ханярина мэ’’ӈа’’, скайп’ таня’’. Тедахова хуркари’ яхана илена’’ нят’ няюв скайпувна лаханабнанд’ нямд’ тамна маниеӈгур’. Тарем’ толаӈго’ хардахана Елена Михайловна няюв’ лаханакурӈаваць. Тарця серкана сидна’’ Саля’хардахана нядавы’’ Валерий Крылов, ОГТРК «Ямал -  Регион» манзарана. Нянда, ӈарка вада’’!